1 Sami’el 25 - NQAARIIT NE ROOG

Nabal a faña o dimle a Dawid

¹ Sami’el a xona, too Ii-isra’el we fop a mbokatoora, ndax da mboyin. A ngasaan na teeru faa Rama, me ta gen’ina. Cinj kaaga, Dawid a inooxa, a ret na koƥ-a-ƥor alaa Paaraan.

² A jeg’a kam Mawon o koor o cegu halal tigi. A jeg’a paal cuni tadik fo pambe juni. O jeg ole ten Karmel a reeƭu, too a reeƭa maaga, ndax paal ke ten a nduusel.

³ O koor oxeene Nabal a ne’’e, o teem a ne’el Abigayil. O tew oxe kaa jeg’u yiif, a mos bo, ndaa o kor um o mat, kaa ɗom’u tig too a soxod. Nabal feene koy, na qaw ale Kaleb a fog’u.

⁴ Yaa Dawid a yegitna na koƥ-a-ƥor alaa yee Nabal kaa ruusik paal ke ten,

⁵ a lula xa pes xarɓaxay maa ten, a lay a den ee: «Ndetyo Karmel maa Nabal, nu simnanaam o ten,

⁶ layin ee: ‹Yaasam o hiid ole a fel! Yaasam jam a jeg a ndeer ƥasil of fop fo no jeg ole fop.

⁷ Dawid a yega nduus ne no paal ke wo no mbind of. Gaynaak we wo me in a ngayoogu, too i mosee o mbi a den paaxeer leng, ñak’ee tus itam, ye da ndefna fa in Karmel.

⁸ Waagaa o laamit a den, too xan a layong o ten. Ten taxu Dawid kaa xeɗang o faax fa in na xew feeke i ngarna me wo. Ci’i a in, in we dag of fo o ƥeef Dawid no ke jegoona.› »

⁹ Ye we Dawid a lul’ina a mbadiidna, a njangtooxa a Nabal a ƭelem akaaga fop ne Dawid a heblit’uuna a den, soo a cungaa o ndoonel.

¹⁰ Nabal a doona a den ee: «An refu Dawid, ndi an refu o ƥiy onqe Isay? Ndiiki kaa jeg faɗ mayu waa na ƈuftaa no pind no yaal den.

¹¹ Ndax kaam jangkaa puuru ke fo foofi le fo a tegeƴ ake naqanuuma ruuruus we mi, cooxin wiin waa andeeruuma maa da ngenna!»

¹² Waa Dawid a lul’ina a ndalfooxa o nomtooxiid, a njangtoox a Dawid ke Nabal a doon’ina a den fop.

¹³ Dawid a laya yoon we ten fop ee: «Fat oxuu refna a jang laƥ um.» Naaga, oxuu refna a janga laƥ um, a ɓekin no xool um. Dawid itam a janga ne ten. Ngap wiin teemeed nahik a yoon’a fo ten, soo wiin teemeed ƭik lakas a yoq fo tig oo tig ke.

Abigayil a dimle’iida a Dawid

¹⁴ O leng no dag we Nabal a yegniida a Abigayil fee o tew no yaal mbind um ee: «Dawid a luliida wiin, da inoor na koƥ-a-ƥor alaa, a simniid o yaal mbind in, ndaa oxeene kaa ñakit’u a den kersa.

¹⁵ Yaag oo toox de, wiin waaga a mbaax’a na in lool. Mbi’’ee a in paaxeer leng, too i ñak’ee dara, ye i ndeeƭna fa den na koƥ alaa.

¹⁶ Ñaal fo o yeng kaa ndeeƭu na in nen tabax naa na singaa a in, fo ne i miñit’ina fo a ked ake in fop no tund olaa da ndeeƭna.

¹⁷ Ndiiki koy, xalaati a paax no ke waroona o fi, yaam o mat a woora yee paaxeer oxe daliidaa o yaal mbind in fo ƥasil um fop. Ten fa xoox um a saqa jiko fa mbaaxeer faa andoona yee o leng waagiran o layan.»

