1 Timote 5 - NQAARIIT NE ROOG

Ke i mbarna o ndeer fo gimu we

¹ Ba o xasan a koorgi nqasan ƭomu, ndaa fat o umbaa fiɗel o ngim um boo wee ndax kaa ref nen a faap of sax, xa pes axe o fesooraa fa den nen fog of,

² rew maak we nen yaay, we maakeerna teen, o ɗeet a den nen jigeen fo yiif xoolu.

³ Niwi ñaaw we yoqna koƭong, too njegee oxaa geenooxna a den.

⁴ A soƥangaa koy ee o ñaaw oxe kaa jeg xa ƥiy mbaat xa taan axaa ngeenooxuuna, wiin we no ƥasil neene a mbara o lalit ee kaa ndeefaa a Roog. A mbara o ngeenoox a paax we ngeenoox’ina a den yaaga mbaagoodee dara. Kaaga kaa felna a Roog tigi yoo.

⁵ Oxe andoona koy ee o ñaaw oxaa yoqna koƭong, too jegee oxaa geenooxuuna yoo, a wara o doon yaakaar um na Roog, a gen ñaal fo o yeng na qeƭ, a xeɗooxaa itam.

⁶ O ñaaw oxe andoona koy ee kaa ñoowaa na baneex, kaa xon ɗoŋ, ke ta xuƥaa fop oo.

⁷ Yegni a den keene, ndax njegkee ŋañel.

⁸ A soƥangaa yee o kiin topatooxee wiin um, a eetit no ƥasil um, oxeene a goƭatira fo o kimu, too ten moƴu faaxaƭar o kimeer.

⁹ Boo o ñaaw a waagaa o fog no ñaaw we na njalanaa o Yaal oxe, a wara o jeg xa kiid qarɓeen ɓetuu fa leng. Fat a ref itam oxaa andoona yee naa ta moofu, no kor o leng kut a damoox’u.

¹⁰ Fat a andtel a pi a paax, a mos o yaraa xa teɓandoong, a genaroogu we ngaroogna no mbind den, a ɓoganaa tedu we a caf den, a ƴufgaa we ndefna no torox, a fi’aa paax kuu ndefna.

¹¹ Ba o jaɓ o ɓek muk ñaaw we maadna o ndefaa no ndeƥandoong den kam calel keene, yaam a miñ miñ yaa a yuxum a rokkaa a den, xan a mbes a Kiristaa a cinj, a mbug o ndoloox,

¹² too maaga xan a tooñ, yaam ke da eetna o ndaaɓoox mbaambir Roog, kaa mbesin a cinj.

¹³ Neene koy, a njegatangee maa da ndamna, xan a ndalfoox o ndef no ndokaa, a sutooxaa. Ndamkee soom no ñak maa da ndamlooxna, ndaa xan a mayat fa lay, a yuuɓanaa lakas we kaa o leng a andeerna, a layaa kaa a ƭat den a yongeerna.

¹⁴ Kaam bug boog ñaaw we maadna o ndefaa no ndeƥandoong den a ndolookatin, a njegik xa ƥiy, a topatooxaa pind den, too a mbañ o ci fañ in kaa da ŋañitna a in.

¹⁵ A ñofa boo a jeg na den waa mbesna o ngim onqe a cinj, soo a ndamoox na Saytaane.

¹⁶ A soƥangaa yee o kiin o kimu, ta ref o koor mbaat o tew, kaa jeg o ñaaw oxaa refna o pog um, fat a topatooxin a paax. Baa mbokatax ne no gimu we a gadneel o ten. A fi’tange neene, xan mbokatax ne no gimu we a waag o geleeroox, a faambir fo we ndefna ñaaw, too mbaagoodee dara.

¹⁷ Maak we no mbokatax ne no gimu we ndefna aa-adax faax mbaru o ngup ndabid, moƴtaa sax we na mbaare’aa, a njangnaa,

¹⁸ yaam a Pind a Tedu ke kaa lay ee: «Baa nqoox ne na sugaa a suunjuuñel», too «Ndabid a wara o caajal.»

¹⁹ Ba o jaɓ muk kaa o maak na jangu fee a jambeel, a refangee kaa ɗik mbaat daduk a maadin.

²⁰ We ngenna no mbakaadaa, fat o xasanaa a den mbaambir no fop, ndax lakas we a saɗar o mbi leng kut ke.

²¹ Mexe gaañtang kene mbaambir Roog fo mbaambir Kiristaa Yeesu fo mbaambir malaaka tedu ke: Ngela horooxi keene. Fat o fañ o lay dara yaa ga’afuleeroona tig, too ba o farit o leng itam.

²² Fat o fi o ndang yaa o doonaa o kiin xa ƥay, yaam o bug o roxondin o far kam mbokatax ne no gimu we. Ba o ñofandooxin muk, too ba o fokatoor fo lakas we na bakaad den. Yufti a xoox of, waaƭ o tedel.

²³ Ba o dam na foofi soom, yeraa. Waagaa o jangaa o ndik na biiñ, yaam ne o fud ole wo a mayna ke ta jom’andang.

²⁴ A jega koy pakaad no leng-leng kaa mbaageena o nga a qool qac, boo o kiin a helko fo hate’aa a den sax. A jega itam lakas waa mbaagaandeena o andan dara, a refangee yaa ta miñna.

²⁵ Keenee-keenee, a pi a paax ake itam, kaa nqool qac, too ake mbaagaandeena o nga ndak fo ndak, mbaagee o ƭas boo xoo.