2 Sami’el 16 - NQAARIIT NE ROOG

Dawid fa Siba

¹ Ye Dawid a jolaa o jul olaa no joong olaa, Siba fee o tag Mefibaal a xetiida fo ten. Kaa adin’u xa paam xa ƭaq axaa ndooneena qerxa too a sufel puuru teemeed ƭik fo tuunq teemeed xa biiñ xa beeru fo xa tim teemeed xa pooru fo mboxos biiñ.

² O maad oxe a laamta a Siba yee: «Xar bugo o fi fo kene?» Siba a doonaan ee: «Daali maad, xan ƥasil of a mbaag o ŋaayaa xa paam axe, puuru ke fo xa tim axe a ndef ñaamel no yoon of, soo biiñ fee a ref yerel no we na nqijkaa na koƥ-a-ƥor ale.»

³ Dawid a laamta yee: «Taa Mefibaal, o ndaan onqe no yaal of Sawul koy?» Siba a doonaan ee: «Yeerusaleem a yoqu, yaam kaa xalaat ee Ii-isra’el we xan a ƥoxotin ndiiki maat ne maam-koor um.»

⁴ O maad oxe a laya a Siba yee: «Fop ke Mefibaal a jegna, wo jegatun.» Siba a gunga a lanq, a lay ee: «Wo daali maad o yaal es, jook a njal, yaasam um daawaa yirmande of kili.»

Simey a salooxa a Dawid

⁵ Ye o maad Dawid a joonaa a Bahurim, o koor o ne’e Simey, a ref o ƥiy Gera too a fog na qaw ale Sawul a sutoora na saate faa, a ref no salooxaa a Dawid.

⁶ Ke xeet fee fo a salma-koor ake a ndeer’ina o maad Dawid fo dag um fop oo, wene na ñamaak, wene na janoon, yaqan’ee Simey a deɓaa a den a ƭak.

⁷ Simey kaa salooxoogun ee: «Aca de! Aca, o baawar o cegkee jam oxe!

⁸ Xaye o Yaal oxe kaa xawang yaam fo’oy le ɓaxoona no ƥasil ne Sawul. Kaa o guuɗ maat ne Sawul, ten taxu Roog a cooxaan a Absalom fee o ƥeef. Ndiiki koy, woxey na naqad, too a jaga fa wo, yaam kaa o ref o kiin fo’oy!»

⁹ Maaga, Abisay fee o ƥiy no tew o ne’e Seruya a laya o maad oxe yee: «Daali maad o yaal es, xar taxu o ɓox o xonu leeke a xaƴel a salooxang? Xaƴaam um ret, ɗeg xoox um.»

¹⁰ O maad oxe a doonaan ee: «Nuun xa ƥiy axe Seruya, xar i ndeeru? O kiin oxene a salooxangaam, xeƈa o Yaal oxe heblun o ten, too o leng boog waagiran o lay ee: ‹Xar taxu o fi keene?› »

¹¹ Dawid a ɓaata o lay a Abisay fo dag waa ten fop ee: «A soƥangaa yee o ƥees ŋaƈit na waaƭaa maa ta wartaxama, xar o Peebensame xene a cungu? Nqaƴeenoo ta salooxaam, yaam o Yaal oxe heblun o ten.

¹² Xeƈa xan o Yaal oxe a ga naqad es, soo a salax ake salooxeema xaye, ta supit a den barke.»

¹³ Ye Dawid fo yoon um fop a suuraa na ñaaƈ ale den, Simey a dendooga fa den, a reefan a pudnand ale no joong ole, a ref no salooxan, a deɓaa a den a ƭak soo a isdaa a den lanq.

¹⁴ O maad oxe fo waa yoon’ina fo ten fop a mbadtiida o lot no xuluɓ olaa Yordaan soo a ñootnoox maaga.

Husay a daba a Absalom

¹⁵ Absalom a rokiid’a Yeerusaleem, a yoon fo goor we Isra’el fop, too Ahitofel itam a reeƭa fo ten.

¹⁶ Ye Husay fee o Aa-arki xe refna xaariit Dawid a fadiidna me Absalom, a falalooxa yee: «Yaasam o maad oxe a ñoow, maat a malin!»

¹⁷ Absalom a layaan ee: «Mbaa ree kene refu ngor ne jegoona na xaariit of! Xar taxu yooniro fo ten?»

¹⁸ Husay a doonaan ee: «Yooniim fo ten, yaam kaam far fo o maad oxe o Yaal oxe fa xeet fene fo goor we Isra’el fop a njilna, too kaam bug o yoq fo ten!

¹⁹ Kaa jolna keene sax, an o lakas um jalankaa oxaa refeerna o ƥiy xaariit es? Ne jalantooguuma jalanit a faap of o mat, um jalanitkang.»

Absalom fo keƈ-a-salma ke Dawid

²⁰ Absalom a laya a Ahitofel ee: «Ndiiki koy, o as olum o cooxkaa a in no ke i mbarna o mbi?»

²¹ Ahitofel a doona a Absalom ee: «Reti wondook fo keƈ-a-salma ke faap of a xaƴna meen da topatooxaa mbind no maad ne. Neene, xan Isra’el fop a yeg ee ɗegooraa fa faap of o kay, too we ndefna fa wo fop xan a saqat njambaar ndeyu sik.»

²² A ndalfooxa o sipan a Absalom ƭiif no dung-took olaa, soo ta yoon maaga fo keƈ-a-salma ke faap um na kid Isra’el fop.

²³ Na jamaane faaga xa as axe Ahitofel a cooxtoogna kaa nan-giloortoogel nen fa lay fee Roog. Neene Dawid fa Absalom a nga’toogu itam xa as axe ta cooxoogna a den fop.