2 Korint 4 - NQAARIIT NE ROOG

Halal fee refna kam mband ne

¹ I ndeɓkee muk njambaar in, yaam ne Roog a lasna a in calel keene na pexey o paaxel um.

² Kaa i njoor maana a pi a yememaar a sednooxu ke, too naanaxir leng refatee na in. I sufaalee fa lay fee Roog muk, ndaa kaa i yegnitaa ndigil ne, too mbaaƭaa naa wiin we fop a ngoolooritna a in mbaambir Roog.

³ A soƥangaa yee Yegil mbaax ne in kaa maad o muureel, o and ee kaa muurel no we na saŋkooxkaa.

⁴ Wiin weene ngimee, yaam oxe na fi’ooxaa roog na jamaane feeke kaa fuulin a qalaat den, ndax nga’kee meleƈ le na qoolaand ale no Yegil mbaax ne Kiristaa fee refna nitaal ne Roog.

⁵ Ii, refee yee a qoox in i mbaare’aa. Kiristaa Yeesu fee refna o Yaal oxe o mat i mbaare’aa, soo yegnaa a nuun ee faɗ nuun i ndefu yaam Yeesu.

⁶ Roog fee layna yee: «Fat a qoolaand ale a naag dañ kam o niɓaan ole», ten naagu dañ kam a qeeñ in, ndax ta andnoor a in o ndam onqe Roog na meleƈtaa na tagid Kiristaa.

⁷ Kaa i saq halal feene, in we ndefna pand maxte lanq, ndax katil neene jegeerna o nand inoorkee no leng na in, ndaa ta inoor na Roog.

⁸ I toroxande na seek aluu refna, ndaa i moxoñooxee muk, njaaxiɗ, ndaa i mosee o ñak yaakaar.

⁹ Kaa i nqijlandel bo, ndaa i ndeɓaand, maafel, ndaa i mosee o yaqoox.

¹⁰ Kaa i ndoxondooxaa kili fa nqon fee Yeesu took cer in, ndax o ñoow um itam a waag o laltinoox no cer in.

¹¹ In we maadna o ñoowaa, kaa i ngen no ñaaƴaa na pelyook fa nqon yaam Yeesu, ndax o ñoow Yeesu a waag o laltinoox itam no cer qooxon ke in.

¹² Ten taxu yoo, fa nqon fee kaa jalaa na in, soo o ñoow ole mat a jalaa na nuun.

¹³ A Pind a Tedu ke kaa lay ee: «Kaam gim, ten taxu um layaa!» In itam, ne i mbogna yiif leng kut no ngim onqe, kaa i ngim, ten taxu i layaa.

¹⁴ I anda yee oxe xontooxnoorna o Yaal oxe Yeesu, xan a xontooxnoor a in itam fa Yeesu, too xan a feeñil a in fa nuun paam um.

¹⁵ Keene fop xan a jeg yaam nuun, ndax yirmande fee Roog a moƴ o siw took no moƴ-o-jaak ole no wiin we, ndax ta riñ a den da ngidmaa a Roog yaam o ndam um.

Ñoowtaa o ngim onqe

¹⁶ Ten taxu i mo’nee njambaar in, too sax ke refna ngiin tafil in a yaqooxangaa, xan ngiin kam ne a saxatinaa ñaal oo ñaal.

¹⁷ Yaaga boog coono miñeer ke i ngomaa, meɗee a in, yaam o ndam o njegee nand onqe ta jagandankaa a in, too a refkaa boo faw.

¹⁸ Ke i ngorooxaa koy refee ke na yulaa a kid in, ndaa ke i mbaageerna o nga, yaam ke yulna a ngid of kaa faafaa. Ke waagaandeena o ga koy, jegee muukandoong.