2 Korint 5 - NQAARIIT NE ROOG

¹ A woora a in ee ƭiif in neeke no lanq ke, ta ref cer in, a yaqooxangaa yoo, i njega na asamaan mbind naa Roog a geekanna a in, ta ref cer aa-asamaan. Kaa ref ngenand njegee muukandoong naa o ɓay no kiin a maxeerna.

² Ten taxu i iinaa kam ƭiif neene, yaam i tayaa o ndok kam ngenand in njegee sik ne refna took.

³ I ndokangaa maaga, xan a ref nen kaa i ñiroox, i yoqkatee duŋ.

⁴ Yaam nuu i ñoowtaa kam ƭiif neene, xan i ngenit xa iin nen kaa i ndoxondoox ndoq meɗu. Ke i mbugna, refee yee i mboloox cer in keene, ndaa kaa i mbug o ndokooxatin cer aa-asamaan ke in, ndax ke warna o xon a waag o ɗuuɗoox kam o ñoow ole.

⁵ Oxe jagandanna a in a suptax aleene refu Roog, ten fee ci’na a in Yiif um nen a ƭegeer njigand no paax ke ta geekanna a in.

⁶ Kaa i may boog fo njambaar kili, too i anda yee feek in we ñoowaa no cer in keene, i matafulee ngenand ne no Yaal oxe.

⁷ Kaa i ñaaƴtaa o ngim onqe, ndaa refee fo ke i mbaagna o nga.

⁸ Kaam ee, kaa i may fo njambaar, too mbugat sax o sutoox cer keene, ngenik paam o Yaal oxe.

⁹ Ten taxu ke i moƴna o mbug refu i mbel o Yaal oxe, ta ref yaa i ñoowaa no cer keene mbaat i sutoox teen.

¹⁰ Yaam in fop, kaa i mbar o ngeennel no nqel ne Kiristaa, ndax ta ɓoxot oxuu refna a pi um ye ta ñoowaa no cer um, ta ref paax mbaat paaxeer.

Kiristaa a jofooranda a in fa Roog

¹¹ Neene boog, i anda ke refna o saɗar o Yaal oxe, too kaa i mbaaƭaa maa i njegitna wiin we. Roog koy, a anda a in, too yaakaaraam ee nuun fa qoox nuun kam a yiif nuun, nu anda ke i ndefna itam.

¹² Refee yee kaa i mbokatahinaa a qoox in fa nuun, ndaa kaa i mbug nu njeg kaa nu mbakoorna na in. Yaaga, xan nu mbaag o ndoon we na mbakoortaa ke yulna a ngid, a mbañ ke saxna no xeeñ.

¹³ Yaaga koy, i njambange o ñak-xoox, Roog taxun, ndaa i ndefangaa waa njegna a qoox, nuun taxun.

¹⁴ O mbeq Kiristaa kaa daaw o adin a in, yaam a woora a in ee o leng kut xonanu fop, ta tekit ee fop a nqonta no ten.

¹⁵ Kaa xonan fop, ndax we na ñoowaa, ñoowankatee a qoox den, ndaa ndax da ñoowan oxe xonanna, soo a xontooxan a den.

¹⁶ Ndiiki koy, i ƭeettatee o leng ngiin um. Ke i ƭeet’ina a Kiristaa nen o kiin fop oo, i andtatiran neene.

¹⁷ O kiin a fogangaa na Kiristaa, mbindel nqas a refatu. Ke hiidna a wata, soo fop a refat qas.

¹⁸ Keene fop na Roog a inooru, ten fee jofoorandna a in fa xoox um na pexey Kiristaa, soo a doxin a in i ndef dag no njofoor ne.

¹⁹ Yaam Roog a reeƭa na Kiristaa, a jofoorand adna fee fop fa xoox um, too ɓaalee tooñ den. Kaa roxond a in, i yegnitik fa lay fee no njofoor ne.

²⁰ In ndefu we Kiristaa a lulna, soo ta nand nen Roog fa xoox um na layaa fa nuun na pexey in. In we nqeɗaa a nuun no gon Kiristaa nu njaɓ o njofoorandel fa Roog.

²¹ Kiristaa fee moseerna o fi bakaad, Roog a gadnaan pakaad ke in, ndax no ten, Roog a ɗeet a in nen jofu.