1 Sami’el 3 - NQAARIIT NE ROOG

¹ Sami’el, o ndeɓandoong onqe, a reeƭa paam Eeli, a jalanaa o Yaal oxe. No camaane kaaga a jafeñ’a lool, ndax o Yaal oxe a feeñoox o kiin mbaat ta lay fo ten.

Roog a doda a Sami’el o tuleer

² Na pe a leng kut akaaga, Eeli fee femek’eena boo waagatee a ka, a wondooxa o yeng no njong um.

³ Sami’el koy, kam Mbind ne no Yaal oxe a wondoox’u me arka ne Roog a reeƭna, too o lampa le kam Mbind Roog naa a maad’a o xoolandaa.

⁴ Maaga, o Yaal oxe a xoya a Sami’el. Sami’el a jaaɓa yee: «Oow, mexey!»

⁵ A dalfooxa o naag daket, a ƴuf maa Eeli, a layin ee: «Wo na xoyaxam? Garaam de!» Eeli a doonaan ee: «Ha’aa, xoyiroong de, nomtooxi wondoox.» Sami’el a wondookatin.

⁶ O Yaal oxe a ɓaata o xoy a Sami’el, ta inoox, a ret maa Eeli, a layin ee: «Wo na xoyaxam? Garaam de!» Eeli a doonaan ee: «O ƥees, xoyiroong de, nomtooxi wondoox.»

⁷ Sami’el and’afulee o Yaal oxe, yaam mos’iran o feeñoox kom leng, a layaa fo ten.

⁸ O Yaal oxe a ɓaata o xoy a Sami’el jaf dadkandeer. Sami’el a dakooxa o inoox, a ret maa Eeli, a layin ee: «Wo na xoyaxam? Garaam de.» Maaga, Eeli a andata yee o Yaal oxe na xoyaa o goor ole,

⁹ too a layaan ee: «Ndiiki, wondookatini, too no jaf le na garaa o xoyatange, fat o lay ee: ‹O Yaal oxe, layi, mexey nan-gilooxang, mi fee o paɗ of!› » Sami’el a wondookatina no njong um.

¹⁰ O Yaal oxe a gara, a geenoox maaga, a xoyahinin nen eetaand ke yee: «Sami’el, Sami’el oow!» O goor ole a doonaan ee: «Layi, mexey nan-gilooxang, mi fee o paɗ of.»

¹¹ Naaga, o Yaal oxe a laya a Sami’el ee: «Xam fi kam Isra’el kaa na foɗaxinkaa nof no we na nankan fop.

¹² No ñaal naaga, xam fadin a qaw ale mi took Eeli fo mbind um fop, too saganitkiim teen dara.

¹³ Maƭooxaam a Eeli yee xam gen no xawaa ƥasil um yaam tooñ um. Xa ƥeem kaa mbenaam, ta andin boo a ƴut, soo a xaƴ a den teen.

¹⁴ Ten taxu um daaɓoox ee no ƥasil ne Eeli, ta ref sadax mbaat ci’it, dara teen waagkee o tax pakaad den a mbeecel.»

¹⁵ Ye Sami’el a wondooxna boo no nqes naa, a weta begax ke no Mbind ne no Yaal oxe. Kaa saɗaroogu o wetandoox a Eeli ke ta layeena kam mbeeñax ne ten.

¹⁶ Kaa koy, Eeli a xoyaan, a layin ee: «O ƥees, Sami’el!» A jaaɓa yee: «Oow, mexey.»

¹⁷ Eeli a laamtaan ee: «Xar o Yaal oxe a layong? Layaam, too ba o ɗasnaam teen dara. Boo ɗasnaxamoona teen o ɗelem o leng sax, yaasam Roog a halakong.»

¹⁸ Naaga, Sami’el a wetandooxaan fop too ɗasnee teen dara. Eeli a laya yee: «Ten refu o Yaal oxe, fat a fi ke jofooxuuna.»

¹⁹ Sami’el a maakooga. O Yaal oxe a reeƭa fo ten, too xaƴoogee o ɗelem o leng a fe a koƥ na xa ɗelem axe Sami’el a layoogna fop.

²⁰ Xeet fee Isra’el fop, ke xottoonga Dan boo a damik Beer-Seeba, fop a and’a yee o Yaal oxe jil’u a Sami’el, ndax ta ref o tuleer um.

²¹ O Yaal oxe a maad’a o feeñooxaa kam Silo, refna ref me ta feeñooroogna a Sami’el na pexey fa lay um.