2 Sami’el 19 - NQAARIIT NE ROOG

Naqad fee Dawid

¹ Maaga, o maad oxe a dalfooxa o gooy. A ŋaaya na ndok-took alaa yoorooxna o don-maax ole na teeru fee, a ref no loolaa. Ke ta ñaaƴaa fop oo kaa faɗooxoogu yee: «Ey, o ƥees Absalom, o ƥees, o ƥees, ey Absalom fee mi! Xar taxu xoniim na seek of? Ey, Absalom o ƥees, o ƥees!»

² Yowab a yegne yee: «O maad oxe kaa loolaa, a ɗomatooxaa a Absalom.»

³ O ndam onqe no ñaal naaga a ref’ata ɗom no xiixire waa fop, yaam den fa qoox den a yeg’a ne o maad oxe a naqadilooxit’ina no ƥeem.

⁴ No ñaal leng kut naaga, xiixire we kaa ñof’u o ƥeedaa, a nqaadaa na teeru faa nen xiixire waa ƈuftiidna na ñoq, a may fa gaci.

⁵ O maad oxe kaa muuroox’u, a ref no faɗooxaa yee: «Ey, o ƥees Absalom, Absalom o ƥees, o ƥees!»

⁶ Maaga, Yowab a soƥiidaan na ndok ale, a layin ee: «Xaye kaa o gaci’noor dag we wo fop mucloonga, ke da mucloonga fop oo, a mucil xa ƥiy xa koor axe wo fo xa ƥiy xa tew axe wo fo rew we wo fo keƈ-a-salma ke wo.

⁷ Kaa o bug we mbañoonga soo fañ we mbugoonga, yaam xaye laltaa yee aa-adax we no xiixire we wo fo we na ndagooxang a paax ndefee tus na wo. Andaam ee Absalom a ñoow’angaa, soo i nqon in fop xaye, ga’itkoogaano naa faaxna.

⁸ Ndiiki boog, saƭakinooxi ret jook xiixire we wo a njal. Mexe daaɓooxaa no Yaal oxe yee o retangee, o leng na den fe’kee meen, too yaaga ta ref naqad faa moƴna o magin no naqad ke ndaloonga no kaa xotitna no ndeƥandoong of boo ndiiki.»

⁹ Maaga, o maad oxe a reta, a moof no don-maax ole na teeru fee. Xiixire waa fop a yegne o ten, soo a ngar, a mbokatoor paam um. Xiixire we Absalom o mat kaa ƈuf’u, a nqaad, oxuu refna no mbind um.

Dawid a laamte, ndax ta gat Yeerusaleem

¹⁰ Kam a carind ake Isra’el fop, wiin we kaa ñimatiroogu, a layaa yee: «O maad Dawid o mat watu a in na xa ƥay no fañ we in, moƴtaa sax Fiifilista we, ndaa ndiiki a raaya yaam Absalom.

¹¹ Absalom fee i ndod’ina, ndax ta maadooxan a in koy, a xona na ñoq alaa. Yaaga boog, xar nu cungaa, ñak o nomtiid o maad Dawid?»

¹² Dawid fa xoox um a lulta maa Saadok fa Abiyataar we ndeeƭna saasadax ee: «Laamtanaamoo maak we Yudaa yee: ‹Xar taxu nu ndef we na mbalakkaa o nomtiidaa o maad oxe no mbind no maad ne ten? Yaag oo toox de, mi fa xoox es yegaam ke na layteel kam Isra’el fop.

¹³ Nuun ndefu we moƴna o mbog fa mi. Fo’oy fo leng kut ole na ƴufaa ƴuf no cer nuun na ƴufaa no cer es itam. Ba nu ndef boog we na mbalakkaxam o nomtiidaa.›

¹⁴ Amasa koy, fat nu layanaam o ten ee: ‹Ndax refiro o pog es ŋaƈit? Yaasam Roog a halakaam, yaa cooxeeroonga a seek ale Yowab, o refat farɓa fa maak fee mi no ñoow o ñis of fop!› »

¹⁵ Fa lay faaga na Dawid a duqa a qeeñ ake no wiin we Yudaa fop, too a mboga o ñuxur o leng kut, a lulit maa Dawid, a layin ee: «Nomtooxiidi meeke, wo fo dag of fop.»

