2 Korint 10 - NQAARIIT NE ROOG

Pool a xoxta calel um

¹ Mi Pool fa xoox es na xeɗooxaa a nuun na pexey o ɓuuɓel fo o paaxel ole Kiristaa, mi fee na layeel ee kaam neewaandoox na kid nuun, too ɗom tig bo na nuun yaa laqooxuuma.

² Mexe xeɗaa a nuun, ba nu taxaam o lalit o feƭar ngaar es mbaambir nuun, yaam saɗarkiim o lal o dey es we mboogna yee ngiin ƥor i ñaaƴtaa.

³ Ndigil oo fe, nen njer no kiin i ñaaƴtaa, ndaa koy i naangee o ñoxorteel ngiin in.

⁴ Yaam refee yee njer jalu ƥonax ke i ñoxorteel. Ƥonax in kaa inoor na Roog, a njeg katil boo a mbaag o njiƭit saŋe ke. Kaa i yaqaa xa ƭelem xa maamaaɓ axe,

⁵ nduguñaa a magnandax aluu na yaqanaa o and a Roog, soo tañ-tañnaa a qalaat akuu ndefna ndax da nanan a Kiristaa.

⁶ Ndiiki koy, kaa i ngeenoox took o maal nanaƭar nuu refna, cinj yaa nu lalitna o nanan o deyu sik.

⁷ Mbi’yo o ndang, too naang jak fo a kid nuun ne tikoorik ke a nandna. Oxuu ta woorna yee Kiristaa jegun, fat a ɓek no yiif um ee neene itam Kiristaa a jegtu a in.

⁸ Waagiim o jeg teen gaci yaa fakooxuuma maamu yaam sañ-sañ fee o Yaal oxe a ci’axama. Sañ-sañ feene kaa ref kaa na jokaa, ndaa refee muk kaa na sañtaa.

⁹ Bugiim muk nu mboog ee a pind es a mbara o ndiidland a nuun.

¹⁰ Yaam a jega waa na layaa yee xa leetar um kaa njeg doole, too a ñexet, ndaa a geenooxangaa fo o mem um, kaa yelefaa bo, soo fa lay um a goɓong.

¹¹ Fat oxe na layaa neene a and a paax ee jegee njektir leng no ke i mbindaa kam xa leetar axe fo ke i mbi’aa yaa i ndefna mbaambir nuun.

¹² Ten taxu, i saɗee muk o liiƥoor a kand mbaat i nandandoor leng-leng no we ndoonna a qoox den took, yaam kaa liiƥoor liiƥir a qoox den, soo a ndodooxood, yaam kaa njegee o and tus.

¹³ In o mat, i mbugee o magnandoorit kaa jolna ke ɗaapeena, ke i liiƥoorkaa fop xan a ref kaa jofna no calel ke Roog a roxodna took in, too a taxkaa boo i mbaag o mbadiid me nuun.

¹⁴ I njolkee a tet in muk nen kaa i mosee o mbadiid boo me nuun, yaam ndigil kak oo, me na nuun o mat i mbadtiidu Yegil mbaax ne Kiristaa.

¹⁵ I mbakooritkee jale no wiin lakas boo muk, too i njolkee a tet in, ndaa i yaakaara yee xan o ngim nuun a moƴ o ɓaatoox. Yaaga, xan i moƴ o mbadin calel cegu njiriiñ a ndeer nuun boo na tet in.

¹⁶ Ke i mbakooritkaa ke wiin lakas we a njalna, a taxa i nqaynik Yegil mbaax ne no caate ke ndefna kaltaa nuun.

¹⁷ Ten taxu a Pind a Tedu ke a laya yee: «Fat oxe na fakooxaa, a fakoorit o Yaal oxe.»

¹⁸ Oxe na layooxaa yee mi yoo naagee o refaa muk oxe na jileel, ndaa oxe o Yaal oxe a jooxna soom.