Abjaas 1 - NQAARIIT NE ROOG

¹ Mbeeñil ne Abjaas. Keeke refu ke o Yaal oxe na refkaa boo faw a layna took Edoom. I ndaawa o nan olaa inoorna no Yaal oxe, ta jeg oxaa luliideena ndeer qeet ke yee: «Inooxyo i ndet, songik a Edoom.»

O Yaal oxe a yegnita njom ne Edoom

² O Yaal oxe kaa tee: «Wo Edoom, xam neewandong a ndeer qeet ke. Wo na moƴkeel o xeef na den.

³ A magnandax ale wo kaa mo’andang, wo fee genna kam luf ke na ƥil ake, fod no fo mbiñ fo ngoƭu took ne soo layooxaa yee: ‹An na waagkaxam o ɗangtit meeke?›

⁴ O yaaroogangaa took-ee-took nen a canjiik soo raang ndeer xa qoor axe sax, xam ɗangtitiidong maaga. Mi o Yaal oxe layun.

⁵ Boo guuɗ a ngaran’oonga, yaayaq a mbetiidong no yeng ole, a ƥiskooga ke da mbaagna rek. A ƭing taxar biiñ a ɓoorange, a naaga o yoqaa kisaatooxel, ndaa wo o mat, xan o gefel tuƈ.

⁶ Nuun xa taan axe Esawu, saax le nuun xan a saakel, kalal ke nuun ƭasneena a singtel.

⁷ We fogtoona hiɓ xan a ngodong, a ndaxtong no fiisel of, qaariit of a ndal took of. We o reertaa o roon xan a mbooƴong, a ndamtin ee: ‹Taa o ƴiƴ ole ten?›

⁸ A koom, xam sooƴin o and no jegu yiif we Edoom fop, fi boo o leng oxaa ƴiƴna jegkatee na xa coong axe Esawu. Mi o Yaal oxe layun.

⁹ Wo Temaan o mat, xir say we wo xan a njaq, we ngenna na xa coong axe Esawu fop a mbarel.»

Ke garna fa sabab feene

¹⁰ «Nuun xa taan axe Esawu, xan nu sed ɓot, too xan nu moocandel boo kili yaam ne nu mbariƴna fo xa taan axe Yakoob we fog nuun.

¹¹ Nu maad’a a koom alaa wiin jan a ndokna na xa ton-maax axe Yeerusaleem, a nqaajir we ngenna teen na pexey mbanjang ne, a ƥis a den gilaa saax took o hup doole, too nu mbog’a teen sax, nuun itam.

¹² Wo xeet fee Edoom, ba o sawar no njom ne no fog of, felakinoox ye fa yaq fee no Yuuyudaa we, xaadnoox a den, yaa da njegna naqad!

¹³ War’iro rok na teeru fee na xeet es, ye fo njakad onqe ten. War’iro sawar na taamaala fee ten, too war’iro rok na halal um, ye fo njakad onqe ten.

¹⁴ War’iro ɗegooxaa no ƭat-sal ke, war we na ƈufaa, too war’iro ɓoxot o pañ oxe we ƥostooxna ye fa naqad fee.»

Ñaal ne no Yaal oxe

¹⁵ Ñaal ne o Yaal oxe a hate’kaa qeet ke fop a matiida. A koom, xan o fi’el leng kut ke fi’oona lakas we, nomtel paaxeer ke fi’oona.

¹⁶ O Yaal oxe kaa tee: «Nuun wiin we Yudaa, feek nu yera a sak ale no fuux le mi took o joong o tedu le mi, qeet lakas ke itam xan a yer teen too tumitkee. Kaam ee xan a yerin boo a ƥuus nqiim ke, cinj kaaga xan a sooƴ boo wee ndax mosee ndef.

¹⁷ Kaa koy, xan a jeg waa ndaɗna took o joong ole Siyoŋ na tedkataa. Xa taan axe Yakoob xan a njangatin lanq ke den njaɓ’eena.

¹⁸ Xa taan axe Yakoob xan a ndef nen fiɗel, axe Yoseef a ndef nen ƈulfaan, soo axe Esawu mat a ndef nen daaƭ laa da ndaaɓkaa, a sooynin, too jegkee oxaa filna na den. Mi o Yaal oxe layun.»

¹⁹ Yuuyudaa we no ɓemb-roog o ñamaak xan a njang xa coong axe Esawu, we no saax le na yulanq ake no mudand ne a njang saax le no Fiifilista we. Xan a njang o fiisel ole Efrayim fo ole Samari, Beebensame we mat a njang a Galaad.

²⁰ Ii-isra’el we ƥiseena gilaa saax took o hup doole xan a ndefat a yaj no xiixire maak, a njangit no saax le no Kaakanaan we boo Sarepta. We ƥisteena Yeerusaleem, ndefatna Sefarad, xan a njang teeru ke no ɓemb-roog o ñamaak ole Yudaa.

²¹ Waawat weene xan a ŋaay took o joong ole Siyoŋ, a ngame took xa coong axe Esawu, too o Yaal oxe na refkaa o maad den.