1 Tesalonik 2 - NQAARIIT NE ROOG

Calel ke Pool kam Tesalonik

¹ Fog es, nu andooda yee i ñaaƴiidee o jaf kasaara me nuun.

² Nu anda itam ee ye i ngelkaa fo ngar me nuun, i ñagadil’e, mbenel kam teeru fee Filip. Kaa koy, Roog a ci’’a a in njambaar, ndax i yegniid a nuun Yegil mbaax ne ten, ke i mbañ’eena fop oo.

³ Waare in no kaa farna na Roog hatee na nax mbaat no tig lakas qooleer mbaat no ƈiƴit.

⁴ Kaa koy, Roog kaa ɗeet a in soom nen waa ngatilna Yegil mbaax ne, soo a doxnin a in. Refee yee kaa i layaa, ndax i mbel wiin we, ndaa Roog fee na horooxaa a qeeñ in.

⁵ Ne nu andtuuna, i mosee o saq fa lay fa koocir fa leng, too i mosee o mbaare’aa, ndax i njegit teen xaaliis. Roog a seede’a a in no keene sax.

^6-7 Yaag oo toox de, nen waa Kiristaa a lulna i mbaag’a o ngeblaa a nuun fa doole, ndaa i mbi’iran, yaam i mbaaƭee o ndam onqaa inoorna no wiin we, refee me nuun, too refee mbaambir no lakas we. Kaa i ƥuuɓ’u kañ, yaa i ndefna a ndeer nuun, boo ne o ƥasil a teeteeltaa xa ƥeem.

⁸ No mbeq o mat i mbugu o cooxit a nuun, refee Yegil mbaax ne Roog soom, ndaa o ñoow in sax, yaam kaa nu ndalood na qeeñ in.

⁹ Fog es, ƥekyo na yiif nuun ne i njalitna kam coono ñaal fo o yeng, ndax i ndoxondkee o leng na nuun a toq in, ye nu mbaare’eel Yegil mbaax ne Roog.

¹⁰ A woora a nuun, too a woora a Roog itam ee a pesoorooƭ in mbaambir nuun we ngimna a lewa, a jof too a ñak ŋañel.

¹¹ Nu anda itam ee i ndeera fo xuu refna na nuun bargal ke ngelna a faap, a ndeer um fo xa ƥeem.

¹² Nu yaale, saƭakinel, njangnel, ndax nu mbaag o ndeef a Roog ne ta bugtuuna, ten fee na xoyaa a nuun kam maat um fo no ndam um.

¹³ Ten taxu, i ngen no ƥoxotaa a Roog o ngidim, yaam nu ndamtee Yegil mbaax ne ten i nannoorna, nen fa lay faa sutoorna no don no kiin soom. Kaa nu ndamtin nen fa lay fa ndigil fee Roog. Fa lay feene koy na jalaa kam a qeeñ nuun, nuun we ngimna.

¹⁴ Fog es, kaa nu nand ndiiki fo pokatax ke no we ngimna no Yaal oxe Kiristaa Yeesu ndefna kam Yudee. Gentand nuun ŋaƈit a toroxanda a nuun, ne Yaawuur we a toroxandit’ina pokatax keene.

¹⁵ Yaawuur weene o mat mbarnooru o Yaal oxe Yeesu, a mbarnoor duleer we itam, soo a ñagadil a in. Den weene koy, mbelee a Roog, a ndef fañ no wiin we fop.

¹⁶ Kaa ndikaand a in, ndax i mbaagkee o mbaare we ndefeerna Yaawuur boo da njeg a muc ale. Keene koy, mayƭandu eedir ke saqna pakaad ke da mosna o mbi. Ten taxu a qaw ale Roog a dalat took den boo faw.

Pool a buga o nomtoox Tesalonik

¹⁷ Nuun koy o fog o goƭu le, a miña lool too i nqalatooree. Kaa koy, a qeeñ in mo’ree. A yiif in a ndeeƭa no nga’ahin a tagid nuun, too i mbi’a pexey in fop, ndax i mbaag o ngar.

¹⁸ Neene o mat i mbug’u o ƭeettiid a nuun. Mi Pool, um waaj’u keene jaf leng, boo na ƭak sax, ndaa Saytaane a kala a in.

¹⁹ Kaam ee, an i yaakaaru o njegit no ten o ɗaay fo a kañax nen o ndip? Mee ndax nuun soom a refkaa mbaambir no Yaal in Yeesu, na waxtu fee ta nomtooxiidkaa?

²⁰ Ii, nuun o mat ndefu o ndam in fo o ɗaay in.