2 Korint 13 - NQAARIIT NE ROOG

A maƭax a palakaand ake Pool

¹ Kaam ee: Xam dadkandiid o jaf es me nuun. A Pind a Tedu ke a laya yee: «Kuu ɗik mbaat daduk a seede’na, xan a xen.»

² Mosaanum o lay a nuun no jaf o ɗikandeer es. Xaye fee refeeruuma meene, mexe dakooxahinan o lay a nuun, nuun we miñna na bakaad fo nuun lakas we fop ee: Boo dakooxiiduuma, wootooxkiim o leng,

³ yaam kaa nu mbaaƭaa kaa lalitna yee Kiristaa na layaa na mi, o ten oxe heeseerna mbaambir nuun, ndaa a ref o cegu katil a ndeer nuun.

⁴ A neew’a doole lool no cer um, ye ta rengeel na kurwaa, ndaa oxe ñoowaa na pexey katil ne Roog. In itam, kaa i neew doole no ten, ndaa xan i ñoowaa fo ten na pexey katil ne Roog, too xan nu nga’in.

⁵ Fat nu ngoroox o ñoowooƭ nuun boo and, ndax nu njega o ngim. Ƭeetlooxyo boog! Ndax nu anddilooxa yee Yeesu Kiristaa oxe na nuun? Kaa koy, fat a soƥ ee ƭeetlax ne refkee njom na nuun.

⁶ Kaa koy, yaakaaraam ee xan nu and ee ƭeetlax in refee njom na in.

⁷ Yaaga boog, kaa i nqeɗaa a Roog, ndax nu mbi’kee kaa ɗomna. Refee yee ndax ƭeetlax ne a ref na in o nqaaƈ, ndaa ndax nu mbaag o mbi’aa paax, a soƥangaa sax ee ƭeetlax ne in kaa ref njom na in.

⁸ Yaam kaa i njegee katil leng naa waagna o siiknoor fo ndigil ne, no ndigil ne rek i njegtan.

⁹ I neewangaa doole soo nuun o mat, nu ndef doole fa ƥor, kaa i mbelakinooxaa teen, too ke i nqeɗanaa a nuun refu nu ñak sik.

¹⁰ Ten taxu ye maaduuma o goƭaa um bindaa keene, ndax fadtiidkiim o ɗom tig me nuun, yaam sañ-sañ fee o Yaal oxe a ci’axama refee yee ndax um sañtaa, ndaa ndax um jokaa.

¹¹ Ndiiki koy fog we, fat o ɗaay a ref fa nuun! Njeemyo o njagandoox, yaalooraa, mbog xalaat, ñoowaa na jam! Yaaga Roog fee refna o mbeq fa jam xan a ref fa nuun.

¹² Naangyo o simniraa a ndeer nuun, mboonraa fo o mbeq! Gimu we fop, owe simnaa a nuun.

¹³ Yaasam yirmande fee no Yaal oxe Yeesu Kiristaa fo o mbeq onqe Roog fo njofoor ne no Yiif Tedu le a ndef fa nuun, nuun fop.