2 Sami’el 10 - NQAARIIT NE ROOG

Kelfa ke niwaƭareena no maat ne Dawid

¹ Cinj kaaga, o maad oxe no Aa-amon we a xona, soo Hanuun fee o ƥeem a rondandin.

² Dawid a laya yee: «Xam lal a Hanuun fee o ƥiy Naahas o paaxel es, ne faap um a fi’anit’axama o ten.» Naaga, Dawid a lula kelfa leng-leng ndax da njaapik a Hanuun na mboy ale faap um. Ye kelfa keene a mbadiidna no saax le no Aa-amon we,

³ gelwaar we no Aa-amon we a ngara, a lay a Hanuun fee o yaal den ee: «Kaa o foog ee ndax ta niw a faap of doŋ taxu Dawid a lultiidong wiin da njaapiidong? Mee ndax o ngoroox teeru fee boo a mbaagin o ngef taxu ta luliid kelfa kene paam of!»

⁴ Maaga, Hanuun a dalfooxa o damnoor kelfa kaaga Dawid a luliid’ina, a ruusnoor genwal fee na xa taatam axe den, a ɗegnoor itam tikoorik ke den boo na puƭ ake, soo cinj kaaga ta rax a den.

⁵ Ye Dawid a yegna kaaga, a lula wiin da nqetik fo dag weene ngac’and’eena tigi, ndax da ndaawnel fa lay feeke no maad oxe yee: «Fat nu yoq Yeriko boo yaa xa taatam axe nuun a saxatinna, soo nu sog o mbaag o nomtooxiid mene.»

A ñoq ale Dawid fo Aa-amon we fo Aa-araam we

⁶ Aa-amon we a and’ata koy ee a mbuuxnoora a Dawid. Ten taxu da njaɓ o ndabid Aa-araam we ndefna Bet-Rehob fa Cooba xiixire cuni qarɓeen ƭik fo xiixire juni no we no maad oxe Maaka fo xiixire cuni xarɓaxay fo cuni ƭik waa ngenna Toob.

⁷ Yaa Dawid a yeguuna, a dalfooxa o hebil a Yowab fo xiixire we fop da ñof o nqetik fa den.

⁸ Aa-amon we a sutooxa, a njagandooxan a ñoq ale mbaambir ndokand ne na teeru fee. Aa-araam we Cooba fo we Rehob fo xiixire we Toob fo we Maaka a kesooxa no saax o lakas kam xa saawit axe.

⁹ Ye Yowab a ga’na yee kaa narel o songit mbaambir oo, a cinj oo, a jila we moƴna ndef goor a ndeer a yaj ale no Ii-isra’el we, da njasnoor fo Aa-araam we,

¹⁰ soo we yoqna no xiixire we, ta doxin a den a Abisay fee o maag um, da njasnoor fo Aa-amon we.

¹¹ Yowab a layaan ee: «Aa-araam we a ngupangaam doole, fat o ƴufgiidaam, soo wo itam oo, Aa-amon we a ngupangaang doole, xam ƴufgiidong.

¹² Saqi njambaar boog, too i saƭakinoox yaam xeet in fo teeru ke Roog in. Fat o Yaal oxe a fi ke jofooxuuna!»

¹³ Maaga, Yowab fo a yaj um a ƥeriida ndax da song Aa-araam we, soo weene a ƈuf mbaambir den.

¹⁴ Ye Aa-amon we a nga’na Aa-araam we a ƈufaa, den oo a ƈufa mbaambir Abisay, a nqaad na teeru den. Naaga, Yowab a dayna maaga a ñoq ale ten fo Aa-amon we, a xaad Yeerusaleem.

¹⁵ Ye Aa-araam we a nga’na yee Ii-isra’el we a nqaw’a a den, a ndalfooxa o mbokat a yaj ake den.

¹⁶ Hadadeseer a lulta soo a fokat Aa-araam we ngenna no saax o lakas ole no xuluɓ ole Ofrat. Weene a ngara Heelam, too Sobak fee o aa-adax oxe no xiixire we Hadadeseer a adooxan a den.

¹⁷ Ye Dawid a yegna kaaga, a fokata Ii-isra’el we fop, a xaañ a Yordaan soo a gar Heelam. Aa-araam we a njagandooxana a ñoq, a ñoxoraa fa Dawid.

¹⁸ Kaa koy, a ƈufa mbaambir Ii-isra’el we, soo Dawid a waran a den ƴuuƴufin a sareet-xire teemeed ɓetuu ƭik fo ŋaaŋaay pis cuni qarɓeen nahik. A ngaaña itam a Sobak fee o aa-adax oxe no xiixire we Hadadeseer boo ta xonit maaga.

¹⁹ Ye maad we ƥoxotoox’ina na Hadadeseer fop a nga’na yee Ii-isra’el we kaa nqaw’u a den, a njamoora fo Ii-isra’el we, a ƥoxotoox na den. No kaa xotitna maaga, Aa-araam we saɗ’atee muk o ƈufgiid Aa-amon we.