2 Timote 2 - NQAARIIT NE ROOG

Fapooxi!

¹ Wo o mat o ƥees, fapoori yirmande fee refna na Kiristaa Yeesu.

² Ke nantoona na mi mbaambir seede mayu, doxneen wiin gore’u waa na mbaagkan o njangin lakas.

³ Jaɓi o coono fa mi nen o qiixire o paax Kiristaa Yeesu.

⁴ O qiixire koy, naagee o gaɗaa yiif um no tig adna, yaa ta bugna o fel oxe adooxanuuna,

⁵ too mbir a maaf maaf, waagee o jang a laay, yaa ta maafritaandeena ne waritna.

⁶ O qooxoox oxe na ɓaarooxaa waru eet o ñaƭoox duufe um.

⁷ Dapatini keene a paax no yiif of. Xan o Yaal oxe a ci’ong o and no kuu refna.

⁸ Ba o weec muk a Yeesu Kiristaa, fogna no kurcala Dawid, a xontoox a ndeer no xon we, ne Yegil mbaax ne um waare’aa a laytuuna.

⁹ Yegil mbaax neene taxu um coono’aa boo jengel neeke nen a saasaay. Kaa koy fa lay fee Roog jengaand.

¹⁰ Jaɓaam o gadoox fop yaam we njileena, ndax den oo, da mbaag o ndaaw a muc ale refna na Kiristaa Yeesu, a tapit o ndam onqe na refkaa boo faw.

¹¹ Fa lay feeke, fa lay fa saƭku yoo: A soƥangaa yee i nqona fo ten, xan i ñoowatin fo ten,

¹² i nqijangaa fo ten, xan i maadook fo ten. I layangaa yee i mosiran o and, too andin, xan a xañ ee andee a in itam.

¹³ I ngayangee ngor in, xan a gayan, yaam waagee o xañ a xoox um.

O caajal o nandu ne Roog a bugna

¹⁴ Wetandi keeke we o jangnaa, maƭoox a den mbaambir Roog, da mbaas xa ƭelem axe da ndapatinaa no ñimatir ke den. Keene ɗaxee dara, a refangee a mo’andaa we na nan-gilooxaa.

¹⁵ Ɗofti boo baa a pi of a ndef gaci mbaambir Roog. Fat o ref mbaambir um o caajal oxaa na jootandaa fa lay fa ndiindigil fee kam o cofel.

¹⁶ Wootooxi fa lay fa ngoɓong faa guutatirna fo o ngim onqe. We ngentuuna, kaa moƴkaa o ngoƭaa a Roog rek.

¹⁷ Fa lay den kaa yaqaa fop nen ngal. No wiin weene o mat, Himene fa Filet a mbogu.

¹⁸ Kaa mbes ndigil ne a cinj, a layaa yee a qontax ale a jega boo a ƴut, a maafaa o ngim onqe no leng we.

¹⁹ Kaa koy, ke Roog a geeninna waagee o yen, yaam kaa siptin fa lay um feeke: «O Yaal oxe a anda wiin um» fo «Oxuu na ne’aa gon le no Yaal oxe, fat a fes paaxeer a cinj.»

²⁰ Mbind maak naagee o jegaa ƥaxañ pi’te wurus fo xaaliis soom. A naaga o jegaa itam axaa maxeena fo axaa sexeena. Ƥaxañ eetaand ke koy na suteel na bes fa maak, lakas ke a njalteel cegee xoox.

²¹ Yaaga koy, boo o kiin a riƈatuna nqoolaƭar nuu refna, xan a nand fo ƥaxañ ke na suteel na bes fa maak, a kesel, a jeg o njiriiñ no yaal um, a waagel o fi’it kuu faaxna.

²² Yufi a yuxum ake ndeƥandoong a ɓekaa o kiin, waaƭ o cofel fo o ngim fo o mbeq fo jam, wo fo we na ne’aa gon no Yaal oxe fo xeeñ xoolu.

²³ Kuuci ñimatir ƭooɗofir ke njegeerna o njiriiñ, and ee den na ƥisiidaa nqasir.

²⁴ O tag no Yaal oxe waraand o xasraa. Kaa war o jamsa’ooraa kañ fo fop, a waag a cangin, a ref o kiin o muñu.

²⁵ We ta fiŋqooraa, kaa war o lalaa a den a ƭat fo o muñ o maak, too a yaakaar ee xan Roog a fi da ƥek a yiif den na adna, a andnoor a den ndigil ne.

²⁶ A ƥekangaa a yiif den na adna, xan a ndaɗ pog ke saytaane fee ɓek’ina a den no ke ta bugna.