2 Timote 4 - NQAARIIT NE ROOG

¹ Mexe maƭooxang mbaambir Roog fa Kiristaa Yeesu fee warna o hate ñoow we fo xon we, maƭooxang itam took a kar um fo maat um ee:

² Waare’i fa lay fee, damoox teen, too xiisnan no daaw mbaat no ñak o daaw. Lalti a ƭat, xasan we ndeefeeruuna, we na ndeefan o umbaa fiɗel a pi den. Keene fop, fi’teen o muñ, yoonandtin a cangin.

³ Xan a jeg jamaane faa a ƭat no wiin we a yongkateerna na cangin a ñoow ale. Yaam ne a yuxum den a adinkaa a den, da saakaa pel, a mbaaƭaa jaajangin fagkatar waa na mbugko layanaa a den ke nof den a ndiiraa.

⁴ Mbugkatee o nan ndigil ne, a refangeerna a ndeefan cegeer ke na mbetandooxeel.

⁵ Wo o mat, fat o fod no kuu refna, fañ o hupal, jaɓ o coono. Fi’i ke o baawaare Yegil mbaax ne a warna o fi, calel of, o fadnitin ne ta waritna.

⁶ Mi o mat, andaam ee mbaal ndurane sadax refum, too hap es a fadiida.

⁷ Maafreem njom mbaax, fagiɗ o sep ole, too ɗapiim o ngim onqe.

⁸ Andaam ee o ndip onqe jofu we a cooxeel, oxe cungaxam. O Yaal oxe refna o Kaahate cofu xe xan a cooxaam o ten na bes faa ta nomtooxiidkaa. Refee koy ee mi soom a cooxkan, ndaa fop we na tayaa a nomtooxiid ale ten.

Ke Pool a falakitna

⁹ Fat o ɗeetiidaam, nuu ta waagna waag o ñofit.

¹⁰ Demas kaa xaƴaam, a ret Tesalonik, yaam tig adna a moƴanin. Keresaas a ret Galati, Tiit a ret Dalmati.

¹¹ Lik soom yoqu fa mi. Boo o garaa, fat o yooniid fa Mark, yaam a jega na mi o njiriiñ no calel ke.

¹² Tisik o mat, kaam lulin Efees.

¹³ Ngela boo o garaa, o ɓislooxiidaam sabadoor naa xaƴuuma Torowaas no mbind Karpis, ɓisiidaam a safe kaa itam. Ake moƴuuma o soxla koy, ndefu a safe ke mbi’teena ƭool.

¹⁴ Aleksaandar o paal o tafax oxe a fi’axam ƭomu, ndaa xan o Yaal oxe a rabdin a pi um.

¹⁵ Wo itam, fat o wootooxin yaam bugee o nan tus no ke i njangnaa.

¹⁶ Ye refuuma no nqeloor, o leng fartiraam, fop kaa nqaƴaam, ndaa koy yaasam o Yaal oxe a waasan a den.

¹⁷ O Yaal oxe rek fartaxam, a dif’aam, a muclaam no njogoy ne, ndax waare fee a fadnoorit na mi, we ndefeerna Yaawuur fop a nanin.

¹⁸ Xan o Yaal oxe a muclaam no pariƴ kuu ndefna, a muclaam ndax um rok no Maat um naa na asamaan. Yaasam ta ɓoxotel o ndam bo na moos boo moos. Amiini.

We Pool a simnaa

¹⁹ Simnanaam a Piriska fa Akilaas fo mbind Onesifoor.

²⁰ Eraste o mat oxaa Korint, um waas a Torofim Milet fo jir.

²¹ Ke moƴ’ina koy, o gar boo ƈiid ne a helko fo rokaa. Meeke koy, Ebuliisiin, Pidenseyiin, Liinisiin, Kolodiyayiin fo fog gimu we fop owe simnang.

²² Yaasam o Yaal oxe a ref fo yiif of! Yaasam yirmande um a ref fa nuun!