2 Sami’el 14 - NQAARIIT NE ROOG

Absalom a nomtooxiida Yeerusaleem

¹ Ye Yowab fee o ƥiy no tew o ne’e Seruya a andatna yee a yiif ake no maad oxe a nomtooxa na Absalom,

² a lulta Tekowa, ndax ta ɓisiidel o tew o ƈiƴu. A layaan ee: «Fi’ooxi o ñaaw, rokoox toki ñaawoor too ba o ɗuumoox. Fesoori nen o tew oxaa miñna o ñaawooxaa.

³ Neene, fat o ret maa no maad oxaa, layin kene.» Maaga, Yowab a layaan fop ke ta warna o lay.

⁴ O tew oxe genna Tekowa a dalfooxa o soƥik o maad oxaa. A deɓooxa na caf um, a gung a lanq soo a layin ee: «Daali maad, ƴufgaam!»

⁵ O maad oxe a laamtaan ee: «Xar bugo?» A doonaan ee: «He! Daali maad, mi de kaam ref o ñaaw, o kor es kaa xon.

⁶ Mi fee o ceefeer of kaam jeg’u xa ƥiy xa ƭaq, da ndet na koƥ, a ndaawir maaga boo o leng oxe a war o lakas oxe, yaam jeg’ee o leng oxaa xafna a den.

⁷ Naaga we mbogna na qaw ale fop kaa inooxanaam, mi fee o ceefeer of, a layaxam ee: ‹Ɓoxoti a in oxe warna o ndeɓ um, boo i mbarin, in meen o laalam oxe.› A mbi’angaan, xan a tas o yaakaar onqe yoqiɗ’uuma, soo um ñak o kor es, ñak xa taan axaa na ñoowdandkaa gon um.»

⁸ O maad oxe a laya o tew oxe yee: «Reti xaad, xam topatoox mbir of.»

⁹ O tew oxaa a layaan ee: «Daali maad, kuu jegna teen, mi fo ƥasil es na ngadooxkan. O koo, yaasam ba keene a dal took of mbaat took maat of!»

¹⁰ O maad oxe a layaan ee: «Bo o kiin a layoonga teen tig, ɓisiidaam o ten, yaaga ɓaatkatiran!»

¹¹ O tew oxaa a ɓaataan o lay ee: «Daali maad, kaam xeɗang o fi’anaam a tegit no gon no Yaal oxe Roog of, ndax o kiin oxe warna o rabdinoox fa nqon fee no ƥees warkee oxe yoqɗuuma soo a ɓaat taamaala fee.» O maad oxaa a doonaan ee: «Ne ta wooritna yee o Yaal oxe xe ñoowaa, neene a woortu yee o biil o leng sax samitkee no xoox no ƥeef.»

¹² O tew oxaa a dakooxaan o lay ee: «Daali maad, ci’aam mi fee o ceefeer of um layahinong tig.» A doonaan ee: «Layi!»

¹³ O tew oxaa a layaan ee: «Yaaga boog, xar taxu o fi na xeet fee Roog leng kut ke? Wo o mat refu oxe fi’na keene, yaam xaƴiro o koor oxe sutoona saax le ta nomtooxiid.

¹⁴ A woora yee in fop xan i nqon soo nand nen foofi laa ɓaxeena a lanq too waagataand o hurid. Roog koy, naagee o inatinaa o qon, ndaa o maad oxe a jega pexey naa ta nomtitiidna oxe sut’eena saax le.

¹⁵ Ndiiki koy, daali maad o yaal es, o ga’angaa um gariid layang kene, andi yee wiin we kaa ndiidlandaam boo mi fee o ceefeer of um xalaat ee: ‹Xam lay fo o maad oxe, too xeƈa xan a fi ke um laykan.›

¹⁶ Xalaat’aam ee xan o maad oxe a nan-gilooxaam soo a wat a in na xa ƥay no xe bug’ina o sut a in, mi fo o ƥees, na xeet fee Roog a jilna.

