1 Sami’el 26 - NQAARIIT NE ROOG

Dawid a fañahina o war a Sawul na koƥ-a-ƥor alaa Siif

¹ A jeg’a waa ngen’ina Siif, a soƥiid a Sawul Gibe’a, a layin ee: «Ndax kaa andiro yee Dawid no ñaang laa Hakila, refna no cat kaa na koƥ-a-ƥor alaa Yudaa, a ɗasu?»

² Sawul a dalfooxa o doonoox na ƭat ale, a waaƭooxanik a koƥ-a-ƥor alaa Siif, ndax ta waaƭik a Dawid. A yoon’a fo xiixire cuni tadik we moƴ’ina o saɗ kam Isra’el.

³ A ndala no ñaang laa Hakila, paam a ƭat ale. Dawid koy, kam a koƥ-a-ƥor alaa Yudaa a reeƭu. Ye ta yegna yee Sawul kaa daaban,

⁴ a lula wiin da ƭeetik me ta tolooxna, too ye weene a nomtooxiidna, a yegnaan me Sawul a dal’ina.

⁵ Dawid a taara me Sawul a dal’ina, a horoox a paax o mbiñ onqe Sawul fa Abineer fee o ƥiy Neer reeƭna farɓa fa maak fee Sawul a ƭaanoogna. Sawul a ndeer saŋe ne a ɗaanoogu, soo yoon we ten fop a mbidin.

⁶ Dawid a xoya a Ahimelek, o Heeheet oxe fa Abisay fee o ƥiy no tew o ne’e Seruya, a ref o maag Yowab, a laamit a den ee: «An na nuun bugu o yoon fa mi boo no saŋe naa Sawul?» Abisay a doonaan ee: «Xam yoon fa wo.»

⁷ No yeng olaa, Dawid fa Abisay a ndeta no saŋe naa no xiixire we Sawul. Sawul kaa wondoox’u a ndeer ale, a sip a salma le ten paam xoox um, a ɗaanaa, soo Abineer fo xiixire we fop a ƭaanaa me widna a Sawul.

⁸ Abisay a laya a Dawid ee: «No yeng olene, Roog a ɓoxota o pañ of na xa ƥay of. Xaƴaam, um rengin a lanq fo a salma le ten. Ndib leng kut a deya, soxla’kee um ɗikandaa.»

⁹ Dawid a doonaan ee: «Ha’aa, ba o warin, yaam oxuu warna o maad oxe o Yaal oxe a ɗuumna, ñakkaand o xaw.»

¹⁰ A dakooxaan o lay ee: «Ne ta wooritna yee o Yaal oxe xe ñoowaa, neene a woortu yee o Yaal oxe fa xoox um na warkan, ta ref ee kaa hap um a fadkaa rek ta xon mbaat ta ret na xire, a xonit maaga.

¹¹ Yaasam o Yaal oxe a muclaam no xuuf o ñoow no maad oxe ta ɗuumoodna. Jangi rek a salma le ten refna paam hakandax le ten fo o nqaw foofi nqe, soo i ndet.»

¹² Dawid a xota a salma le fo o nqaw onqe ndeeƭna paam xoox le Sawul, soo da ndet. O leng na den yokoox’ee, o leng ga’’ee dara, too o leng yeg’ee qewu. Fop kaa ƭaanoogu, yaam o Yaal oxe kaa riñ’u a den no ƭaan o cegu doole.

¹³ Dawid a xaaña a yulanq ale, a ŋaay no jul ole no joong ole, a geenoox maaga. A ndeer um fo saŋe ne Sawul koy, a jeg’a o saar o maak.

¹⁴ A falalooxa xiixire we fa Abineer fee o ƥiy Neer ee: «Ee hey, Abineer! Jaaɓaam boog!» Abineer a dalfooxaan o laamit ee: «Ndi an na maktaa neeke o maad oxe?»

¹⁵ Dawid a ɓaataan o lay ee: «Mee ndax o koor refo? O qiixire o leng fodee fa wo kam Isra’el! Yaaga boog, xar taxu yetooxiro o maad oxe, o yaal of a paax? A jega oxaa garna, ndax ta warin.

¹⁶ Ke fi’oona faaxee tus, o saganit neeke wareef of! Ne ta wooritna yee o Yaal oxe xe ñoowaa, neene a woortu yee nuun fop kaa nu ngel o mbarel, yaam nu yetooxee ne waritna o maad oxe o Yaal oxe a ɗuumna. Ɗeeti a paax! Taa a salma le fo o nqaw foofi nqe no maad oxe, ndeeƭna paam hakandax le ten?»

¹⁷ Sawul a andda o ñuxur ole Dawid soo a laamtin ee: «O ƥees Dawid, no ndigil ndax o ñuxur of um nanaa?» Dawid a doonaan ee: «Daali maad, mi o mat oo de.»

¹⁸ A ɓaata teen ee: «Daali maad, xar taxu o daabaxam, mi fee o tag of? Xar fi’oong, ndi paaxeer kum yuuɓanoong?

¹⁹ Daali maad, kaam xeɗang o nan-giloox a ƭelem es, mi fee o tag of: A soƥangaa yee o Yaal oxe riñong boo o siiknoor neeke fa mi, fat a jaɓaam nen sadax faa feluuna tuñ bo! Ndaa a soƥangaa koy ee wiin ndiñong teen, yaasam o Yaal oxe a halak a den. Xaye kaam raxeel, fañteel o moof no saax le o Yaal oxe a ci’na xeet um, nand fo xaa layeena yee: Reti o faɗook roog can ke.

²⁰ Kaa koy, bugiim o xonit maa goƭna o Yaal oxe. Xar taxu boog o maad oxe Isra’el a waaƭaa o xire fa mi, mi fee refna feeɗ, a raxtaxam nen oxaa na xawlooxaa a ceɓel kam xa coong axe?»

²¹ Sawul a falalooxaan ee: «Mi o mat tooñu! O ƥees Dawid, nomtooxiidi, fi’katiroong paaxeer leng, yaam no yeng olene lalaxamo yee o ñoow es a jega o njiriiñ na wo. Kaam fesoor nen o cegee yiif too juumaam tigi.»

²² Dawid a doonaan ee: «Daali maad, a salma le wo oxey, fat o leng no ngoor ke wo a gar, a xotin.

²³ O Yaal oxe na rabdaa oxuu refna o cofel um fo ngor um. Xaye o Yaal oxe a ɓoxot’aang na xa ƥay es, ndaa bug’iim muk o xuuf o ñoow of, yaam wo o mat refu o maad oxe ta ɗuumna.

²⁴ Too itam ne o ñoow of a jegantaxama o njiriiñ xaye, neene o ñoow es a jegtu o njiriiñ no Yaal oxe, too xan a muclaam no paaxeer kuu ndefna.»

²⁵ Maaga, Sawul a layaan ee: «O ƥees Dawid, xeɗaan o barke’el. Kuu hebooxoona o fi, xan o waagin o fadin.» Dawid a xota a ƭat um, soo Sawul a nomtoox, a xaad.