¹⁶ Maaga, o maad oxe a xota a ƭat, a gataa boo neen a fadiidu na ƥeeraamb alaa no xuluɓ olaa Yordaan. Wiin we Yudaa kaa ngar’u Gilgal, a nqetooxiid o maad oxe, ndax da ndimle’in ta waag o joot o maag o maas olaa.

Dawid a wuusa a Simey

¹⁷ Simey fee o ƥiy Gera fogna na carind ale Bensame too a gen Bahurim a ñofa o yoon fa den, a xetooxiid o maad Dawid.

¹⁸ Simey kaa yoonit’u goor juni waa ngenna Bensame fa Siba fee jaloogna no mbind Sawul fo xa ƥiy xarɓaxay fo xa ƥiy xa ƥetaq axe ten fo dag qarɓeen ƭik we ten. A adooxiida o maad Dawid no xuluɓ olaa Yordaan.

¹⁹ A saxaar o maag ale warna o jootin ƥasil ne no maad oxe a xaañta o maag o maas olaa, ne o maad oxe a bugit’uuna. Ye o maad oxe a jootna o maag o maas olaa, Simey fee o ƥiy Gera a deɓooxa na caf um, a gung

²⁰ soo a layin ee: «Daali maad, koo ba o damtaam tooñ ne mi! Ba o wetandoox tooñ es ne a koom alaa o maad oxe o yaal es a sutooxna Yeerusaleem. Daali maad, ba o geekanaam kaaga muk no xeeñ of.

²¹ Xaye, mi fee o tag of, andaam xil ee bakaadaam, ndaa ga’aano, no kurcala le Yoseef fop mi eetu teen o gar xetooxiidong, wo o maad oxe o yaal es.»

²² Maaga, Abisay fee o ƥiy no tew o ne’e Seruya a laya yee: «Ndax tooñ neene a waaga o waasantel boo Simey xonkee, ten fee salooxna o maad oxe o Yaal oxe a ɗuumna?»

²³ Kaa koy, Dawid a doonaan ee: «Nuun xa ƥiy axe Seruya, xar i ndeeru boo nu njeemaa o njaxas a qalaat es! Ndax xan o kiin a warel kam Isra’el no ñaal ne xaye? Ndi boog kaa andiim ee mi refu o maad Isra’el xaye?»

²⁴ O maad oxe a laya a Simey ee: «Warkaandee.» A woornitaan o ten a taaƥ.

Dawid a jofooratina fa Mefibaal

²⁵ Mefibaal fee o ndaan Sawul a gara itam, a xetooxiid o maad oxe. No kaa xotitna no ñaal naa o maad oxe a sutooxna Yeerusaleem boo no ñaal naa ta nomtooxiidna na jam, Mefibaal ɓog’ee a caf um, ruus’ee o raatam um, too dap’ee toki um.

²⁶ Ye ta inoorna Yeerusaleem boo a fadiid me no maad oxe, oxeene a laamtaan ee: «Mefibaal, xar taxu yoon’iro fa mi?»

²⁷ A doonaan ee: «Daali maad, kaa ree o tag es naxaxam, yaam kaam lay’un ee: ‹Humnanaam o faam ole, ndax um ŋaay teen, yoon fo o maad oxe.› Feek a ñaaƈ ale mi felee.

²⁸ O tag es a gara, a maaɓanaam me wo. Kaa koy, daali maad kaa o nand nen a malaaka Roog. Fi’i boog ke xalaatoona yee a faaxa.

²⁹ Daali maad o yaal es, waag’aa o warnoor ƥasil ne maam-koor es fop, ndaa yaqanee o fokataam fo we na ndeeraa fa wo o roon. Jegiim boog ndigil leng naa waagna tax um xeɗahinong yirmande.»

