Amos 3 - NQAARIIT NE ROOG

Roog a yegnita yee xan a xaw a Isra’el

¹ Nuun we xa taan Isra’el, o Yaal oxe a laya yee nu nan-giloox ke ta layna took nuun, nuun we ta sutitna no saax laa Misira.

² Kaa tee: «Kaam ɗeet a nuun ndeer qeet adna, jil a nuun. Ten taxu xam xaw a nuun a qaw alaa moƴna o ɗom yaam njofaƭar nuun.»

O tuleer waagee ñak o daawnit ke Roog a doxnuuna

³ «Ndax wiin ɗik a mbaaga o yoon, too nanooree?

⁴ Ndax njogoy a naaga bumbaa kam o joc, too ga’ee mbuufuɗag? Kaam ee, ndax njogoy njanglax a naaga ŋuuraa no nqanq um, too pokooxee dara?

⁵ Ƭeetyo boo nga ndax ndiiƭ a waaga saayoox no siind, too tax ndeefiran mbaat o quusi! Ndax mbog a waaga o wegoox, too tig piriran?

⁶ Ndax jiin a waaga o jeg no saax, too tig xewee? Ndax sabab a waaga o xew na teeru, too o Yaal oxe yoonee teen?

⁷ Kaam ee, o Yaal oxe na refkaa boo faw mosee fosoox tig, too feeñliran duleer we dag um.

⁸ Njogoy naa na bumbaa, an a diidlandeeru? Layangaamoo! Neene mat a reftu, o Yaal oxe na refkaa boo faw a layangaa, a feeñlin duleer um, an na den yegnitkeeru ke fosooxeena?»

Roog a hate’a teeru faa Samari

⁹ Mbalalooxyo kam pind no maad ke Asdod fo ke Misira, lay fop ee: «Ndetyo mbokatoor na xa coong axaa Samari, nga ritiɓ faa ta fi’na, ñagadil ke yee gañ a ndeer um.

¹⁰ We na njuumaa no pind mosu ke den kalal ke no we da mbarna fo kuuɗe, andee a pi o cofel. Mi o Yaal oxe layun.»

¹¹ Ten taxu o Yaal oxe na refkaa boo faw a laya a Samari yee: «Xan fañ a mbidong o kurul-keƥ, a sañit ke reeƭna doole of, pind ke saŋe a yetooxaa o mosel den fop a ngefel.»

A muc a yuɗnooxu

¹² Keeke o Yaal oxe a layu: «Ne o kaynaak a suqtitaa yoqatin mbaal um no don njogoy, ta ref a caf ake mbaat nof, neene mat a muc no Ii-isra’el we ngenna Samari a nandkaa, den weene na mbondooxaa no xeeñ njong, a mudaa no cong moku.»

A maƭax

¹³ Mi o Yaal oxe na refkaa boo faw, ref Roog fee Hupna fop, kaam ee: «Nan-gilooxaamoo, too nu njo’it we no mbind Yakoob a ƭelem es:

¹⁴ No ñaal naa o loq es a dalkaa took Isra’el, yaam um fel o jaf um, ta dak no paaxeer, xan a dal itam took xa sadaxand axe Betel, xa can axe da lupna took den a ƥoloox, a yen a lanq.

¹⁵ A koom xam luƈit xa ƭaakaand axe fo pind cosaan ke, luƈit ke mosandteena a ñiiñ fa ñiig pind maak ke fop a mooc. Mi o Yaal oxe layun.»