1 Tesalonik 1 - NQAARIIT NE ROOG

Simin ne

¹ Mi Pool fa Silwe fa Timote na mbindaa a nuun o leetar oleeke. Kaa i simnaa a nuun, nuun mbokatax ne no gimu we kam teeru fee Tesalonik, mbogna na Roog Faap fee fo no Yaal in Yeesu Kiristaa. Koo yaasam nu njeg yirmande fa jam.

O ñoow ole fo o ngim onqe no Teetesalonik we

² Kaa i ngen no ngidmanaa a nuun a Roog, nuun fop, yaa i nqeɗanaa a nuun.

³ I ñakee o mbetandooxaa a nuun na qeƭ in mbaambir Roog Faap in yaam o ngim nuun o laltinooxu nqe fo o mbeq onqe nuun na jaflaxnooraa a nuun fo yaakaar mbooru ne nu njegna no Yaal in Yeesu Kiristaa.

⁴ Nuun o fog ole Roog a fexna fex, i anda yee nu njile,

⁵ yaam nu ndamtee Yegil mbaax ne in nen fa lay fa ƥor soom. Kaa nu ndaawtin na doole fee no Yiif Tedu le, too njaɓ ee ndigil saƭku koŋ oo. Yaaga boog nu anda ne i mbesoorna a ndeer nuun yaam o njiriiñ nuun.

⁶ Nu ndefata we na laalaa a in tigi, soo laalaa o Yaal oxe. Ke fa lay um a ɓisiidna ɓisiid coono fop oo, yaqanee nu njaɓaan fo o ɗaay ole Yiif Tedu le a ci’taa.

⁷ Ten taxu, nu ndefata o ɗeendoor mbaambir no wiin gimu we no jegel ole Makedoni fop fo no we no jegel ole Akayi,

⁸ yaam fa lay fee no Yaal oxe a jaaƥatiloortiida na nuun. Fa lay feene dayee soom kam Makedoni fa Akayi, ndaa o ngim nuun na Roog a nannooka muu refna. Keene koy, o layatan sax, caali yoo na in.

⁹ Fop kaa laytaa ne nu ndalnit’ina a in fo ne nu mbesitna a cinj tefee Roog ke nu mbaɗooxoogna, soo ngeleeroox, ndax nu mbaɗooxaa a Roog fa ndigil fee na ñoowaa,

¹⁰ cungaa yaa o Ƥeenqe ten a inoortiidkaa na asamaan. O Ƥeem onqeene koy, Roog a xontooxnooraan a ndeer no xon we. Ten refu Yeesu fee na wataa a in na qaw ale Roog na garaa.