2 Sami’el 13 - NQAARIIT NE ROOG

Amnon fa Tamaar

¹ Keeke refu ke xewna a cinj keene. Absalom fee o ƥiy Dawid a jeg’a o cigeen o mosu xaa ne’eena Tamaar. Amnon fee taaw Dawid kaa bug’u a Tamaar lool.

² Amnon kaa nandtoogatu oxaa jirna, yaam a yuxmaa a Tamaar fee o cigeen um mbog faap. Amnon kaa xalaatoogu yee jegee pexey leng naa ta waagna o fi boo a xet fo ten, yaam ne ta andafuleerna adna.

³ Amnon a jeg’a a xaariit fa ne’e Yoonadab, a ref o ƥiy Simeya fee o maag Dawid. Yoonadab koy, kaa reeƭu o koor o ƈiƴu.

⁴ Yoonadab a laya a Amnon ee: «Xar taxu o moƴaa moƴ o gooy nqes nuu refna, wo fee o ƥiy no maad? Ndax waagiraamo o lay ke taxuuna?» Amnon a doonaan ee: «Kaam bug a Tamaar fee o cigeen Absalom fee o ndeɓ es.»

⁵ Yoonadab a layaan ee: «Kaa o wondooxkaa no njong ne, jiraƭoox. Faap of a ɗeetiidangaang, fat o layin ee: ‹Xaƴi a Tamaar fee o cigeen es ta gar a jawanaam kaa ñaamma. Fat a jawtin na kid es, ndax um waag o ga’aa, soo ta jeƈnaam o ten.› »

⁶ Amnon a dalfooxa o jiraƭoox soo a wondook. O maad oxe a ɗeetiidaan, soo Amnon a layin ee: «Kaam xeɗang, ndax Tamaar fee o cigeen es a gar, a fi’anaam xa kaf xa ƭaq na kid es soo a jeƈnaam a den.»

⁷ Dawid a lulta ndax ta layanel a Tamaar fee reeƭna no mbind no maad ne yee: «Reti jawan a Amnon fee o camin of kaa ta ñaamna.»

⁸ Tamaar a reta no mbind Amnon fee o camin um. Oxeene kaa wondoox’u. Tamaar a xiiwta na kid um, a fi xa kaf soo a juɗ a den.

⁹ Cinj kaaga ta suudit a den na cuɗir ale, a diƈin o ten, ndaa oxeene a faña o ñaam, a layin ee: «Fat wiin we fop a sutoox mbind ne!» Ye fop a sutooxna,

¹⁰ a laya a Tamaar ee: «Ɓisiidaam xa kaf axe meeke no njong ne, jeƈnaam, too xam ñaam.» Tamaar a janga xa kaf axe ta fi’’ina, a ɓisiid a den a Amnon fee o camin um no njong ne.

¹¹ Ye Tamaar a jeƈnan, Amnon a damaan, a layin ee: «O cigeen es, gari wondoox fa mi.»

¹² Tamaar a doonaan ee: «Bara o camin es, ba o gignaam, yaam keene naagee o jegaa kam Isra’el. Ba o fi gaci faaga muk.

¹³ Mam um jofkaa yaaga fa gaci es, soo wo o mat o ɗeetateel nen o ƭof kam Isra’el! Ndiiki daal, xeɗaam o maad oxe, too yaaga ñakkiraam o ci a wo.»

¹⁴ Amnon koy, bug’iran o nan-giloox dara, too ne ta hup’uuna doole, a gignaan.

¹⁵ Cinj kaaga, Amnon a dalfooxaan o sibid. A sibdaan kupu ne ta bugit’uuna too a layaan ee: «Inooxi ret!»

¹⁶ Tamaar a doonaan ee: «Ha’aa, yaam o raxaam xan a ref paaxeer kaa hupna ke doonaxamoona boo ƴut.» Kaa koy, o ten o mat bug’iran o nan-giloox.

¹⁷ A xoya o fes ole jalanooguuna, a layin ee: «Raxanaam o tew oxene tafil faa soo jaafu o don-maax ole!»

¹⁸ O tag oxe Amnon a sutaan tafil soo a jaafu o don-maax ole. Tamaar kaa rokoox’u ndoki a naax a ciig mosu, yaam neene xa ƥiy xa tew no maad a ndokoortoogu, yaa da andafuleerna adna.

¹⁹ Tamaar a juura ndaw took xoox um, a faar ndoki ne ta rokoox’ina, a roxondoox xa ƥay um soo a faɗooxaa retaa.

