2 Tesalonik 3 - NQAARIIT NE ROOG

A saƭakin na qeƭ fo no calel

¹ Fog we, nqeɗyo ndax fa lay fee no Yaal oxe a ñof o jof mbaambir, a niwel ne nu niwtuuna.

² Nqeɗyo itam, ndax i ndaɗ wiin soxodu we fo faaxeer we, yaam kaa refee yee fop njegu o ngim onqe.

³ O Yaal oxe gore’na, xan a saƭkand a nuun, soo a saytoox a nuun no paaxeer oxe.

⁴ In o mat, i njega na nuun a koolax no Yaal oxe yee kaa nu mbi’aa ke i ngebilna a nuun, too xan nu suur teen.

⁵ Yaasam o Yaal oxe a ɗox a qeeñ nuun, nu mbex a Roog, too njeg o muñ ole na inooraa na Kiristaa.

Kaa farna no tayil

⁶ Fog we, kaa i ngeblaa a nuun no gon no Yaal in Yeesu Kiristaa nu ngoƭatir fo o pog oxuu feeñaakna, too o ñoowooƭ um a guutatir fo ole nu njangitna na in.

⁷ Nu andooda a paax ne nu mbarna o laaltaa a in: I ñoowee no mbeeñaak leng a paam nuun.

⁸ I sadaxnooxee o leng ke i ñoowtoogna, ndaa in we ndaawtoogaan no coono fo no xij, ta ref ñaal mbaat o yeng kaa i njaloogu, ndax i ƥarooxkee o leng na nuun a ñaam.

⁹ Kaa warna o jeg na in oo kañ, ndaa nu nga’angaa i mbi’iran kaa i mbug o ndef o ɗeendoor nuun.

¹⁰ Refee yaaga i ndefna a paam nuun i coox’u a nuun wareef feeke yee: Oxuu jaɓeerna calel, deyaand o coox a ñaam.

¹¹ Me ta refna koy, in we nanaa yee a jega na nuun waa mbeeñaakna, a ndokaa no kaa a ƭat den a yongeerna, a mbañ o njalik.

¹² Wiin weene koy, in we ngeblaa a den no gon no Yaal oxe Yeesu Kiristaa, too saƭakinaa a den, da ndet a njalik ne waritna, too a ñoowtik jale den.

¹³ Nuun o mat fog we, ba nu lay muk ee: «I nqija no paax ke i mbi’aa.»

¹⁴ O kiin oxuu andoona koy ee reefee a ƭelem ake i layna kam o leetar olene, fat nu ngorooxin, mbañ o njeg fo ten nga’ir leng, ndax ta sed.

¹⁵ Kaa koy, ba nu ƥek mbañir a ndeer nuun fo ten, ndaa njangatineeno nen o pog nuun sax.

Simin ne

¹⁶ Yaasam o Yaal oxe saqna jam, a ci’oodaa a nuun jam kili fo no nuu ta waagna waag o refit. Kaam ee yaasam o Yaal oxe a ref fa nuun.

¹⁷ Simin ne, no ɓay es a inooru, mi Pool. Neene o mat um bindtaa sax no leetar oluu refna yee a pind es oo.

¹⁸ Yaasam yirmande fee no Yaal in Yeesu Kiristaa a ref fa nuun, nuun fop.