2 Korint 3 - NQAARIIT NE ROOG

Calel ke no ngiɓoor nqas ne

¹ Ndax kaa i ndakooxkaa o mbakooxan a qoox in? Ndi boog, kaa i soxla’kaa nen leng-leng o lal a nuun o leetar a qeƭax mbaat o leetar o inooru na nuun?

² Nuun o mat ndefu o leetar in ole bindeena na qeeñ in, wiin we fop a mbaagna o and, a njangin.

³ Ndigil oo kañ, nuun o mat ndefu o leetar ole Kiristaa a bindna a reefandin no calel in. O leetar oleene koy bindtaand aŋkar, ndaa fo Yiif le Roog fa ñoow jok fee a bindte. O leetar oleene bindaand itam took a alfa ƥil, ndaa kaa bindel took a alfa kaa ndefna cer, kam a qeeñ nuun.

⁴ Keene refu a koolax ale i njegna na Roog na pexey Kiristaa.

⁵ Saɗaand o lay muk ee na pexey kaŋ-kaŋ in i mbi’taa tig. Kaa koy, o waag in, oxe inoora na Roog.

⁶ Roog waagnooru a in, i ndef jaajal no ngiɓoor nqas ne, reefeerna no kebil ke mbindeena ndaa no Yiif Tedu le. Kebil ke mbindeena kaa mbarnooraa, ndaa Yiif le o mat kaa ci’taa o ñoow.

⁷ Kebil ke kaa mbindel ɗelem took ɗelem na alfa ƥil, too o ndam Roog a meleƈ’a na waxtu faaga. A tagid ale Moyiis a meleƈooga boo xa taan axe Isra’el mbaag’atee o njasnoor fo ten. Yaag oo toox de, a qoolaand aleene a war’a o ñuf. Boo kebil ke andoona yee calel den na fa nqon rek a ƥisaa a njegitna neene o ndam,

⁸ yaaga nam a qoolaand ale no calel ke no Yiif Tedu le a waru o fod?

⁹ A soƥangaa yee o ndam onqe no kebil ke na njambaa wiin we fod’u neene, nam a waagu o refit boo calel ke na njofandaa wiin we mbaambir Roog ngupkiran o ndam?

¹⁰ I mbaaga o lay sax ee o ndam onqe meleƈoogna yaaga, daawree dara fo o ndam onqe ndiiki, yaam kaa hupood onqe yaaga lool.

¹¹ Yaaga boog, boo andoona yee ke miñeerna dara a jegta neene o ndam, nam ke na refkaa boo faw a hupitkeerun o ndam?

¹² Ne i njegna yaakaar neene taxu boo i njeg a koolax.

¹³ I mbi’kee nen a Moyiis fee ɗasin’ina Ii-isra’el we a tagid um fo muurax, ndax weene nga’kee muukandoong ne na qoolaand ale joon’ina a suur.

¹⁴ Kaa koy, a qalaat den kaa niɓaan, too boo xaye sax, boo da njangaa safe le no ngiɓoor eetaand ne, muurax ne oxe maadaa, too watnaand. Muurax neene, oxe watitkaa no xe fogna na Kiristaa soom.

¹⁵ Kaam ee boo no ñaal ne xaye sax, muurax ne kaa maad o singaa a qeeñ den, yaa da njangaa a safe ke Moyiis.

¹⁶ Kaa koy, o kiin a saktooxangaa me no Yaal oxe, xan muurax ne a wat, ne a Pind a Tedu ke a laytuuna.

¹⁷ O Yaal oxe refu Yiif le, too muu Yiif le no Yaal oxe a refna, maaga o jeg xoox of a refu itam.

¹⁸ In fop we andoona yee a tagid in faŋ a fi’u, kaa i meleƈtaa no ndam onqe no Yaal in. Neene, kaa i suptel, ndax i nand fo o Yaal oxe. Kaa i sutooraa no ndam, ndokaa no ndam onqaa moƴna o magin. Keene refu boog calel ke no Yaal oxe refna Yiif.