1 Tesalonik 4 - NQAARIIT NE ROOG

A tegdinax no kaa farna no tedel

¹ No lakas ke koy, fog we, nu njangta na in ne nu mbarna o ñaaƴit boo mbaag o mbel a Roog, too meene sax a koorgoorlax nuun a refu. In we nqeɗan a nuun, too in we ndegdinooxan a nuun no gon le no Yaal oxe Yeesu: Moƴyo o ngoorgoorloox boog!

² Nu andata boog maƭax ne i cooxna a nuun, ta hat no Yaal oxe Yeesu.

³ Ke Roog a bugna kañ refu nu ted, too nu mbootoox ceeq.

⁴ Keene kaa tekit ee oxuu refna na nuun a wara o jil o tew kam o tedel fo no ngor,

⁵ a fañ a yaaw a pagkatar a sufoox took um, ne da ndalitna took gimaƭaru we andeerna a Roog.

⁶ No keene, ba o leng na nuun a tooñ o pog um o kimu mbaat ta jaɓ o teem, yaam i lay’aan, too maƭooxin a nuun boo ƈut, xan o Yaal oxe a dalin hate no keene fop.

⁷ Yaam Roog xoyee a in, i mbi’aa caasaay, ndaa ndax i ted.

⁸ Yaaga boog, oxuu andoona koy ee kaa fañ bargal keene, refee yee o kiin a deɓu, ndaa Roog fee ci’na a nuun Yiif Tedu le ten.

⁹ Soxla’ee nu mbindel kaa farna no ne nu mbarna o mbexrit a ndeer nuun, yaam nu njangtaan na Roog.

¹⁰ Keene sax refu o mbeq onqe nu njegna a ndeer no fog gimu we Makedoni fop, ndaa koy fog we, in we nqeɗaa a nuun a koorgoorlax nuun a moƴ o jof mbaambir.

¹¹ Kaam ee fat ngoora nuun a ref no ñoowaa na jam fa jam, topatooxaa calel nuun, ñoowtaa onj nuun ne i ngeblituuna a nuun,

¹² ndax nu ndef wiin waa a pesoorooƭ den a jofna mbaambir no gimeer we. Neene, nu ngaɗkee a qoox nuun no leng.

A kar ale no Yaal oxe

¹³ Fog we, i mbuga o andnoor a nuun kaa farna no we nqonna, yaam ndik nu naqadilooxaa nen lakas we njegeerna yaakaar.

¹⁴ Yaam ne i ngimna yee Yeesu a xona, a xontoox, fat i ngim itam ee: Xan Roog a xontooxnoorandoor fa Yeesu we nqonna, too a ngim’u no ten.

¹⁵ Kene refu ke i mbeeñlaa a nuun, too ta hat no Yaal oxe: In we maadna o ñoowaa, boo yaa o Yaal oxe a nomtooxiidkaa, refee yee in na adooxkaa we nqonna.

¹⁶ Xan o Yaal oxe fa xoox um a fangoox. Xan i nan o ñuxur no leng no kelfa ke no malaaka ke, soo a luuƥ ale Roog a jibit na asamaan. A koom, xan o Yaal oxe fa xoox um a fudoortiid na asamaan, soo we nqonna no ngim na Kiristaa a eet o nqontoox.

¹⁷ Cinj kaaga, in we ta soƥkaa i ñoowaa, xan i yoɗooxandoor fa den kam a eel ake, nqetik fo o Yaal oxe took, soo ndef fo ten boo kili.

¹⁸ Yaaga boog, fat nu yaaloortaa a ƭelem akeene.