2 Korint 7 - NQAARIIT NE ROOG

¹ Nuun we fexuuma, tegit keene fop, in njegu a den. Ten taxu, fat i ƥogoox no fop ke na roɗgandaa cer in fo a yiif in. Fat i mbaaƭ o tedel, yaa i ñoowaa no fit a Roog.

Pool a ɗaaya na ticax ale no Kookorint we

² Ci’yo a in o wonq kam a qeeñ nuun. I mosee o tooñ o leng, i yaqanee o leng, i naxee o leng itam.

³ Layiim keene, ndax um maaltin a nuun, yaam lay’aam yaaga yee kaa nu ndal kam a qeeñ in, ta ref no ñoow mbaat na fa nqon.

⁴ Jegaam a koolax a maak na nuun, ta refat sax o wooƥ o fakoor es na nuun. Kaam ee, mayaam fo xa yaaloorand, may muut fo o ɗaay kam coono ke in fop.

⁵ Naa i mbadiidu Makedoni, jegee maa cer in a mbaagna o ñootnoorit. Kaa i ƥiiklel o saax oo saax, ñoxoreel, a qeeñ in a ngen no sendaa.

⁶ Kaa koy, Roog fee refna o yaayaal no we neewna doole, a yaaltiida a in a Tiit, ye ta fadiidna me in.

⁷ Refee soom ne ta fadiidna, ndaa Tiit fa xoox um sax, kaa joƭit a in ne nu saƭakintuuna. A laya a in itam ne i sooɓitna a nuun fo ne nu naqadilooritna fo ne nu sawaritna no nqoxtaam. Ten taxu, o ɗaay es a ɓaatoox ndiiki.

⁸ Mi de, boo naqadiluuma a nuun no leetar es oleene yoo, ricooxatinum ndiiki. Ricoox’aanum, yaam ne o leetar oleene a naqadil’ina a nuun o ndik,

⁹ ndaa ndiiki kaam felakinooxaa teen. Refee yee naqad fee nu njeg’ina taxun, ndaa yaam ne naqad fee nuun a taxna nu mbes pakaad nuun a cinj. Naqad fee nuun na Roog a inooru, boo ten taxu i ndoonee a nuun paaxeer leng.

¹⁰ Yaam naqad fee inoorna na Roog kaa gartaa o fes pakaad a cinj na ɓisaa na muc ale, too ricooxkaand boo muk. Naqad fee na adna fee koy, fa nqon soom a rimaa.

¹¹ Ƭeetyo rek ke naqad feene inoorna na Roog a rimanna a nuun. Kaa rimaa fitna fo a baasnax fo fuux fo caƭar fo a tiilax fo o jaflax fo o nqasan. No kuu ta waagna o ref oo nu lalta na qoox nuun ee nu nqoola no keene fop.

¹² Bindiim keene yaam oxe tooñ’ina mbaat oxe tooñ’eena. Kaam bindin ndax o jaflax ole nu njegna na in a feeñ mbaambir Roog.

¹³ Keene riimand’u a qeeñ in. Refee soom ee a yaalax i ndaawu, ndaa i moƴ’a o mbelakinoox itam yaam o ɗaay ole Tiit a jegit’ina na nuun, nuun we ndalin’ina xeeñ um.

¹⁴ Wariim o sed o fakoor a nuun o ndik mbaambir Tiit, yaam ndiiki a xoola yee ndigil layum. Ne i laytaa layit a nuun ndigil ne, neene o mat ke i mbakoortaa na nuun mbaambir Tiit a reftu ndigil.

¹⁵ Tiit koy a jega na nuun o mbeq o maak, a moƴaan a jeg koy yaa ta wetandooxaa ne nu njaɓanit’uuna fo ne nu ndalnit’uuna, njeg no ten a bootax boo sendaa.

¹⁶ Mexe felakinooxaa, ne andoona yee no kuu refna, waagaam o geƈnoox na nuun.