2 Maad we 10 - NQAARIIT NE ROOG

Ƥasil ne Ahab a saŋke

¹ Ahab a jega kam Samari xa taan qarɓeen ɓetuu ƭik. Yehu a lulta xa leetar kam Samari, maa no kelfa kaa Yisre’el fo no maak waa fo no waa yaroogna xa taan axe Ahab. Kaa bind’u kam xa leetar axe yee:

² «Nuun na topatooxaa xa teɓandoong axe no ƥasil ne no maad oxe, njeg a sareet-xire fo pis fo ƥonax, too ngen na teeru fa njegu saŋe. Boo nu ndaawna o leetar olene,

³ fat nu ƭeet ndeer we mbaqaqoorna no maad oxe oxe moƴna o waag o ref o maad too a jof, soo nu ndalnin no uum-maamaad le faap um, cinj kaaga, nu ñoxoran ƥasil ne no yaal mbind nuun.»

⁴ Diid maak a dama wiin waaga, da layir a ndeer den ee: «Nam i mbaagu mbaag o nqoxit a Yehu fee andoona sax ee maad ɗik nqoxiran.»

⁵ Ndak fo ndak, jawdiin fee no mbind ne no maad oxe fa kelfa fee na teeru fee fo maak waa fo we yaroogna xa taan axe Ahab, a lulta o layanel a Yehu yee: «In de, dag of soom i ndefu, kuu hebloona a in rek, i mbi’in. I ndalinkee o maad o leng, fi’i rek kuu jofooxoonga.»

⁶ Yehu a ɓaata o bind a den o leetar o ɗikandeer ee: «A soƥangaa koy ee fa mi nu mbaru too nu nananaxam, ƭegyo a qoox ake na xa taan xa koor axe no yaal mbind nuun soo ƥisiidaam a den meeke Yisre’el o feet na waxtu feeke.» Xa taan qarɓeen betuu ƭik axe Ahab koy, maa no maak waa na teeru faa yaroogna a den a ndeeƭu.

⁷ Ye aa-adax waaga a ndaawna o leetar olaaga, a ndalfooxa o nqoy xa taan qarɓeen ɓetuu ƭik axe no maad oxe, a mbar a den soo a mbokat a qoox ake den kam a cenjel, a lulit a den Yisre’el maa Yehu.

⁸ Oxe lul’eena a gara, a yegin a Yehu yee: «A qoox ake na xa taan axe Ahab a ƥisiide.» Yehu a hebla yee da mbi’el a cuum a ƭak paam ndokand ne na teeru faa boo no feet olaa.

⁹ No feet olaa, Yehu a gara boo a sutoox teeru faa, a geenoox mbaambir xeet fee, a lay a den ee: «Nu nqoola qac no fo’oy lene! Mi fa xoox es o mat hiɓanu o yaal mbind es o ngir soo warin, ndaa wene fop koy, an waru a den?

¹⁰ Andyo boog ee fop ke o Yaal oxe a lay’ina no kaa jofna no ƥasil ne Ahab, dara teen fe’ee a koƥ! O Yaal oxe a fadna ke ta lay’ina a reefandin no tag um Eliya.»

¹¹ Yehu a wara we no ƥasil ne Ahab fop yoq’ina Yisre’el, a war itam maak we fo andir ne Ahab fo saasadax we ten fop, too xaƴee o leng ta daɗ.

Gelwaar we Yudaa a saŋke

¹² Cinj kaaga, Yehu a xota a ƭat, a retaa Samari. Maaga, ye ta refna na ƭat paam Bet-Eqed fee no gaynaak we,

¹³ a xeta fo xa teɓ xa koor axe Ahasiya fee reeƭna o maad Yudaa. A laamta a den ee: «Aniin wene?» A ndoonaan ee: «Xa teɓ xa koor Ahasiya i ndefu, too kaa i simnikaa xa ƥiy axe no maad oxe fo axe na lingeer fee.»

¹⁴ Yehu a dalfooxa o lay ee: «Ndamyo a den, da ñoowaa!» Yoon we ten a ndama a den, da ñoowaa, soo a nqirsit a den paam a ngas alaa Bet-Eqed. Wiin waaga a ndeeƭa goor qarɓeen nahik fo goor ɗik, too o leng na den daɗ’ee.

Yehu a xeta fa Yoonadab

¹⁵ Yehu a inoora maaga, a ga a Yoonadab fee o ƥiy Rekab, ta garaa farna fo ten. Yehu a simnaan soo a layin ee: «Ndax fexaxamo no xeeñ of ne fextoonga no xeeñ es?» Yoonadab a doonaan ee: «Ii, mi daɗong!» Yehu a layaan ee: «Yaaga boog, cooxaam o ɓay!» Yoonadab a cooxaan o ɓay, soo Yehu a ŋaaynin na sareet-xire le ten.

¹⁶ A layaan ee: «Gari yoon fa mi, too xan o ga o jaflax es no Yaal oxe.» Naaga, a ɓisaan na sareet-xire le ten.