³⁰ O maad oxe a layaan ee: «A deya. Ke um heblaa refu yee wo fa Siba fat nu nqaajir lanq ke Sawul.»

³¹ Mefibaal a doonaan ee: «Siba a waaga o jang fop sax, feek wo o maad oxe o yaal es gataa fa jam no mbind of.»

Dawid a saɗga a Barsilay

³² Barsilay fee Rogelim kam Galaad a gar’a no maag o maas olaa itam, ndax ta jootandoor fo o maad oxe, a weltiidin soo a asoorkaa fo ten na ƥeeraamb alaa.

³³ Barsilay kaa nogoy’u lool, a jeg xa kiid qarɓeen ɓetuu tadik. Ten saq’u ñoowir ke no maad oxe, ye oxeene a refna Mahanayim, yaam o yaal halal a reeƭu.

³⁴ O maad oxe a laya a Barsilay ee: «Gariidi, yoon fa mi Yeerusaleem, too xam saqong maaga.»

³⁵ Barsilay a doonaan ee: «Daali maad, xar yoqɗoorateem no ñoow es, boo a taxkaa um yoon fa wo Yeerusaleem?

³⁶ Me refuuma ndiiki, jegaam xa kiid qarɓeen ɓetuu tadik. Me refatuuma, waagatiim o jektirand ke faaxna fo ke faaxeerna too waagatiim o andid a safaand ale no ke um ñaamaa fo ke um yeraa mbaat um dam sax xa ñuxur axe no giigim we, goor fo rew. Yaaga boog, xar na taxkaa um ref na wo a toq?

³⁷ Mi fee o tag of, waagaaxoong o welit boo o jol o maag o maas ole o ndik rek, too sax kaa jariim a jar saɗig mbodu neene.

³⁸ Xaƴaam boog um nomtoox na teeru es, ndax um xonit paam a mboy alaa faap es fo alaa ya es. Daali maad o yaal es, Kimham fee o ƥees oxey. Fat a yoon fa wo, o fi no ten kuu jofooxoonga.»

³⁹ O maad oxe a layaan ee: «Yaaga boog, fat Kimham a yoon fa mi. Xam fi no ten ke bugoona too kuu xeɗaxamoona, xam ci’ong o ten.»

⁴⁰ Ye o maad oxe fo faan laa fop a nqaañna o maag o maas olaa boo a ƈut, Dawid a farakooxa a Barsilay soo a barke’in. Cinj kaaga, Barsilay a xaada no mbind um.

⁴¹ O maad oxe a suura Gilgal, too Kimham a yoona fo ten. Wiin we Yudaa fop fa genwal fee no Ii-isra’el we yoon’u fo o maad oxe a cinj ye ta jootna.

Nqasir ne a ndeer wiin we Yudaa fo we Isra’el

⁴² Wiin we Isra’el a matiida o maad oxe, a laamtin ee: «Xar taxu Yuuyudaa we fog in a mboot a njootnong o maag o maas ole, wo fo ƥasil of fo xiixire of fop?»

⁴³ Wiin we Yudaa a ndoona a den ee: «Ree kaa i moƴ o mbog a nuun fo o maad oxe! Xar taxu boog nu mbuux no kaa farna no keene? Ndax kaa i ngaɗ o ñoow in no maad oxe, ndi kaa i ndaawit no ten tig?»

⁴⁴ Ndak fo ndak, Ii-isra’el we a laya yee: «Mee ndax in ngupu a nuun doole no maad oxe a caf xarɓaxay. Ii, Dawid sax in ngupu a nuun doole no ten! Xar taxu boog nu nqeef a in? Yaag oo toox de, in eetu o lay ee: ‹Fat i nomtiid o maad oxe in!› » Kaa koy, o doonanqol ole no wiin we Yudaa a moƴa o ñexet ale no wiin we Isra’el.