1 Timote 6 - NQAARIIT NE ROOG

¹ Fat fop we andoona yee kaa mbi’el faɗ, a niw yaal pind den. Neene, gon Roog fo a cangin ale na Pind a Tedu ke mbenkaand.

² Fat fop we andoona yee yaal pind den a ngima, a mbañ o nqeef yaal den weene, ee yaam a ndamtin na: «Fog i ndefu.» Fat a moƴ o njalan a den sax, yaam ne da ndefna wiin gimu, too a ndefat waa na mbaaƭaa maa da mbi’anitna a den paax. Jangni keene, too maƭin wiin we.

A cangin a maamaaɓ ake fo halal fa ndiindigil fee

³ A soƥangaa yee kaa jeg oxaa na jangnaa kaa refeerna ndigil, soo a fañ o dam na ƭelem a ñoow ake no Yaal in Yeesu Kiristaa, a fañ itam ke na jangneel no reef a Roog,

⁴ oxeene kiin kaa magnandooxaa, too andee dara boo dara a fag. Kaa jir, laamit ñaku xoox a damin, ta dapaa fa lay, a dapatinan. Meene o mat, ciisir ke fo qasir ke fo a ben ake fo fooganaa o kiin paaxeer, a ngatu.

⁵ Meene ñimatir ke no wiin we ñakatna a yiif a ndefu, ndigil a daɗ a den, da mboog ee o reef a Roog baaƭir xaaliis oo.

⁶ Kaa koy, ndigil kak oo: O reef a Roog a cur halal oo, yaa deyƭooroona ke jegoona.

⁷ Yaam i ƥisiidee dara, ye i ngaraa na adna fee, too a woora yee bo i ndetaa, i ƥislooxkee dara.

⁸ Ii, yaaga koy, i njegangaa ñaamel fo ñirax, a wara o dey a in sik.

⁹ We na kasaƥ-kasaƥnaa na halal, a naanga o yenaa no mbog fo na yuxum akaa o leng a andeerna xoox um fo a caf um. A yuxum akeene koy na njogolaa wiin we no luubax fo na saŋkax.

¹⁰ No fex xaaliis, paaxeer kuu ndefna a ngataa. A jega koy waa andoona yee owaa njegan, a ngoƭ o ngim onqe, soo a yenan a qoox den no coono kaa o leng a saɗeerna o ga.

A maƭax

¹¹ Wo o mat, wo fee refna o kiin Roog, ƴufi keene. Waaƭki maa o cofel a farna, ten fo o reef a Roog fo o ngim fo o mbeq fo o muñ fo o ɓuuɓ.

¹² Fat o gomrel ngomir mbaax ne o ngim a laamitna. Dami no ñoow o fagkeer ole taxna o xoyel, too o weejlitin o ngim of, wiin mayu a seede’in.

¹³ Mbaambir Roog fee na ñoownaa kuu refna fo mbaambir Kiristaa Yeesu fee lay’ina ndigil nqoolu qac maa Poons Pilaat, mexe heblang,

¹⁴ o geek kebil ne a paax, ñoowaa o ñoow o jegee gak leng mbaat ŋañel, boo yaa o Yaal in Yeesu Kiristaa a feeñkaa.

¹⁵ Yaa hap fee a fadna rek, Roog a ɓisiidkan. Roog feene refu o leng kut oxe jegna katil, a hel o simatel, a ref o Maad oxe no maad we fo o Yaal oxe no yaal we.

¹⁶ Roog soom xonkeeru. Kaa gen na qoolaand alaa o leng a waageerna o fad. O leng mosiran o ga, too o leng waagiran o doon a ngid sax. O ten soom jegu o niwel fa katil mbagkeer. Amiini.

¹⁷ Maƭooxi we ndefna yaal kalal ke ndiiki, ndax magnandooxkee, too a mbañ o ƥek yaakaar den na halal fa ngenee sen. Layi a den koy, da ndoon yaakaar den na Roog, ten fee na cooxaa a in fop, a mayƭandin boo muut, ndax i mbelakinoorin.

¹⁸ Regdinooxi a den, da mbi’aa paax, a ndef siide na pi a paax, kam den a yaaj, da nqaajraa fo lakas we ke da njegna.

¹⁹ Neene, xan a mbokatanaa a qoox den halal fa mbaax fa ndoone no saƭku yaam o feet, ndax da ndam no ñoow o ndiindigil ole.

²⁰ Koo Timote, geeki ke doxnee’oona, too wootoox fa lay fa ngoɓong faa guutatirna fo o ngim onqe. Wootooxi itam qasir ke inoorna no ke na xoyeel o and ole, too refiran.

²¹ Leng-leng a ndoka teen, too a mbesa o ngim onqe a cinj. Yaasam yirmande Roog a ref fa nuun!