2 Sami’el 5 - NQAARIIT NE ROOG

Dawid a dode o maad Isra’el

¹ A carind ake Isra’el fop a ngara, a soƥiid a Dawid Hebron, a layin ee: «Fo’oy fo leng kut ole na ƴufaa ƴuf no cer of na ƴufaa no cer in itam.

² Yaaga Sawul a refaa o maad in, wo adooxanoogu xiixire we Isra’el, too o Yaal oxe a lay’aang yaaga yee: ‹Wo na gaykaa a Isra’el, kelfa’in.› »

³ Neene maak we Isra’el fop a ngartu Hebron maa no maad oxaa, soo o maad Dawid a hiɓoor fa den maaga mbaambir no Yaal oxe. Cinj kaaga, a ndoda a Dawid o maad Isra’el.

⁴ Dawid a jeg’a xa kiid qarɓeen tadik, ye ta sogna o refaa o maad, soo a maadoox xa kiid qarɓeen nahik.

⁵ Kam Hebron a maadooxana a Yudaa xa kiid ɓetaa ƭaq fo a qool ɓetaa fo leng, soo kam Yeerusaleem ta maadooxan a Isra’el fop fa Yudaa xa kiid qarɓeen tadik fo xa tadaq.

Dawid a jaɓa a Yeerusaleem

⁶ O maad oxe fo yoon um a njagna Yeerusaleem, ndax da songik Yeeyebus we ngen’ina maaga. Yeeyebus we kaa mboog’u yee Dawid waagkee o rok na teeru fee boo a tax da laykin ee: «Rokiidkiro mene muk, yaam fuul we fo xa lafañ axe sax xan a ndaxong o nomtoox.»

⁷ Pañtee koy Dawid a jaɓa saŋe naa Siyoŋ ne’’ateena a Ƥak ale Dawid.

⁸ A koom, Dawid a laya yee: «Oxuu bugna o xaw Yeeyebus we, fat a reef na ƥaaxaand ale refna kam lanq ke, ndax ta daaw lafañ weene fo fuul weene ndefna fañ es.» Ten taxu ta layeel ee: «Fuul we fo xa lafañ axe ndokkee no Mbind ne no Yaal oxe.»

⁹ Dawid a dala no saŋe naa soo a ne’in a Ƥak ale Dawid. Cinj kaaga, a maxa me widuuna bo ta xet, a xotit Milo boo a gar kam fee.

¹⁰ Neene boog, Dawid kaa moƴ’u o jegaa doole, yaam Roog o Yaal oxe Hupna fop kaa reeƭu fo ten.

¹¹ Hiiram fee o maad Tiir a lula wiin maa Dawid, da ƥisin a teex ndaxar seedar, a lultin itam daadaaƴ fo waa na sexaa a ƥil, too weene a njalanaan mbind no maad.

¹² Dawid a and’a yee o Yaal oxe fa xoox um sax dalin’un o maad Isra’el soo a fi ta maadooxaa fo o ndam yaam Isra’el fee xeet um.

Xa ƥiy axe Dawid ndimteena Yeerusaleem

¹³ Yaa Dawid a inoorna Hebron, a gar Yeerusaleem, a waaƭahina maaga keƈ-a-salma, a gilgit maaga rew, a jeg fa den xa ƥiy xa koor fo xa tew.

¹⁴ Keeke ndefu a kon ake na xa ƥiy xa koor axe Dawid ndimteena Yeerusaleem: Samuwa, Sobab, Natan, Salomo,

¹⁵ Ibhar, Elisuwa, Nefeg, Yafiya,

¹⁶ Elisama, Elyada fa Elifelet.

A qaw ake Dawid a xawna Fiifilista we

¹⁷ Ye Fiifilista we a yegna yee Dawid a dode o maad Isra’el, den fop a ndalfooxa o ndet, a songkin. Dawid a yega kaaga soo a ƴuf no laqooxand olaa na xa coong axe.

¹⁸ Fiifilista we a ngara boo na yulanq alaa no Reerefa we soo a pictoor maaga.

¹⁹ Dawid a laamta o Yaal oxe yee: «Ndax waraam o songik Fiifilista we? Ndax xan o ɓoxot a den na xa ƥay es?» O Yaal oxe a doonaan ee: «Reti, yaam xam ɓoxot a den na xa ƥay of.»

²⁰ Dawid a gara Baal-Perasiim, a xawit maaga Fiifilista we, cinj kaaga ta lay ee: «O Yaal oxe a wetanaxam o gom a ndeer no fañ we mi ndefna mbaambir es nen o quuy olaa foofi a fi’na.» Ten taxu o mbiñ onqaaga a ne’el Baal-Perasiim.

²¹ Ye Fiifilista we a ƈufaa, kaa nqaƴ’u maaga pangool ke den, soo Dawid fo yoon um a ƥis a den.

²² Fiifilista we a songiidahina soo a pictoor na yulanq alaa no Reerefa waa.

²³ Dawid a laamta o Yaal oxe, soo ta layin ee: «Ba o xetik fa den, ndaa laqtooxi den a cinj, garit me jasnoorna fo kaan ke.

²⁴ Boo nanoona fangax a caf na xa cul axe no kaan ke, fat o ñof o song a den, yaam na waxtu faaga, mi o Yaal oxe, xam ñaaƴ mbaambir of, ndax um xaw saŋe ne no Fiifilista we.»

²⁵ Dawid a fi’a ke o Yaal oxe a hebil’uuna. Neene, a xawa Fiifilista we soo a daabit a den Geba boo no ndokand naa Geseer.