¹⁷ Daali maad, layaam taa no yiif es ee a woora yee fa lay fee no maad oxe, o yaal es, xan a ɓutin kam es, yaam o maad oxe, o yaal es, kaa nand fa malaaka Roog: A waaga o jektirand paax fo paaxeer. Yaasam boog o Yaal oxe Roog of a ref fa wo!»

¹⁸ O maad oxe a laya o tew oxe yee: «Xam laamtong leng, too fat o doonaam, fañaam o ɗas dara.» O tew oxe a doonaan ee: «Daali maad, layi.»

¹⁹ Maaga, o maad oxe a laamtaan ee: «Ndax refee yee Yowab asong keene fop?» O tew oxaa a doonaan ee: «Ne ta wooritna yee woxey ñoowaa, wo o maad oxe, o yaal es, neene a woortu yee laamit ne wo jegee mbuung fo maƭak. O tag of Yowab o mat heblaxam soo a lalgandaam xa ƭelem axeene fop, mi fee o ceefeer of.

²⁰ O tag of Yowab kaa fi keene, yaam a xalaat o supit a tefooƭ ale. Wo o maad oxe, o yaal es koy, kaa o jeg o and nen malaaka Roog too andaa fop ke na xewaa no lanq ke.»

²¹ Maaga, o maad oxe a reta a lay a Yowab ee: «A faaxa, xam fi ke layoona. Reti xotik a Absalom, o ɓisiidin mene.»

²² Yowab a dalfooxa o naag giriƥriƥ a lanq, a gung mbaambir o maad oxe, a gidmin soo a lay ee: «Daali maad, xaye, mi fee o tag of, andaam no ndigil ee daawaam yirmande of, yaam jaɓaa o fi ke layuuma.»

²³ A dalfooxa o inoox, a ret Gesuur soo a ɓisiid a Absalom Yeerusaleem.

²⁴ O maad oxe a laya yee: «Fat a xaad no mbind um! Ga’kee mukit es de!» Maaga, Absalom a xaada no mbind um too ga’ree fo o maad oxe.

Dawid a jofooratina fa Absalom

²⁵ Kam Isra’el boo Isra’el a xet koy, jeg’ee o koor o leng oxaa mosit’ina nen a Absalom, a simatteel nen o ten. Ke xotitna no qol ke na caf ake boo no biil ole falakna no xoox um jeg’ee sik fa leng.

²⁶ No muukandoong no hiid oluu refna a ruusooxoogu, yaam wiil le kaa meɗoogun lool. Wiil um a eed’ange, a fi’ooga ngap kilo ƭik no ke maat ne a eedtoogna.

²⁷ Xa ƥiy axe Absalom a jeg’ina a ndeeƭa goor daduk fo o tew o leng. O tew oxe Tamaar a ne’’e, a mos bo.

²⁸ Absalom a fi’a xa kiid xa ƭaq Yeerusaleem axaa ta ga’eerna o maad oxe.

²⁹ Absalom a xoyna a Yowab, ndax ta lulin maa no maad oxaa, ndaa Yowab a faña o gar. A ɓaataan o lulit, ndaa Yowab a fañahina o gar.

³⁰ Maaga, Absalom a laya dag waa ten ee: «Nu nga’a o qol lorso laa Yowab refna paam olaa mi, ndetyo ngeƥandin.» Dag waa a mbi’a ke Absalom a hebil’ina a den.

³¹ Yowab a naaga daket, a soƥiid a Absalom no mbind um, a laamtin ee: «Xar taxu dag we wo a ngeƥand o qol olaa mi?»

³² Absalom a doonaan ee: «Kaam lultiid maa wo, ndax um lulong maa no maad oxaa, o layanaam o ten ee: ‹Xar taxu um inoor Gesuur gat? O maad maaga sax moƴ’u na mi!› Ndiiki koy, kaam bug o ga’ir fo o maad oxe, too a soƥangaa yee paaxeer key na mi, fat a waraam.»

³³ Yowab a reta, a jangtoox o maad oxe xa ƭelem axaaga, soo ta xoyin a Absalom. Oxeene a gariida me ten, a gooknoox, a gung mbaambir um. Maaga, o maad oxe a farakooxaan.