2 Sami’el 20 - NQAARIIT NE ROOG

Seeba a siiknoora fa Dawid

¹ A jeg’a kam Gilgal o kiin o caree tus oxaa fog’ina na carind ale Bensame, a ne’el Seeba, a ref o ƥiy Bikri. A jibna a luuƥ, a falaloox ee: «I ndeeree dara fa Dawid, i mbogee tus fo o ƥiy onqe Isay! Nuun wiin we Isra’el, fat oxuu refna a nomtoox no mbind um.»

² Maaga, Ii-isra’el we a nqaƴa a Dawid soo a ndeef a Seeba fee o ƥiy Bikri. Wiin we Yudaa soom yoq’u fo o maad den, a yoontiid fo ten no xuluɓ olaa Yordaan boo Yeerusaleem.

³ Ye o maad oxe a fadiidna no mbind no maad ne ten Yeerusaleem, a xota keƈ-a-salma xarɓaxay ke ten ta xaƴ’ina maaga da topatooxaa mbind no maad ne, a ɓek a den no mbind leng naa na yetooxeel a paax. Ten saq’u o ñoow den, ndaa mos’atee o yoon fa den. No kaa xotitna maaga rew waaga kaa mbeg’el boo na fa nqon, a nandtataa ñaaw, ke o kor den a ñoowoogna fop oo.

Yowab a wara a Amasa

⁴ Cinj kaaga, o maad oxe a laya a Amasa yee: «Fokatanaam xiixire we Yudaa a ndeer mene fo ñaal tadik, gariid fa den meeke.»

⁵ Amasa a reta, a fokat xiixire we Yudaa, ndaa koy a jol’a waxtu fee o maad oxe a hapan’uuna.

⁶ Maaga, o maad oxe a laya a Abisay ee: «Ndiiki koy, xan Seeba fee o ƥiy Bikri a fi a in paaxeer kaa hupna ke Absalom a fi’na a in. Xoti xiixire we no maat ne boog, daab a Seeba, yaam ndik ta daaw teeru fa njegu saŋe soo a mo a kid in.»

⁷ Faan laa Yowab a adooxan’ina fo Keekeret we fo Peepelet we yetooxoogna o maad oxe fo xir say we a ndalfooxa o yoon fa Abisay, da inoor Yeerusaleem, a ndaab a Seeba fee o ƥiy Bikri.

⁸ Ye da ndefna paam ɓil maak laa refna Gibe’on, a nqeta fa Amasa. Yowab kaa rokoox’u tikoorik xire ke ten fo o kumnoor olaa saqna o xool fo laƥ um. Ye Yowab a ɓeraa garaa, laƥ ne a sama.

⁹ Yowab a laya a Amasa yee: «O pog es, nam fi’o?» Ye ta layaa keene, a dama o raatam ole Amasa fo o ɓay um o ñamaak, a fi nen oxaa buguuna o farakoox.

¹⁰ Amasa yeg’ee yee Yowab a saq’a laƥ no ɓay um o janoon. Yowab a diba a Amasa no fud boo laaw ke a ƥaxoox a lanq. Naaga, Amasa a xona, too Yowab soxla’’atee o ɓaatanin ndib lakas. Cinj kaaga, Yowab fo o maag um Abisay a ndakooxa o nqot a ƭat, a ndaabik a Seeba fee o ƥiy Bikri.

Muukandoong ne no siiknoor ne Seeba fa Dawid

¹¹ O leng no xiixire we Yowab a yoqa paam o dal ole Amasa, a falalooxaa yee: «Fat we mbarna fa Yowab too a mbog na Dawid a ndeef a Yowab.»

¹² Kaa koy, xiixire we fop kaa naang’u jing, yaam o dal ole Amasa siidoogna fo fo’oy kaa luuñoogu ndeer a ƭat ale. Ye o qiixire xe geenoox’ina paam o dal ole a ga’na yee fop kaa ngeenooxoogu, a ɗooqtaan na ƭat ale boo kam o qol ole, soo a deɓ took um sabadoor.

¹³ Ye ta fi’na keene rek, xiixire we a ndalfooxa o nqot a ƭat, a ndeefan a Yowab, ndax da ndaab a Seeba fee o ƥiy Bikri.

¹⁴ Seeba a xaaña a carind ake Isra’el fop soo a daawkaa teeru fee ne’eena Abel-Bet-Maaka, too Biibikri we fop a mbokatoora, a yoon fo ten boo kam teeru faa.

¹⁵ Yowab fo a yaj ale ten a ngara, a ƥiikil a Seeba na teeru feene. A mbi’a juum lanq boo ta matik cat ke no saŋe ne na teeru fee, cinj kaaga da ndef no ngasaa, ndax da njiƭit saŋe ne.

¹⁶ O tew o ƈiƴu a falaloorta na teeru faa yee: «Nan-gilooxyo, nan-gilooxyo! Layanaamoo a Yowab ta matiidaam mene boo um lay fo ten.»

¹⁷ Yowab a matiidaan, soo o tew oxaa a laamtin ee: «Wo refu Yowab?» A doonaan ee: «Ii, mi o mat oo.» O tew oxaa a layahinaan ee: «Nan-gilooxi boog ke um laykang, mi fee o ceefeer of.» Yowab a doonaan ee: «Mexey nan-gilooxang.»

¹⁸ Maaga, o tew oxaa a laya yee: «Yaa fa yaaga wiin we kaa layoogu yee: ‹Fat i laamtik na teeru faa Abel›, too neene a nqendandtoogu tige.

¹⁹ In kat, a ƥang in jam a lañu, too kaa i ndamoox na Isra’el, ndaa wo o mat kaa o waaƭaa maa moocandtoona teeru in fee refna nen yaay na Isra’el! Xar taxu boog o bug o yaq lam ne no Yaal oxe?»

²⁰ Yowab a doonaan ee: «Koo boo muk! Hebooxiim muk o yaq mbaat um bayit kuu ta waagna waag o ref.

²¹ Refee kaaga. Kaa jeg rek o mbindeef o leng kut na xa coong axaa Efrayim, a ne’el Seeba, a ref o ƥiy Bikri soo a siiknoor fo o maad Dawid. Ƥoxotaamoo o ten, ten doŋ, too yaaga xan i inoox mene.» O tew oxaa a doonaan ee: «A faaxa, xan i njolniidong xoox le ten no saŋe ne.»

²² O tew oxaa a reta a lay fa xeet faa fop fo o jeg-yiif, soo xoox le Seeba fee o ƥiy Bikri a ɗegel, a jolniidel a Yowab. Yowab a dalfooxa luuƥ, too ndak fo ndak xiixire waa a mbufooxa, a pictoor, oxuu refna a xaad no mbind um. Yowab o mat a nomtooxa Yeerusaleem maa no maad oxaa.

A kon ake no jaajal we Dawid

²³ Yowab adooxan’u xiixire we Isra’el fop, Benaya fee o ƥiy Yehoyada a adooxan Keekeret we fo Peepelet we yetooxoogna o maad oxe,

²⁴ Adoram a saq calel ke na serteel, Yosafat fee o ƥiy Ahilud a ref o keegeek cosaan,

²⁵ Sewa a ref o piibind oxe, Saadok fa Abiyataar a ndef saasadax we,

²⁶ soo Ira fee gen’ina Ya’iir a fog’a itam no kelfa ke Dawid.