2 Sami’el 17 - NQAARIIT NE ROOG

Husay a watna o as Ahitofel

¹ Ahitofel a laya a Absalom ee: «Xaƴaam um jil goor cuni xarɓaxay fo cuni ƭik soo daab a Dawid kam o yeng olene sax.

² Xam betin, a soƥkaa ta xij boo jegatee o ndoole. Xam firɓandin boo we yoonna fo ten fop a ƈuf, soo um war o maad oxe soom.

³ Cinj kaaga, xam ɓisiid xeet fee fop me wo, ne o jeeg a nomtoortiidaa no kor um. O ñis no kiin o leng soom soxla’o, too xan xeet fee fop a ndefat na jam.»

⁴ Fa lay faaga a fel’a a Absalom fo maak waa Isra’el fop.

⁵ Pañtee koy, Absalom a laya yee: «Fat Husay, o Aa-arki xe a xoyel itam boo i nan ke ta laykaa.»

⁶ Husay a gara me Absalom, soo oxeene a daawnin ke Ahitofel a lay’ina, a laamtin ee: «Ndax ke ta layna i mbaru o mbi, ndax nam? Layi a in a qalaat of.»

⁷ Husay a doona a Absalom ee: «No jaf leeke koy, o as ole Ahitofel a cooxitna ñaaƴee dara.

⁸ Andaa a faap of fo goor we ten a paax. Xir say a ndefu, too kaa mbuuxit nen ursu naa xa ƥeem a njangeena kam a koƥ ale. Kaa jolna keene sax, faap of fee refna o qiixire tigi fe’kee muk fo xiixire lakas we.

⁹ Andaam ee no gamb rek a ɗasu mbaat o mbiñ o lakas. Ndiiki koy, boo ta jegna no mberaandoong ne waa mbareena na in, yaaga xan fop a yeg ee we mbarna fa Absalom a nqawe.

¹⁰ Maaga, xan we moƴna o njambaar too a saq a qeeñ cogoy sax a saɗarat, yaam o mat Isra’el fop a anda yee faap of jambaar tigi yoo too a salma-koor a ƥor a yoontu.

¹¹ O as es refu boog o fokat xiixire we Isra’el boo Isra’el a xet, ke xottoonga Dan boo a damik Beer-Seeba, da mayit nen pep lanq na ƥeeraamb o maag, soo yoon fa den, wo fa xoox of, o ñoxorkel.

¹² Muu Dawid a waagna waag o rok oo, xan i ndaawin, yenit took um ne liim a yentaa a lanq, too jegkee na den o leng oxaa na daɗkaa, ten oo yoon um oo.

¹³ A laqooxangaa na teeru sax oo, Isra’el fop xan a ƥisaniid teeru faaga xa tiis, too xan i ƭooqin na yulanq ale boo yaa ɓil leng sax a yoqkateerna teen.»

¹⁴ Absalom fo goor we Isra’el fop a laya yee: «O as ole Husay, o Aa-arki xe moƴu ole Ahitofel.» O ga’angaa keene koy, o Yaal oxe kaa heboox’u o kasaara’in o as o faax ole Ahitofel, ndax ta doon a Absalom naqad.

Dawid a xaaña o xuluɓ olaa Yordaan

¹⁵ Husay a laya a Saadok fa Abiyataar we ndeeƭna saasadax xa as axe Ahitofel a coox’ina a Absalom fo maak we Isra’el fo ke ta as’ina a den ten fa xoox um.

¹⁶ A ɓaata teen ee: «Ndiiki koy, ñofyo o lulit maa no maad Dawid, yegnin ee baa ta fe no fo ndaatan naa no xuluɓ olaa Yordaan, ndaa nuu ta waagna waag o fi oo, fat a ñof o xaañin, ndax saŋiknoorkee a xoox um fo we ta yoonitna fop.»

¹⁷ Yoonatan fa Ahimaas na cur alaa Rogel a ndeeƭu. O ceefeer o leng yegniidoogu a den tuleer ke da mbar’ina o ndaawin o maad Dawid. Saɗ’ee o ndok na teeru faa, yaam ndik da nga’el.

¹⁸ A jeg’a koy o fes olaa ga’’ina a den, a ret a layin a Absalom. Maaga, den ɗik fop a ñofa o ndet soo a mbadiid no mbind no koor oxaa gen’ina Bahurim. A jeg’a no maax ole no koor oxeene a ngas, too a ndalfooxa o ndok taaga, a ƭas.

¹⁹ O tew oxe no koor oxeene a janga o sar, a muurtin a ngas ale soo a liil teen pep kaa soxeena, boo o leng waag’iran o andid.

²⁰ Dag we Absalom a ndoka no mbind naaga, a laamit o tew oxaa yee: «Taa Ahimaas fa Yoonatan?» O tew oxaa a doona a den ee: «A saga farna fo poofi kaa.» Waa lul’eena a mbaaƭa, ndaa nga’ee soo a nomtoox Yeerusaleem.

²¹ A cinj ye da ndetna, Ahimaas fa Yoonatan a sutooxiida a ngas ale, a ndet a layik o maad Dawid nduleer ne. A njangtooxaan xa as axe Ahitofel a cooxit’ina no kaa farna no ten, a layaan itam ta ñof o joot o maag o maas olaa.

²² Dawid fo yoon um fop a inooxa, a ndef no njootaa o xuluɓ olaa Yordaan. Ye Roog a feedkaa, a soƥ’a den fop da njoot boo o leng yoqatee.

²³ Ye Ahitofel a ga’na yee o as ole ten reefaand, a humna o faam um, a xaad na teeru fee ta gen’ina. A regdinooxa mbind um soo a xiroox. Neene a xontu, a gasel na mboy alaa faap um.

Dawid kam Mahanayim

²⁴ Dawid a fadiida Mahanayim, ye Absalom a xaañaa o maag o maas olaa, ten fo goor Ii-isra’el we fop ndeeƭna fo ten.

²⁵ Absalom a fi’’a a Amasa o aa-adax no xiixire we ten na seek ale Yowab a fod’ina. Amasa koy, kaa reeƭu o ƥiy no koor o Ii-isma’el oxaa ne’’eena Yitra. Ya Amasa Abigayil a ne’’e, a ref o ƥiy Naahas fo o ndeɓ Seruya fee ya Yowab.

²⁶ Absalom fo Ii-isra’el lakas we no saax laa Galaad a ndal’u, a sip maaga saŋe den.

²⁷ Ye Dawid a fadiidna Mahanayim, Sobi fee o ƥiy Naahas fee genna Raba fee refna teeru fa maak fee no Aa-amon we fa Makiir fee o ƥiy Ami’el fee genna Loo-Debar fa Barsilay fee genna Rogelim kam Galaad, a nqetooxiidaan.

²⁸ A ƥisiida a den bondooxel fo kulooxel fo xa ƥaxañ fa bele fa lorso fo mbiɗel fo pep kaa njuɗeena fo a ñaaw a pogreer

²⁹ fo suum fo xamb fo neew fo paal fo fo sal naak. Keene fop a ƥisiidaan a Dawid fo yoon um, yaam kaa nqalaatoogu yee weeke a mbara o lot na koƥ-a-ƥor ale yaam nqeex fo a koɗom.