2 Sami’el 22 - NQAARIIT NE ROOG

Dawid a gidma a Roog a cinj o ndam onqe

¹ Dawid a xaanana o Yaal oxe a kim aleeke, ye ta mucluuna no fañ we ten fop fo no ɓay Sawul.

² A laya yee: O Yaal oxe, wo refu ɓil es, saŋe es fo o baawat es.

³ Wo refu Roog es, o joong ole um jaɓnooxaa. Wo refu pegoor es, o Muumucil es o mayu katil, ndaɗand mbooru es fo laqooxand es. Wo refu o Muumucil es oxe na muclaxam no wiin fo’oy we.

⁴ Tedaanga a hela o Yaal oxe! Kaam ƴufginooxan, soo ta muclaam no fañ es.

⁵ A yag-ee-yag ake na fa nqon fee kaa ndeer’aam, soo a qayaandiin a yaayaq ake a ndiidlandaxam.

⁶ A ceng ake jaaniif kaa mbid’aam o kurul-keƥ, pog ke na fa nqon fee a mbodaam mbaambir.

⁷ Kam naqad es ƴufginoox’aam o Yaal oxe, xeɗ a Roog es. A nanta o ñuxur es no mbind um, too o wuuq es a nannooxa no nof um.

⁸ Maaga, lanq ke a ngiiƈ-ngiiƈna, a yo’noox, a per ake asamaan a send fa doole, da njayang-njayangin yaam fuux le no Yaal oxe.

⁹ Fo suun a sutoora no ñis um, fiɗel laa na raaɓaa a sutoor no don um, a yoon fo a kaagaañ a sumu jip.

¹⁰ A runga asamaan fee soo a fudooxiid, eel niifaaru a fodin yoora a caf um.

¹¹ A ŋaaya mbindel yeeyetax soo a yet, a feeñ took a nafir ake no nqeñ ne.

¹² Kaa huloox eel niɓaanu tit a muuroox o ƴufaag o ɓaal ɗok.

¹³ Na qoolaand ale adooxan’uuna, a kaagaañ fiɗel a kaƥtooga teen.

¹⁴ O Yaal oxe a ɗuuɗta na asamaan. Oxe Took-ee-took a fangna o ñuxur um.

¹⁵ A xaƴa a kas um soo a pasar fañ we, a hiiñ soo a firɓand a den.

¹⁶ Qooƭ ke na xa maag axe a nguyte, a per ake na adna fee a mbeeñ yaam a qufil ake no Yaal oxe fo a und ale no fuux le ten.

¹⁷ Maaga, a letnita o ɓay um na asamaan, a pokaam soo a suudtaam no poofi cegu doole ke.

¹⁸ A muclaxam no fañ es jegu doole we fo no we sibaxama too a ngupaam doole fuuf.

¹⁹ Kaa da song’aam a koom alaa fo taamaala fee mi, ndaa o Yaal oxe reeƭu ndamlooxand es.

²⁰ A gifaxam, a ɓisaam maa yaadoortuuma, a muclaam, yaam kaa fexaam.

²¹ O Yaal oxe kaa rabdaam o cofel es, a saɗgaam na pesoorooƭ es a paax.

²² Ɗapiim a ƭat no Yaal oxe, fesiim a Roog es a cinj.

²³ Kaam gayaa bargal ke ten fop soo reefaa kebil ke ten.

²⁴ Kaam ñak sik na kid um, wootooxaa o tooñ.

²⁵ Ten taxu o Yaal oxe a rabdaxam o cofel es, a saɗgaam na pesoorooƭ es a paax.

²⁶ O Yaal oxe, kaa o gore no xe gore’na too ŋañkiro oxe ñakna ŋañel.

²⁷ Kaa o faax no xe jegna xeeñ xoolu, soo fañraa fo xe moseerna kam.

²⁸ Wo na muclaa we neewandooxna soo fañraa fo we magnandooxna, ndax o maaf a den.

²⁹ O Yaal oxe, wo refu o lampa es, xooldandaa o niɓaan es.

³⁰ Roog es, fa wo waagaam o song a yaj no yaal ƥonax, no ndimle of waagaam o ñayoox saŋe.

³¹ A ƭat ale Roog kaa ñak sik, fa lay fee no Yaal oxe a woor. Kaa ref pegoor no fop we na njaɓnooxan.

³² An refu Roog boog, a refangee o Yaal oxe? An refu ɓil jaɓnooxand le, a refangee Roog in?

³³ Roog refu ndaɗand mbooru es soo a xalanaxam a ƭat es.

³⁴ Ten na saƭkandaa a caf es boo da nand fo ake no njaf ne, soo a geennaam naŋ no fo mbiñ fo ngoƭu took ne.

³⁵ Ten na aqataa xa ƥay es a ñoq, a dimle’axam um ɗaay a qali xanjar ale bo ta peŋ.

³⁶ O Yaal oxe, wo na cooxaxam pegoor ne na muclaxam, o paaxel of a yoɗaxam.

³⁷ Wo na ɗoxaa a taaraand es, ndax tolofkiim muk.

³⁸ Kaam daabaa fañ we mi, saŋik a den, too nomtooxiidkiim, a refangee kaam paang a den.

³⁹ Kaam xuufaa a den, duguñ a den, too inooxkatee. Owey ɗareet a lanq, um dakaa took den.

⁴⁰ Kaa o ci’axam doole fa ñoxorir, tuuƭaa fañ es na caf es.

⁴¹ Kaa o ɗiiraa fañ we mi mbaambir es, soo um saŋkaa we sibaxama.

⁴² Kaa ƭeet boo a nqij, ndaa o leng ƴufgee a den, da ƭeet farna fo Yaal oxe, ndaa doonee a den.

⁴³ Kaam duguñaa a den boo da nandat fo fo ut ole no lanq ke, mokand a den soo duut a den nen lopopooƈ le no ped ke.

⁴⁴ Kaa o muclaxam no ñimatir ke na xeet es, saytooxaxam, ndax o fi’aam kelfa no qeet lakas ke itam, too waa andeeruuma owe ndagooxaxam.

⁴⁵ Xa kataakoon axe kaa simataxam. Owaa nanaa paru na mi, a nananaam,

⁴⁶ a ñakaa njambaar soo a sendaa, yaa da sutooxaa toktal den.

⁴⁷ O Yaal oxe xe ñoowaa! Fat oxe refna ɓil es a simatel, Roog fee refna ɓil le na muc es a ɓoxotel o ndam!

⁴⁸ Ten refu Roog fee na rabdinooxanaxam, a ɓoxotaxam qeet ke.

⁴⁹ O Yaal oxe, wo na guutatirandaxam fo fañ es, fi boo um garit noon es took soo wataxam no kiin fo’oy oxe.

⁵⁰ Ten taxu kaam simatang ndeer qeet ke, xaanaa gon of, wo o Yaal oxe.

⁵¹ O Yaal oxe a ci’a o maad oxe ta jilna fo ndam fo mayu, a lalit o paaxel um no xe ta ɗuumna, na Dawid fo xa taan um boo kili.