1 Sami’el 27 - NQAARIIT NE ROOG

Dawid a jaɓnooka maa no Fiifilista waa

¹ Dawid a laya taa no yiif um ee: «Na bes fa leng xan Sawul a mosaam o war. Jegiim pexey lakas, a refangee um ƴuf, jaɓnook no saax laa no Fiifilista waa. Neene, Sawul daabkatiraam kam o fiisel ole Isra’el fop, too xam waag o daɗ.»

² Maaga, Dawid a yoona fo goor teemeed ɓetuu fa leng we ten, da ndet maa Akiis fee o ƥiy Mawok too a ref o maad Gaat.

³ Den fop a ndala Gaat maa Akiis, oxuu refna fo ƥasil um. Dawid a yoonit’a rew ɗik we ten, ndeeƭna Ahinowam fee gen’ina Yisre’el fa Abigayil fee ñaawooxoogna a Nabal too a gen’u Karmel.

⁴ Ye Sawul a yegna yee Dawid a ƴufa Gaat, a xaƴaan, a fañatin o daab.

⁵ Bes, Dawid a laya a Akiis ee: «Daali maad, a soƥangaa yee mi yoonto, ci’aam um ɗeet no caate ke kam a koƥ ale maa waaguuma o gen. Ndi xar na taxkaa um gen fa wo, mi fee o tag of kam teeru fee no maad oxe?»

⁶ No ñaal leng kut naaga, Akiis a cooxaan saate faa Siklag. Ten taxu boo xaye saate feene a fog no fiisel ole no maad we Yudaa.

⁷ Dawid a jeg’a no saax le no Fiifilista we o hiid fo a qool a nahak.

⁸ Dawid fo yoon we ten a inoorooga Siklag, a songik Geegesuur we fo Giigirsi we fo Aa-amalek we, ndax da njaɓ kalal ke den. Qeet keene ngenoogu yaaga no jegel olaaga, a jagin Suur boo no ŋat olaa Misira.

⁹ Dawid kaa tasoogu a saax ake den too xaƴoogee o leng ta ñoow, ta ref o koor mbaat o tew. A jangooga paal ke fo pambe ke fo naak ke fo xa paam axe fo keeleemb ke fo tikoorik ke, a gat fa den soo a ret maa Akiis.

¹⁰ Mbanuu Akiis a laamit’ina a Dawid ee: «Mam nu ñoxortik’e xaye?», Dawid a doonoogaan ee: «No ɓemb-roog o ñamaak olaa no fiisel olaa Yudaa» mbaat «No ɓemb-roog o ñamaak olaa no fiisel olaa no Yeeyerahmel waa» mbaat «No ɓemb-roog o ñamaak olaa no fiisel olaa no Keekeni waa.»

¹¹ Dawid xaƴoogee o leng ta ñoow, ta ref o koor mbaat o tew oxaa waageena o ɓisiid Gaat, yaam ndik oxeene a lay no ten kaa moseerna yee: «Dawid a fi’a kene fo kaana.» Neene Dawid a fesooroogu no ñaal ke ta reeƭna me no Fiifilista we fop.

¹² Akiis a hooloox’a a Dawid too kaa xalaatoogu yee: «Dawid kaa fi’at a xoox um o pañ no Ii-isra’el we, xeet um. Ten taxu xan a ref o tag es boo kili.»