2 Korint 6 - NQAARIIT NE ROOG

¹ In we ndefna jaajal Roog, kaa i maƭooxaa a nuun nu mbañ o yapatil yirmande fee Roog nu ndaawna.

² Yaam Roog kaa lay kam a Pind a Tedu ke yee: «Na jamaane fa mbaax fee nan-gilooxaaxoong, na bes fee na muc ale um ƴufgong.» No ndigil, ndiiki refu jamaane fa mbaax fee, kaam ee, xaye refu bes fee na muc ale.

³ I mbugee dara kaa tolofnoorna o kiin, no kuu ta waagna waag o ref, yaam ndik Yegil mbaax ne a ref na in ŋañel.

⁴ Kaa jolna keene, kaa i laltaa no fop ee dag Roog i ndefu. Kaa i ndoxondooxaa fo o muñ coono ke fo naqad ke fo a yogorlax ake.

⁵ Kaa i nqawel, mbegel kaso, wiin mayu a sii’nel a in, i nqijlandel, ƭaanarel, nqeexel.

⁶ Kaa i laltaa yee dag Roog i ndefu na pexey o qoolel in fo o and in fo o muñ in fo o paaxel in. Keene refu ke i mbi’aa na pexey Yiif Tedu le fo o mbeq o saƭku nqe in

⁷ fo na pexey waare in no ndigil ne fo na pexey katil fee Roog. Ƥonax in refu o cofel ole i ñoxorteel soo mbegoortan.

⁸ Kaa i kañeel, soo ndoxondeel gaci. Wiin we kaa layanaa a in paax fo paaxeer, a ƭeetaa a in nen maamaaɓ, too yaaga fop oo, ndigil soom i layaa.

⁹ Kaa i ƭeeteel nen wiin andaande, ndaa i ande a paax, nen waa na nqonaa, too ndef waa na ñoowaa jok, ne nu andtuuna. Kaa i nqaweel, too i mbarnoorkaand,

¹⁰ naqadileel, too ngen no ɗaay, ndef rool, too njegnooraa wiin mayu halal, ndef waa njegeerna a keƭtoor, too yaaga fop oo, no ndigil i njega fop.

¹¹ I laya fa nuun fop, too i ƭasee a nuun dara, nuun qaariit in ke ngenna Korint, kaa i mbetan a nuun a qeeñ in.

¹² Refee muk ee in mbeganu a nuun a qeeñ in, ndaa nuun o mat mbeganu a in ake nuun.

¹³ Ndiiki koy, kaam layaa fa nuun nen kaa nu ndef xa ƥees ŋaƈit: Njegyo na in o liir ne i njegtuuna na nuun.

Ngenand ne Roog

¹⁴ Ba nu mbog kadoor leng fo gimeer we, yaam ndefee yoon nuun we ngelna. Nam boog o cofel ole a waagu o xaariitoorit fo njofaƭar ne? Ndi nam a qoolaand ale a waagu o hiɓoorit fo niɓaan ole?

¹⁵ Nanoor num Kiristaa fee a waagu o jeg fa Saytaane? Kaam ee a las alum o kimu xe a waagu o fog fo o kimeer oxe?

¹⁶ Ndi nam ngenand ne Roog a waagu o yoonit fo pangool ke? Yaam in o mat ndefu ngenand Roog fa ñoow jok fee, ne Roog fa xoox um a laytuuna: «Xam gen fa den, i ñaaƴandoor. Mi na refkaa Roog den, da ndef xeet es.»

¹⁷ Ten taxu o Yaal oxe a lay ee: «Nu mbara njangoox a den, soo nqaajoor fa den. Ba nu nduq dara kaa xoolaƭarna, too yaaga xam dalin a nuun.

¹⁸ Xam ref faap nuun, soo nu ndef xa ƥees, goor fo rew.» Keene o mat o Yaal oxe jegna katil a layu.