¹⁷ Ye da mbadiidna Samari, Yehu a wara we yoq’ina no ƥasil ne Ahab fop too a ngen’u maaga. A moocanda a den bo dee tak, ne o Yaal oxe a layit’uuna a Eliya.

Yehu a ñufa a paɗax ale Baal

¹⁸ Cinj kaaga, Yehu a fokata waa Samari fop, a lay a den ee: «O maad Ahab a faɗooxa a Baal o ndik, mi Yehu koy, xam faɗooxin a paax.

¹⁹ Ndiiki koy, fat duleer we fo faafaɗax we fo saasadax we Baal fop a nqoykel, a soƥiidaam den fop. Ba o leng na den a yoq, yaam kaam bug o ɓoxot a Baal sadax fa maak. Oxuu gareerna koy, xan a warel.» Yehu kaa fesoor’u neene fo o ƴiƴ, ndax ta moocand faafaɗax we Baal.

²⁰ Yehu a hebla yee: «Nqoyityo mbokatax tedu naa na fi’ankeel a Baal.» A ndalfooxaan o nqoyit.

²¹ Yehu a hebla duleer muu refna kam Isra’el, soo faafaɗax we Baal fop a ngar, too o leng saɗ’ee o ñak o gar. A yipooxa mbind a qeƭ naa Baal bo ta may muut.

²² Maaga, Yehu a hebla oxe saq’ina toki ke, ta coox faafaɗax we Baal fop no toki ke. Kaaga a fi’e.

²³ Yehu fa Yoonadab fee o ƥiy Rekab a ndoka kam mbind a qeƭ naa soo a lay faafaɗax we Baal ee: «Mbaaƭyo boo and, ndax jegee mene waa na mbaɗooxaa o Yaal oxe. Ƭeetyo boo ta woor a nuun ee faafaɗax we Baal soom ndefu meen.»

²⁴ Cinj kaaga, Yehu fa Yoonadab a ndoka, ndax da ƥoxot sadax toxel fo sadax lakas. Yehu koy, kaa xaƴ’u tafil fee xiixire qarɓeen ɓetuu tadik, a lay a den ee: «Xam ɓoxot wiin wene fop na xa ƥay nuun, too o leng na nuun a xaƴangaa o kiin ta daɗ, xan a xon na seek um.»

²⁵ Ye Yehu a ɓoxotna sadax toxel ke boo a ƴut, a hebla yeeyetax we no maad oxe fo cawdiin ke yee: «Ndokiidyo, saŋik wiin wene, too ba o leng na den a sutoox mene fo o ñis.» Maaga, a saŋkita a den laƥ, a ndeɓ xa tal axe tafil. Cinj kaaga, a ndoka kam o mbiñ onqe moƴna o ted no mbind a qeƭ naa Baal,

²⁶ a sutiid tafil xa taaƴ axe ndeeƭna maaga soo a ndox a den.

²⁷ A njiƭta itam o daaƴ ole Baal soo a mbayit mbind a qeƭ ne fa xoox um, a mbi’in o ñaaƴlooxand. O ñaaƴlooxand olaaga a maada maaga boo xaye.

Yehu fee o maad Isra’el

²⁸ Neene mat Yehu a ñuftu a paɗax ale Baal kam maat ne Isra’el.

²⁹ Kaa koy, Yehu a damooxa no pakaad ke Yerobowam fee o ƥiy Nebat a bakaadnoortoogna xeet fee Isra’el, refna a paɗax ale na xa qeel wurus xa ƭaq axe ta sip’ina Betel fa Dan.

³⁰ O Yaal oxe a laya a Yehu yee: «Yaam ne fi’oona kaa faaxna na kid es, fadin no ƥasil ne Ahab fop ke bugan’anuuma, xan xa taan of a maadooxaa kam Isra’el boo no suk nahkandeer naa.»

³¹ Kaa koy, Yehu reef’ee kebil ke no Yaal oxe Roog fee Isra’el no xeeñ um fop. A damooxa no pakaad ke Yerobowam a bakaadnoortoogna xeet fee Isra’el.

³² No camaane leng kut kaaga, o Yaal oxe a refa no wañaa o fiisel ole Isra’el. A xaƴa a Hasa’el fee o maad Araam, ta xaw Ii-isra’el we kam xa ŋat axe Isra’el fop.

³³ Neene a ñaktu xa piisel axe ndefna no batand naa no xuluɓ olaa Yordaan boo na teeru fee Aroweer refna na coonand alaa no xuluɓ olaa Arnon, ndefna ndef xa cegel axe Galaad fa Basan, too a carind ale Ruben, ale Gaad fo ale Manaase a ngen a den.

³⁴ Ke yoqna na pi ake Yehu fop fo njambaar ne ten kaa mbindel no «Safe le no caloori ke no maad we Isra’el».

³⁵ Yehu a daba daan um, a gasel Samari, soo o ƥeem Yehowahas a rondandin no maat naa.

³⁶ Yehu a maadooxan’a a Isra’el xa kiid qarɓeen ƭik fo xa kiid ɓetaa tadaq kam Samari.