²⁰ O maag um Absalom a laamtaan ee: «Ndax Amnon kaa gignoogong? Ndiiki koy, o cigeen es, tiimteen, yaam o camin of oo, too ba o xalaatin bo ta ɗom.» No kaa xotitna maaga, Tamaar a gen’ata no mbind Absalom fee o maag um, adna a maasin ƴam.

²¹ O maad Dawid a yega kaaga fop soo a fuux boo a buɓaa. Kaa koy, tax’ee ta xasan a Amnon, yaam ten reeƭu taaw, ta fexin bo.

²² Absalom o mat layoogatee fa Amnon. Kaa sib’atun, yaam ne ta gigin’ina a Tamaar fee o cigeen um.

Absalom a warnoora a Amnon soo a ƴuf

²³ Xa kiid xa ƭaq a cinj kaaga, Absalom a jeg’a nduus ne no paal ke ten Baal-Hasoor paam Efrayim, too a xura teen xa ƥiy axe no maad oxe fop.

²⁴ Absalom a reta maa Dawid, a layin ee: «Daali maad, mi fee o tag of jegaam nduus ne no paal ke mi no mbind es. Mexe xeɗang boog, wo fo dag of, nu ngariid na xumbaare feene.»

²⁵ O maad oxe a doonaan ee: «Ha’aa, o ƥees! I njaɓee ngar in fop, yaam ndik a ref a toq a maak na wo.» Absalom a saya, ndaa o maad oxe a faña o ret, kaa koy, a salanaan jam na xew fee.

²⁶ Absalom a layahinaan ee: «Feek fañaa yee garkiro, xaƴi boog tan-tan a Amnon fee o maag es ta yoon fa in.» O maad oxe a doonaan ee: «Xar a yoontaa fa wo?»

²⁷ Ne Absalom a say’ina, o maad oxe a xaƴa a Amnon fo xa ƥeem xa koor xa lakas axe fop da yoon fo ten. Absalom a fi’a mbumbaay njegu doole

²⁸ soo a hebil dag we ten ee: «Fat nu ngorooxaa a Amnon. Boo nu nga’na yee kaa naag dur yaam biiñ fee, fat nu mbarin, yaa layuuma a nuun ee: ‹Nqaweenoo!› Ba nu saɗar teen dara, yaam mi heblun a nuun. Saƭakinooxyo boog too saq njambaar.»

²⁹ Dag waa a mbi’a ke Absalom a hebil’ina a den soo a mbar a Amnon. Ndak fo ndak, xa ƥiy xa lakas axe Dawid a inooxa, a ŋaay perkele kaa den, a ƈuf.

³⁰ Ne da maad’ina o ndefaa na ƭat, Dawid a yegne yee: «Absalom a wara xa ƥiy xa koor axe no maad oxe fop boo yoqatee o leng sax.»

³¹ O maad oxe a dalfooxa o inoox, a faar toki um, a wondoox a lanq. Dag we ten ndeeƭna maaga fop a mbaara toki den itam.

³² Yoonadab fee o ƥiy Simeya fee o maag Dawid a laya yee: «Daali maad, ba foog ee xa ƥeef fop mbare. Ha’aa, Amnon soom xonu, too kaaga kaa ref kaa Absalom a yuuɓ’ina yaaga, a xotit no ñaal naa Amnon a gigin’ina a Tamaar fee o cigeen um.

³³ Ndiiki boog, wo o maad oxe o yaal es, ba o foog ee xa ƥeef fop mbare. Ha’aa, Amnon soom xonu.»

³⁴ Absalom a ƴufa. O koohorax no maad oxe a yoɗa a kid um soo a ƴook faan maak laa na inoortiidaa na ƭat alaa Horonayim na pudnand alaa no joong ole, soo a yegnin o maad oxe.

³⁵ Maaga, Yoonadab a laya o maad oxe yee: «Xa ƥeef owey ngaraa, ta ref a ref ke lay’oonga, mi fee o tag of.»

³⁶ Yaa Yoonadab a muukaa fa lay um rek, xa ƥiy axe no maad oxe a mbadiidaa. A njibna xa paɗax, soo o maad oxe fa xoox um fo dag we ten a ndef na xa lool xa ƭomu.

³⁷ Absalom a ƴuf’a, a ret maa Talmay fee o maad Gesuur too a ref o ƥiy Amihud. Dawid o mat a ref no ñaawooxaa o ƥeem doŋ.

³⁸ Absalom fee ƴuf’ina Gesuur, a yoqa maaga boo xa kiid xa tadaq.

³⁹ Ye o maad Dawid a yaalooxatna na fa nqon fee no ƥeem Amnon, a yoonata fo yiif um, soo fuux um fa Absalom a ɓoos.