Amos 1 - NQAARIIT NE ROOG

¹ Safe leeke kaa wetandooxaa ke Amos a layna, ta war o dal a Isra’el. Amos feene koy na saate fee Tekowa a gen’u, a ref o kaynaak, Roog a feeñlin keene na jamaane fee Usiya a refaa o maad Yudaa, Yerobowam fee o ƥiy Yehowas a ref o maad Isra’el, ta ref xa kiid xa ƭaq mbaambrand a yo’nax alaa no lanq kaa.

² Keeke refu ke Amos a layna: «O Yaal oxe xey a bumbtiidaa Siyoŋ, o ñuxur um a fangoortaa Yeerusaleem: A biinj ake fop a leeƥa, o jul ole Karmel a weer boo ŋayam.»

O Yaal oxe a xasana a Isra’el fo qeet ke matuuna: Aa-araam we

³ Keeke o Yaal oxe a layu: «Felaam o jaf no Aa-araam we Damaas a caf a tadak boo na nahak sax, ta dak no paaxeer. Kaa ndok no saax laa Galaad, a mokandit wiin waa njelem ngaaƈir. Ten taxu o ɓay es ole yoɗooxna waagee ñak o dal:

⁴ Xam fudin fiɗel took mbind Hasa’el fee o maad, ta raaɓ pind no maad ke Ben-Hadad.

⁵ Kaam ee xam ɓol a kinglir ake Damaas, oxe genna Bikat-Awen, um xuuf ñoot o ñis um, Bet-Edeen, um halak o maad oxe saqna o samb ole, Aa-araam we a ndefik faɗ no saax laa Kiir.» Keene o mat o Yaal oxe a layu.

Fiifilista we

⁶ Keeke o Yaal oxe a layu: «Felaam o jaf no Fiifilista we Gaasa a caf a tadak boo na nahak sax, ta dak no paaxeer. Kaa mbokataa a yaj no faɗ, a njikooxaa a den no saax laa Edoom. Ten taxu o ɓay es ole yoɗooxna waagee ñak o dal:

⁷ Xam fudin fiɗel took saŋe ke mbidna Gaasa, ta raaɓ pind no maad ke ten.

⁸ Xam salax we ngenna Asdod, war o maad oxe deegooxna o samb ole kam Askalon, o ɓay es a dal took Ekron, we yoqna no Fiifilista we a saŋkoox.» O Yaal oxe na refkaa boo faw layun.

Feefenisi we

⁹ Keeke o Yaal oxe a layu: «Felaam o jaf no Feefenisi we ngenna Tiir a caf a tadak boo na nahak sax, ta dak no paaxeer. Kaa njikoox no saax laa Edoom a yaj no faɗ, o fog ole dalnit’eena ngiɓoor a mo a yiif den. Ten taxu o ɓay es ole yoɗooxna waagee ñak o dal:

¹⁰ Xam fudin fiɗel took saŋe ke mbidna Tiir, ta raaɓ pind no maad ke ten.»

Ee-edoom we

¹¹ Keeke o Yaal oxe a layu: «Felaam o jaf no Ee-edoom we a caf a tadak boo na nahak sax, ta dak no paaxeer. Kaa ndaabaa fog den fo laƥ, yirmande a ñuf na qeeñ den, fuux den a raaɓaa ñaal fo yeng a sax a paƴ na den. Ten taxu o ɓay es ole yoɗooxna waagee ñak o dal:

¹² Xam fudin fiɗel took Temaan, ta raaɓ pind no maad ke Bosra.»

Aa-amon we

¹³ Keeke o Yaal oxe a layu: «Felaam o jaf no Aa-amon we a caf a tadak boo na nahak sax, ta dak no paaxeer. Kaa nqiir rew wodeer we no saax laa Galaad yaam a mbaaƭaa xa saawit xa yaaju. Ten taxu o ɓay es ole yoɗooxna waagee ñak o dal:

¹⁴ Xam fudin fiɗel took saŋe ke mbidna Raba, ta raaɓ pind no maad ke ten, ndeer xa buuq na bes xire, nen kam a und na bes o ufang,

¹⁵ o maad den a ɓisel gilaa saax took o hup doole, ten fo a salma-koor ake ndeeruuna.» Keene o mat o Yaal oxe a layu.