1 Sami’el 9 - NQAARIIT NE ROOG

Sawul fo xa paam xa tew xa mo’u xe

¹ Na jamaane faaga, a jeg’a o koor oxaa gen’ina no saax laa Bensame. Kiis a ne’’e, a ref o ƥiy Abi’el, Abi’el a ref o ƥiy Seroor, Seroor a ref o ƥiy Bekoorat, Bekoorat a ref o ƥiy Afiyax fee fogna na carind ale Bensame. O koor o cegu halal a reeƭu.

² O koor oxeene a jeg’a o ƥiy onqaa ne’’eena Sawul, a ref o fes o mosu. Jeg’ee oxaa mosit’ina nen o ten a ndeer no Ii-isra’el we fop, too ten moƴ’u o jigid a den.

³ Xa paam xa tew axe Kiis fee baa Sawul kaa mo’’u, soo Kiis a lay a Sawul fee o ƥeem ee: «Jangi o leng no dag we, nu mbaaƭik xa paam axe.»

⁴ A nqaaña xa coong axaa Efrayim, a nqaañ o jegel olaa Salisa too nga’ee a den. A nqaaña o jegel olaa Saliim, too dara, a nqaañ o jegel olaa Bensame, nga’ahinee a den.

⁵ Ye da mbadiidna no jegel olaa Suuf, Sawul a laya o tag um oxe yoon’ina fo ten ee: «Gari i nomtoox, yaam ndik faap es a weecat xa paam axe soo a jambataa a in.»

⁶ O tag oxaa a doonaan ee: «Mee ndax sax a jega o kiin Roog oxaa genna na teeru fene i mbaambirna, too o kiin o cegu gon oo. Ke ta layaa fop, dara nee wataa teen. Fat i ndet maa ten. Xeƈa xan a lal a in a ƭat ale i mbarna o nqot.»

⁷ Sawul a laya o tag oxaa ten ee: «I ndetangaa o mat, xar i cooxkaa o kiin Roog oxaaga, yaam i njegatee mbuuru leng no poxos ke in, too i saqee dara lakas kaa i cooxuuna. Ndi kaa i yoqiɗ tig boog?»

⁸ O tag oxaa a doona a Sawul ee: «Jegaam meeke o nqanjar xaaliis fa nqoolu. Xam cooxin o kiin Roog oxaaga, ndax ta lal a in a ƭat ale i mbarna o nqot.»

^9-11 Sawul a laya o tag oxaa ten ee: «Ke layoona a faaxa lool. Gari i ndet.» Naaga, a ndeta na teeru faa o kiin Roog oxaa a gen’ina. Ye da ŋaayaa na teeru faa, a nqeta fo roog waa ƈeewkoogna. A laamta a den ee: «Ndax o ƭeet oxe xey meen?» (Yaa fa yaaga kam Isra’el, o kiin oxe ga’rikoogna fa Roog kaa layoogu yee: «Fat i ndet maa no ƭeet oxaa», yaam oxe i nqoyaa ndiiki o tuleer Roog, kaa xoyoogel yaaga o ƭeet.)

¹² Roog we a ndoona a den ee: «Ii, oxey meen, adoortee a nuun pooru sax. Yaangyo ndiiki! Kaa gar na teeru fee xaye, yaam ne xeet fee a mbarna o ƥoxot sadax no jul ole no ñaang sadaxand laa.

¹³ Nu mbadangaa kam teeru fee, xan nu soƥin maaga boo ta helko fo ŋaayaa no jul ole no ñaang sadaxand laa, ndax ta ñaam. O leng ñaamkee a refangee kaa gar boo a barke sadax fee, soo we nqureena a sogkaa o ñaam. Yaangyo boog, xan nu soƥin maaga ndiiki.»

Sawul a xeta fa Sami’el

¹⁴ A nqota a ƭat den. Ye da ndokiidaa na teeru fee, a nqeta fa Sami’el ta sutooxiidaa, ndax ta ret no jul ole no ñaang sadaxand laa.

¹⁵ Na faak faa, yaaga Sawul garafulee, o Yaal oxe a yegin’a a Sami’el ee:

¹⁶ «O feet na waxtu fene, xam lultiidong o kiin oxaa fogna na carind ale Bensame. Fat o ɗuumin, ndax ta ɗox a Isra’el fee xeet es. Ten na mucilkaa xeet es na xa ƥay no Fiifilista we, yaam ga’aam naqad den, too xa iin den a mbadiida boo me mi.»

¹⁷ Ye Sami’el a ga’na a Sawul, o Yaal oxe a yegnaan ee: «Oxeene refu o kiin oxe ne’oogoonga. Ten o mat na maadooxankaa xeet es.»

¹⁸ Sawul a matiida a Sami’el no don-maax ole na teeru faa, a laamtin ee: «Kaam xeɗang o lalaam mbind ne no ƭeet oxe.»

¹⁹ Sami’el a doona a Sawul ee: «Mi refu o ƭeet oxe. Gari ŋaay fa mi no jul ole no ñaang sadaxand laa. Xaye fa mi nu mbogkaa o roon. O feet nqes, bo um xaƴaa a nuun nu ndet xam xooldandong fop ke o laamtaa.

²⁰ Ba o jaaxiɗ na xa paam axe mo’na boo a njeg ñaal tadik xaye. A mbeeña. Kaam ee an jegu ke moƴna o jeg o njiriiñ kam Isra’el fop? Mee ndax wo fo ƥasil ne faap of njegun.»

²¹ Sawul a doonaan ee: «Xeƈa kaa fogatiim na carind ale Bensame moƴna o neew na carind ake Isra’el fop? A qaw ale in itam, ndax kaa moƴee o neew na qaw ake na carind ale Bensame? Xar taxu boog o layaxam keene?»

²² Sami’el a janga a Sawul fo o tag um, a ɓis a den kam a ndok alaa na ñaamteel, a moofin a den mbaambir no lakas we nqureena too a mbi’’u ngap wiin qarɓeen tadik.

²³ Sami’el a laya oxe jawoogna yee: «Diƈiidi a las ale coox’oonga, layong o kesanaam o ten.»

²⁴ O caajaw oxaa a xota a ñaal ale fa falaari fee, a diƈ a den mbaambir Sawul. Maaga, Sami’el a laya a Sawul ee: «Keeke refu ke kes’eena, a diƈe mbaambir of. Ñaameen, yaam wo a geekan’e na xew fene xuruuma xeet fee.» Neene, Sawul a ñaama fa Sami’el no ñaal naaga.

²⁵ A mbudooxiida no jul ole no ñaang sadaxand laa, a ngar kam teeru faa, soo Sami’el a jeetaay fa Sawul took taax naa.

Sami’el a doda a Sawul o maad Isra’el

²⁶ No feet nqes olaa, no mbuyukuun naa, Sami’el a xoya a Sawul fee reeƭna took taax naa, a layin ee: «Inooxi, xam weltong o ret.» Sawul a inooxa, da sutooxiid no mbed onqe, den ɗik.

²⁷ Ye da ngarna boo a sutooxaa teeru faa, Sami’el a laya a Sawul ee: «Layi o tag oxe wo ta adoox a in.» Oxaaga a dalfooxa o adoox a den. Sami’el a layahinaan ee: «Ndiiki koy, geenooxi o ndik, boo um yegnong ke Roog a layna.»