1 Sami’el 4 - NQAARIIT NE ROOG

¹ Sami’el a yegnooga xeet fee Isra’el fop fa lay um. Bes, Ii-isra’el we a inooxa, a nqetik fo Fiifilista we, ndax da ñoxor fa den. Paam Eben-Eseer a ndal’u, Fiifilista we o mat, a ndal Afeq.

Fañ we a njaɓa arka ne no ngiɓoor ne

² Fiifilista we kaa mbapooxan’u Ii-isra’el we, a ñoq alaa yee kur. A nqawa Ii-isra’el we boo a mbarit no qol xire laa ngap goor cuni nahik.

³ Ye we maad’ina o ñoowaa no Ii-isra’el we a ƈufiidna no ƭiif ke den, maak we Isra’el a laamtirooga yee: «Xar taxu o Yaal oxe a fi boo Fiifilista we a nduguñ a in xaye? Ndiiki koy, ngaryo i ƈuf Silo, nqotik arka ne no ngiɓoor ne no Yaal oxe, yaam boo ta refna a ndeer in, xan a mucil a in na xa ƥay no fañ in.»

⁴ A ndalfooxa o lul wiin Silo, da ƈuf a nqotik arka ne no ngiɓoor ne no Yaal oxe Hupna fop, too pindel yeeyetax ƭik a ndeegoox uum-maamaad le ten. Xa ƥiy xa ƭaq axe Eeli ndefna Hofni fa Finees a yooniid’a fo arka ne no ngiɓoor ne Roog.

⁵ Ye da ndokiidna fo arka ne no ngiɓoor ne no Yaal oxe no saŋe ne no Ii-isra’el we, den fop a ndalfooxa o ƈeel a maak boo lanq ke a yo’noox.

⁶ Ye Fiifilista we a nanna xa ƈeel xa maak axeene, a layrooga yee: «Xar xa ƈeel xa maak axene no saŋe ne no Hebre we a tektu?» Ye da yegna yee arka ne no Yaal oxe a gara no saŋe ne no Ii-isra’el we,

⁷ a ndiida ƭomu, yaam kaa nqalaatoogu yee: «Roog a gara no saŋe ne no Ii-isra’el we. Reeƭee meen, ndaa ndiiki a gara, ten taxu sabab a dala a in.

⁸ Sabab took in! An na mucilkaa a in boog no ɓay ole na Roog fa mayu katil feene? Roog feene mat refu fee xawit’ina Miimisira waa fo taamaala fuu refna kam a koƥ-a-ƥor alaa.

⁹ In Fiifilista we, fat i saƭakinoox too ndef goor, yaam ndik i ndefik faɗ no Hebre we, ne da ndefit’uuna na in. Fat i ñoxorel boog fo njambaar ndeyu sik.»

¹⁰ Maaga, Fiifilista waa a ndoka na ñoq alaa, a nqaw Ii-isra’el we boo da ƈuf kam ƭiif kaa den. A qaw ale den fo Ii-isra’el we a ɗom’a lool, yaam xiixire cuni qarɓeen tadik a mbar’e no Ii-isra’el we.

¹¹ Fiifilista we a njaɓa arka ne Roog, soo xa ƥiy xa ƭaq axe Eeli, ndefna Hofni fa Finees, a nqon.

Eeli, o saasadax oxe a xona

¹² No ñaal leng kut ne, o koor oxaa fogna na carind ale Bensame a ƴuftiida na ñoq alaaga, a gar Silo. Kaa faar’u toki um fop, a yipoox fo ut took xoox um, yaam a naqadiloox.

¹³ Ye ta fadiidna, kaa jopir Eeli a moof no duɗand um paam a ƭat ale, a tayaa o nan kaa farna no arka ne Roog. O koor oxaa a rokiida kam teeru faa soo a yegnit ke xew’ina. Maaga, teeru faa fop a mboygooxa, a ndef no mbaɗooxaa.

¹⁴ Ye Eeli a nanna xa paɗax axe, a laamta yee: «Xar wiin we mbuuqaa?» O koor oxaa a ñofa o gar, a yegin a Eeli ke xew’ina.

¹⁵ Eeli koy, xa kiid qarɓeen ɓetuu nahik fo xa kiid ɓetaa tadaq a jeg’u too kaa femek’el boo waagatee o ga tus.

¹⁶ O koor oxaa a layaan ee: «Na ñoq alaa inoorum neeke too kaam ƴufiid sax.» Eeli a laamtaan ee: «O ƥees, xar xewu?»

¹⁷ Oxe lul’eena a doonaan ee: «Ii-isra’el we kaa ƈuf mbaambir no Fiifilista waa, yaam a qaw a ƭomu a nqawe, too sax xa ƥeef xa ƭaq axe ndefna Hofni fa Finees a nqona, soo arka ne Roog a jaɓel.»

¹⁸ Ye oxe lul’eena a ne’na gon arka ne Roog rek, Eeli a ɗatoortiida me ta moof’ina, a yen ndaxaan paam o don-maax ole no Mbind tedu ne. Naaga, o ɗuk ole ten a gefa soo ta xon, yaam kaa nogoy’u, a doon teen a meɗ. Ten koy, a reeƭa o kaahate kam Isra’el boo xa kiid qarɓeen nahik.

¹⁹ O seemir Eeli oxaa reeƭna o tew Finees o bodeer a reeƭu too a mat a pe um. Ye ta yegna yee Fiifilista waa a njaɓa arka ne Roog, soo o seemir um fo o kor um a nqon, a refa no gaajooxaa, a tuuƭoox boo neen a ñootu.

²⁰ Ne ta meeñoogna, rew we ndeeƭna paam um a layaan ee: «Saƭakinooxi, ñootaa o ƥiy o ngoor.» Ten o mat doonee dara too xaƴee teen yiif um,

²¹ ndaa a laya yee: «Ne o ndam onqe a sutooxna Isra’el, xam ne o nqeq onqe Ikabood.» A ne’aan gon leene yaam ne arka ne Roog a jaɓ’eena fo ne o seemir um fo o kor um a nqon’ina.

²² A laya yee: «Keene a woora, o ndam onqe a sutooxa a Isra’el, yaam arka ne Roog a jaɓe.»