2 Piyeer 1 - NQAARIIT NE ROOG

A tegdinax fo simin

¹ Mi Simoŋ Piyeer, refna o paɗ fo apootar Yeesu Kiristaa na simnaa a nuun. Kaa nu ndaaw o ngim o mbooru nqe fodna fo onqe in njigand na pexey o cofel ole Roog in fo o Muumucil in Yeesu Kiristaa:

² Yaasam nu njeg yirmande fa jam na pexey o and ole Roog fa Yeesu fee o Yaal in.

O xoy ole fo a cil ale Roog

³ Katil ne Roog a jegoodna a cooxa a in ke i soxla’na fop, ndax i ñoowaa no damoox no ten, ye ta andnoorna a in oxe xoyna a in na pexey o ndam xoox um fo no paaxel um.

⁴ Neene, o Yaal oxe a cooxa a in a tegit ake moƴna o mboor fo ake moƴna o magin, ndax na pexey den nu ndefat waa mbogna no ten, yaa nu ƈufaa ke na yaqaa adna fee yaam a yaaw a paaxeer ake.

⁵ Yaam keene sax, ngoorgoorlooxyo nuun fop, ndax nu ƥaat no ngim onqe nuun a pesoorooƭ a paax, soo na pesoorooƭ a paax nuun nu ƥaat teen o and.

⁶ Ƥaatyo itam no and ole nuun o ɓuuɓ, no ɓuuɓ ole nuun o muñ, no muñ ole nuun o damoox na Roog,

⁷ no damoox na Roog ole nuun nu nqaariitooraa a ndeer nuun, soo no nqaariitoor ne nuun o mbeq.

⁸ Keene fop a jegangaa boo a may na nuun, nqaƴkee a nuun nu tayil boo nu ñak o rim ole inoorna no and o Yaal in Yeesu Kiristaa.

⁹ Kaa koy, oxuu jegeerna a den, kaa nand fo o puul. Kaa ref oxaa o ga um a raƥna, ta weecit ee Roog a xooland’aan no pakaad um yaaga.

¹⁰ Ten taxu fog es, ngoorgoorlooxa­hinyo, ndax nu saƭik no xoy ole Roog a xoyna a nuun fo na cil ale ta jilna a nuun, yaam nu mbi’angaan, nu yenkee muk.

¹¹ Boo nu mbi’taa neene, xan nu ci’el maa nu ndokitna kam Maat mbagkeer ne no Yaal in fo o Muumucil in Yeesu Kiristaa.

¹² Ten taxu, xam wetandaa a nuun keene kili, ke nu anduuna and fop oo, too saƭik kam ndigil ne nu ndaawna.

¹³ Kaa koy, a wooraxam ee a faaxa, ndax um layatinin a nuun, ye maaduuma o ñoowaa boo ndiik, ndax um yokit a nuun a betandax es.

¹⁴ Yaam andaam ee a inax es kam cer kene goƭatee, ne o Yaal in Yeesu Kiristaa a andnoortaxama o ten,

¹⁵ ndaa xam fi fop boog, ndax cinj fa nqon es, nu mbaag o mbetandooxaa keene kili.

We nga’na o ndam onqe Kiristaa

¹⁶ Refee sax ee kaa i saaƭoox na nax ake nqalaat’eena boo andnooraa a nuun a kar a mayu katil ale no Yaal in Yeesu Kiristaa. Kaa i mbi’in, yaam ne i nga’oodna o ndam um fo a kid in,

¹⁷ ye ta daawitna o niwel fo o ndam na Roog Faap fee. Kam o ndam o mayu katil onqe ten, Roog a nannooraan o ñuxur olene: «Oxene refu o Ƥees onqe fexuuma fex, too no ten felakinoortum.»

¹⁸ In fa qoox in, i nana o ñuxur oleene inoortiidna na asamaan, ye i ndefna fo ten took o joong o tedu le.

¹⁹ Yaam keene, i moƴahina o ngim ke duleer we Roog a yegnit’ina. Nu mbaraan o ngorooxaa a paax, yaam kaa ref nen o lampa laa na kaƥaa kam o niɓaan, boo yaa Roog a feedna, o xoor o maak ole ne’eena o Mbuŋa a feeñ kam a qeeñ nuun.

²⁰ Nu mbara o and kene a qool qac: A ƭelem ake duleer we a layna, a mbindin kam safe le Roog, reeƭee koy ee den fa qoox den nqalaatoogu a den.

²¹ A ƭelem ake no duleer we Roog mosee o ngat no bug no kiin. Yiif Tedu le reeƭu oxe ɗoxoogna a den boo da layaa a ƭelem akaa inoorna na Roog.