2 Sami’el 2 - NQAARIIT NE ROOG

Na teeru faa Hebron Dawid a dode o maad Yudaa

¹ Cinj kaaga, Dawid a laamta o Yaal oxe yee: «Ndax bugaa um ret na teeru fa leng no teeru ke Yudaa?» O Yaal oxe a doonaan ee: «Reti!» Dawid a ɓaataan o laamit ee: «Na teeru fum um retkaa?» O Yaal oxe a doonaan ee: «Na teeru faa Hebron.»

² Dawid a reta maaga boog, a yoon fo rew ɗik we ten ndeeƭna Ahinowam fee Yisre’el fa Abigayil fee ñaawooxoogna a Nabal fee gen’ina Karmel.

³ Dawid a ɓisloox’a itam yoon um waa oxuu refna na den a yoonitna ƥasil um, da ndal Hebron fo no teeru ke mbiduuna.

⁴ Maaga, wiin we Yudaa a ngara Hebron, a ƭuum a Dawid o maad a carind ale Yudaa. Ye Dawid a yegneena yee wiin we ngenna Yabes no saax laa Galaad ngas’u a Sawul,

⁵ a lulta maaga, ndax ta layanel a den ee: «Yaasam o Yaal oxe a barke a nuun, yaam ne nu lalna a Sawul fee o yaal nuun o paaxel nuun, ngasin.

⁶ Yaasam o paaxel ole fo ngor ne no Yaal oxe a ref fa nuun! Mi itam, xam fi’an a nuun paax, yaam ne nu mbesoorna neene.

⁷ Ndiiki koy, saƭakinooxyo too saq njambaar. Ii, o yaal nuun Sawul a xona, ndaa mi a carind ale Yudaa a njilu, ndax um maadooxan a den.»

Isbaal a dalne o maad Isra’el

⁸ Abineer fee o ƥiy Neer, reeƭna farɓa fa maak fee Sawul, a janga a Isbaal fee o ƥiy Sawul, a ɓisin Mahanayim.

⁹ A dalnaan o maad Galaad fa Aseer fa Yisre’el fa Efrayim fa Bensame, Isra’el fop daal.

¹⁰ Ye Isbaal a dalneel o maad Isra’el, a soƥ’a ta jeg xa kiid qarɓeen nahik too a maadoox’a xa kiid xa ƭaq. A carind ale Yudaa soom yoon’u fa Dawid.

¹¹ Dawid a maadooxana a carind ale Yudaa kam Hebron boo xa kiid ɓetaa ƭaq fo a qool ɓetaa fo leng.

A ñoq ale ndeer Yudaa fa Isra’el kam Gibe’on

¹² Abineer fee o ƥiy Neer fo xiixire we Isbaal fee o ƥiy Sawul a inoora Mahanayim, a njagin Gibe’on.

¹³ Yowab fee o ƥiy no tew o ne’e Seruya fo xiixire we Dawid a njanga a ƭat den itam. A yaj akeene a nqeta paam Mbalka naa Gibe’on, leng we a ndef no saax o leng ole, lakas we a ndef no saax o lakas ole.

¹⁴ Abineer a dekra fa Yowab ee: «Fat xa pes a inoox, a ñoxor mbaambir in!» Yowab a doonaan ee: «Jaɓaam!»

¹⁵ Mbes ke a ƥeriida, soo xarɓaxay fo ɗik a njilel na carind ale Bensame, a ndefan a Isbaal fee o ƥiy Sawul, xarɓaxay fo ɗik a njilel itam no xiixire we Dawid.

¹⁶ Oxuu refna no xiixire weene a dama o kend um no xoox, a dibin laƥ no saax, too a nqonandoora den fop. O mbiñ onqaaga refna na Gibe’on a ne’e Helkat-Hacuriim.

¹⁷ No ñaal naaga, a ñoq alaa a ɗom’a lool, too xiixire we Dawid a nqawa a Abineer fo goor we Isra’el.

¹⁸ Xa ƥiy xa tadaq axe Seruya ndefna Yowab fa Abisay fa Asa’el a ndeeƭa maaga. Asa’el koy fee fel’ina o jaf nen mbat

¹⁹ a refa no daabaa a Abineer rek, a fañ o ɗap na ñamaak mbaat na janoon.

²⁰ Abineer a wiƈaqilooxa, a laamtin ee: «Ndax keene Asa’el oo?», ta doonin ee: «Mi o mat oo de!»

²¹ Abineer a layaan ee: «Daabi o lakas na ñamaak mbaat na janoon. Fexeyi daaw o leng no ngoor ke, jang ke ta saqna.» Asa’el o mat a refa no daaban rek, a fañ o waas.

²² Abineer a layahinaan ee: «Asa’el, ba o daabaam fe! Xar taxu o qicooxaa um warong? Um warangaang, nam um waagkataa o jasnoorit fa Yowab fee o maag of.»

²³ Ne Asa’el a fañ’uuna o waas, Abineer a dibaan ɗuk le na salma le ten no fud boo ta sutoor no ndiiñ ne. Asa’el a yena, a xon ndak fo ndak. Fop we mbadiid’ina me Asa’el a xonna, a ngeenooxa maaga.

²⁴ Yowab fa Abisay a ndalfooxa o ndaab a Abineer. Ye njeeƈ ne a mudkaa, yaaga da mbadiidaa no ñaang laa Ama refna no batand naa na saate faa Giya, na ƭat alaa inoorna Gibe’on, a jagin na koƥ-a-ƥor alaa.

²⁵ Xiixire we na carind ale Bensame fop a mbokatoora a cinj Abineer, a mbi a yaj a leng, a ngeenoox took ñaang.

²⁶ Abineer a falalooxa a Yowab ee: «Ndax laƥ ke kaa mbugko saŋkaa a taar o marin? Ndi kaa andiro yee kene naqad rek a muukoorkaa? Kaam ee ndi xar o cungaa, ñak o hebil xiixire we wo da mbaas fog we den da ndaabaa?»

²⁷ Yowab a doonaan ee: «Ne ta wooritna yee Roog oxe ñoowaa, neene a woortu yee boo lay’eeroona, o feet nqes doŋ taxkoogu ngoor ke a nqaƴ a taab ale da ndaabaa fog we den.»

²⁸ Yowab a dalfooxa o luuƥ, xiixire we ten fop a ngeenoox, a mbaas Ii-isra’el we da ndaaboogna, soo a ñoq alaa a fagit maaga.

²⁹ Abineer fo xiixire um a ñaaƴa no yeng olaaga fop na xa saawit axaa Yordaan, a nqaañ o maag o maas olaa, a nqot a qufid alaa na xoyeel Bitron soo a mbadiid Mahanayim.

³⁰ Ye Yowab a xaƴna a taab ale ta daaboogna a Abineer, a fokata goor we ten fop. No xiixire we Dawid xarɓaxay fo ɓetuu nahuk doŋ yoq’u a koƥ, waasna a Asa’el.

³¹ Xiixire we Dawid koy, a mbar’a goor teemeed tadik fo qarɓeen ɓetuu fa leng no Beebensame we fo goor lakas we ndeeƭna fa Abineer.

³² Yowab fo goor we ten a ƥislooxa o dal ole Asa’el, a ngasin kam a mboy alaa faap um refna Betleheem. Cinj kaaga, a ñaaƴa o yeng ole fop soo a mbadiid Hebron, ye njeeƈ ne a wataa.