2 Sami’el 11 - NQAARIIT NE ROOG

Dawid fa Batseeba

¹ Na mbaan faa, na waxtu fee maad we a nqire’aa, o maad Dawid a hebla a Yowab ta adooxan xiixire we ten fo goor Ii-isra’el we fop da ñoxorik fo Aa-amon we. A nduguña a den soo a mbid o kurul-keƥ a Raba refna teeru fa maak fee den. Dawid o mat Yeerusaleem a yoq’u.

² No kirand leng, Dawid a inooxa me ta wondoox’ina, a foƭtaa a caf um no dung-took ole no mbind no maad ne. A foda maaga, a ƴook o tew o mosu xaa na ɓogooxaa.

³ Dawid a lulta, ndax ta laamtanel kaa farna no tew oxeene. A laye yee: «Batseeba fee o ƥiy Eliyam oo, a ref o tew Uriya fee refna o Heeheet.»

⁴ Dawid a lulta o tew oxeene, soo ta gar no mbind um. Dawid a wondooxa fo ten, cinj kaaga o tew oxe a xaad. Ten koy, kaa sog’u o ɓogdooxaa no tap um.

⁵ O tew oxaa a roka o fud soo a lulit maa Dawid ee: «Kaam ref fo fud.»

⁶ Maaga, Dawid a lulta maa Yowab, ndax ta lultiidin a Uriya, o Heeheet oxe, Yowab oo a lultaan o ten.

⁷ Uriya a gara me Dawid, soo oxeene a laamtin nam Yowab fo xiixire waa a mbi’u fo nam a ñoq alaa.

⁸ Cinj kaaga, Dawid a laya a Uriya yee: «Reti xaad no mbind of, letnoox o ndik.» Uriya a sutooxa mbind ne no maad oxe, soo o maad oxe a lultin ɗang.

⁹ Kaa koy, Uriya retee no mbind um, ndaa a gara, a wondoox na carind ale no mbind no maad ne me no dag we no maad oxe fop.

¹⁰ Ye Dawid a yegna yee Uriya retee no mbind um, a layaan ee: «Ndax inooriro na ñaaƈ? Xar taxu retiro no mbind of boog?»

¹¹ Uriya a doona a Dawid ee: «Arka ne no ngiɓoor ne fo Isra’el fa Yudaa owaay ngena no ƭiif kaa, o yaal es Yowab fo xiixire we ten a ndal na koƥ alaa, soo mi, um retkaa no mbind es, ñaam, yer soo wondoox fo o tees! Ne ta wooritna yee woxey ñoowaa, neene a woortu yee fi’kiim keene muk!»

¹² Dawid a laya a Uriya yee: «Yoqahini mene xaye, o feet ndax roog, xam xaƴong o ret.» No ñaal naaga Uriya a ɓaata o yoq Yeerusaleem boo no feet olaa.

¹³ Dawid a xura a Uriya a cu’ax soo a yernin bo ta way. Pañtee koy, Uriya a wondook me ta wondoox’ina, me no dag we no yaal um, a fañ o xaad no mbind um.

¹⁴ No feet nqes olaa Dawid a binda a Yowab o leetar, a cooxin a Uriya ta ɓisanin o ten.

¹⁵ Kaa bind’u kam o leetar ole yee: «Fat o farand a Uriya me a ñoq ale a moƴna o saasit, soo nu mboosoox a cinj o ndik, nqaƴin ta warel.»

Fa nqon fee Uriya fee o kor Batseeba

¹⁶ Yowab fee widoogna teeru faa Raba o kurul-keƥ a faranda a Uriya me ta and’ina yee xiixire say fañ we mbodu maaga.

¹⁷ Ye goor we na teeru faa a sutooxaniidna a Yowabiin, ndax da ñoxor fa den, a jeg’a waa mbareena no xiixire we Dawid, too Uriya, o Heeheet oxe a fog’a taaga itam.

¹⁸ Yowab a lulta a Dawid o ñuxur, ndax ta yegnin ke xew’ina na ñoq ale fop.

¹⁹ A hebla oxe ta lulaa yee: «Boo jangtooxoona o maad oxe a ñoq ale boo ƴut,

²⁰ o maad oxe a fuuxangaa soo a layong ee: ‹Xar taxu nu ñoxoreel boo matik teeru faa? Kaa nu andee yee a naanga o nqaƴtiidaa took saŋe ne?

²¹ An war’u a Abimelek fee o ƥiy Yerubaal? Mee ndax o tew fod’u took saŋe ne Tebes, a berengiid took um ɓil unir bo ta xon! Xar taxu tax sax nu matik saŋe ne?› Maaga, fat o doonin ee: ‹O tag of Uriya, o Heeheet oxe a xona itam.› »

²² Oxaa lul’eena a dalfooxa o ret. Ye ta fadiidna, a jangtooxa a Dawid fop ke Yowab a lul’uuna.

²³ A ɓaata taaga yee: «Wiin we na teeru faa moƴ’u o njeg a in doole. Kaa sutooxaniid’u a in, ndaa pañtee i ndax a den boo no ndokand naa na teeru faa.

²⁴ Kaa koy, xaaxaƴ a qali we kaa mbod’u took, a nqaƴaa a in a kas ake. Neene leng-leng no dag we wo a nqontu. Uriya o Heeheet oxe itam a xona.»

²⁵ Dawid a laya oxaa lul’eena yee: «Fat o saƭakinanaam a Yowab ee: ‹Ba o naqadiloox no keene, yaam leek-leek laƥ ne kaa saŋkaa oxene, leek-leek ta saŋik oxaana. Songi teeru fee fo njambaar too jiƭtin.› »

²⁶ Yaa o tew Uriya a eegeena o kor um, a dalfooxaan o ñaawoox.

²⁷ Ye ta ñawtooxna, Dawid a xotnikaan, a ɓekin no mbind um, ta refat o teem, soo ta rimanin o ƥiy o ngoor. Ke Dawid a fi’’ina a feƭar’a o Yaal oxe.