2 Sami’el 1 - NQAARIIT NE ROOG

Dawid a yega fa nqon fee Sawul

¹ Ye Dawid a xawna Aa-amalek we boo a nomtooxiid, a moof Siklag ñaal ƭik, a soƥ’a Sawul a xon.

² No ñaal ndadkandeer naa, o koor a inoortiida no saŋe naa Sawul, toki um a mbaaroox, xoox um a yipoox lanq. Ye ta fadiidna me Dawid, a naaga giriƥriƥ, a gung.

³ Dawid a laamtaan ee: «Mam inooro?» O koor oxaa a doonaan ee: «No saŋe naa no Ii-isra’el waa ɓostoortiidum.»

⁴ Dawid a layaan ee: «Layaam boog ke xewna.» O koor oxaa a doonaan ee: «Xiixire waa kaa ƈufit na ñoq alaa, too mayu na den a nqona boo na Sawul fa Yoonatan fee o ƥeem sax.»

⁵ Dawid a laamta o fes ole yegnuuna keene yee: «Nam andto yee Sawul fa Yoonatan fee o ƥeem a nqona?»

⁶ O koor oxaa a doonahinaan ee: «Kaam reeƭu neeke rek took o joong olaa Gilbowa too ga’aam a Sawul fee sereƥoox’ina na salma le ten fo a sareet-xire ke fo ŋaayŋaay pis we ƥiikil’uuna lool.

⁷ Maaga, a dalfooxa o wiƈaqiloox, a ƴookaam soo a xoyaam, um jaaɓin ee: ‹Xar oo?›

⁸ A laamtaxam ee: ‹Wo an oo?›, um doonin ee: ‹O Aa-amalek refum de.›

⁹ Maaga, a layaxam ee: ‹Gariidi pataam, yaam kaam xij lool, ke maaduuma o ñoowaa fop oo.

¹⁰ Naaga, retaam warin, yaam and’u rek ee waagatee o ñoow no ngaañax ƭomu ne ten. Cinj kaaga, o yaal es, xotaam o ndip no maad onqe no xoox um fo o ƴang ole ta rokoox’ina, ɓisiidong a den meeke.»

¹¹ Maaga, Dawid a faara toki ke ta rokoox’ina, soo we ndeeƭna fo ten fop a mbi nen o ten.

¹² A ƭomatooxooga, a loolaa, a ngoor boo no kirand naa yaam fa nqon fee Sawul fa Yoonatan fee o ƥeem fo Ii-isra’el lakas we nqon’ina na xeet fee no Yaal oxe na ñoq alaa.

¹³ Dawid a laamta o fes olaa eegiid’ina yee: «O fog mam?» A doonaan ee: «O ƥiy no Aa-amalek oxaa refna o gataakoon no saax leeke refum.»

¹⁴ Dawid a layaan ee: «Nam saɗto warit o maad oxe o Yaal oxe a ɗuumna!»

¹⁵ Dawid a xoya o leng no dag we ten, a heblin ee: «Reti warin!» O tag oxaaga a wara o Aa-amalek oxaa.

¹⁶ Dawid a layaan ee: «Gadooxi fo’oy of, yaam o don of xaƴong a malook boo o lay ee: ‹Mi waru o maad oxe o Yaal oxe a ɗuumna.› »

Dawid a gimana a Sawul fa Yoonatan a kim a mboy

¹⁷ Maaga, Dawid a ferana a Sawul fa Yoonatan a kim a mboy aleeke

¹⁸ soo a hebil ta jangnel wiin we Yudaa. A Kim ale na qali le a ne’e. Neeke deŋ a soƥte soƥit kam «Safe le no cofu xe».

¹⁹ Wo Isra’el, qaaƴoor ke wo owey luuñaa took a ñaang ake wo, cambaar ke wo a yen junjang.

²⁰ Ba nu yegnitin kam Gaat, ba nu lambin o nan oleene no ped ke Askalon, yaam ndik rew we no Fiifilista we a mbelakinoox, kaam ee ndik roog we na qucooxar akeene a mbeƈekoox.

²¹ Nuun xa coong axe Gilbowa, yaasam baa liim fo a teƥ a mbudooxat took nuun, baa xa qol xa qaaɗu sax a njegat me nuun, yaam me nuun o mat pegoor ne no cambaar ke a niwaƭarte, refna pegoor ne Sawul ɗuumkataandeena diwliin muk.

²² A qali le Yoonatan nomtooxoogee o jiijing muk mbaambir fo’oy le no fañ we, mbaambir neebam fee na salma-koor ake, too laƥ ne Sawul mosee ñak o fadin o far um.

²³ Sawul fa Yoonatan kaa mbug’el too a mbex’el. Mbaag’aand o sambrand no ñoow den fo na fa nqon den. Den moƴ’u o ñof a canjiik, a moƴ o njambaar njogoy.

²⁴ Nuun rew we Isra’el, loolyo a Sawul, ten fee rokanoogna a nuun toki mosu, a humaa a nuun keloor soo a lokanaa a nuun kumooxel wurus no ñirax nuun!

²⁵ Cambaar ke a yena kam a ñoq ale, Yoonatan a luuñaa took a ñaang ake wo.

²⁶ Wo Yoonatan fee o pog es, kaam naqadiloox lool yaam wo. Kaam bug’ong bo ta hup. Nqaariit of fa mi moƴanaxam o mbeq onqe no rew we.

²⁷ Cambaar ke a yena, ƥonax qire’ir ke a yaqoox.