¹⁸ Abigayil a ñofa o jang puuru teemeed ƭik fo poxos ƭik biiñ fo paal ƥetik kaa njuɗ’eena fo a qandi ƥetak akaa yipna muum fo tuunq teemeed xa biiñ xa beeru fo tuunq teemeed ƭik xa tun. A sufa kaaga fop took xa paam,

¹⁹ a lay dag we ten ee: «Adooxyo, um reef took nuun.» Abigayil koy, yegin’ee a Nabal fee o kor um dara no kaaga.

²⁰ Ye Abigayil a fudooxiidaa, a ŋaay took o faam um, o joong ole a laqin, a jopir Dawid fo yoon um a mbudooxiidaa farna fo ten, a naagayo rac a nqet na pudnand alaa.

²¹ Dawid kaa lay’u yee: «A yetax ale yetooxooguuma o jeg ole no mbindeef onqene fop kam a koƥ-a-ƥor alaa, yaam fañaa ta ñak teen tig, ɗaxiraam tus. Fi’ee dara, ndax a rabdaam paaxeer no paax ke fi’an’anuuma!

²² Yaaga boog, yaasam Roog a halakaam, yaa andoona sax ee xaƴaam o koor o leng ta ñoowaa no mbind Nabal boo o feet nqes.»

²³ Yaa Abigayil a ga’na a Dawid rek, a ñofa o fudoox o faam ole, a gooknoox, a gung mbaambir um.

²⁴ Cinj kaaga, a yena na caf ake Dawid soo a layin ee: «O yaal es, mi o mat juumu, ndaa nan-gilooxaam um lay fa wo, mi fee o ceefeer of!

²⁵ Ba a ƭat of a yong na Nabal, yaam jaree tus. Gon um kaa reefin: Ƥodaxu a ne’e, too o ƥodaxel doŋ refu no ten, ndaa mi fee o ceefeer of ga’iim muk wiin we luliid’oona.

²⁶ Ndiiki koy, o yaal es, ne ta wooritna yee o Yaal oxe xe ñoowaa, o ñoowaa wo itam oo, o Yaal oxe fa xoox um sax xañtong a bar fo a tabdinax. Yaasam muj no fañ of fo we mbuganoonga paaxeer a nand fa fee Nabal.

²⁷ Ndiiki koy, jaɓi ci’it ke ɓisiidoonga. Lasiryo a den, wo fo yoon of.

²⁸ Kaam xeɗang, mi fee o ceefeer of, o waasanaam tooñ es. A wooraxam ee xan o Yaal oxe a fi ƥasil of a maadooxaa boo kili, yaam wo na ɗoxaa a ñoq ake no Yaal oxe, too paaxeer leng dalkirang no ñoow of fop.

²⁹ Boo o kiin a inooxanoonga, a raxang, ndax ta warong, a woora yee xan o Yaal oxe Roog of a saytoox o ñoow of nen xaaliis kam nafa soo a suusaand ole no fañ of.

^30-31 Koo baa o war o kiin o cegee njiriiñ oxene, ndax o rabdinooxan a xoox of, a tax yiif of a ɓanjang, yaa o Yaal oxe a fadinkaa paax ke ta regoonga fop soo a fi’ong o maad Isra’el. O yaal es, yaa o Yaal oxe a ci’kang o ɗaay oleene, fat o wetandooxaam, mi fee o ceefeer of.»

³² Dawid a doona a Abigayil ee: «O Yaal oxe Roog fee Isra’el a hela o simatel, ten fee luliidoonga na waxtu fene o xetiid fa mi!

³³ Xeɗaan o barke’el no yiif le jegoona boo gar xañtaxam a bar, ndax um rabdinooxan a xoox es.

³⁴ Ne ta wooritna yee o Yaal oxe Roog fee Isra’el oxe ñoowaa, ten fee xañtaxama um fi’ong paaxeer, neene a woortu yee o ñof’angee o xetiid fa mi, o feet ƥiiɓ teel o koor o leng ñoowkoogatee no mbind Nabal.»

³⁵ Dawid a janga ke Abigayil a ɓisiid’uuna soo a layin ee: «Nomtooxi xaad na jam. Ga’aa yee nanaam a qeƭ of too jaɓaanum.»

Nabal a xona, soo Dawid a gilig a Abigayil

³⁶ Ye Abigayil a fadiidna no mbind ne, a soƥa Nabal a bumbaayaa nen mbumbaay no maad. Nabal a ɗaay’a lool soo a way boo a naag nep. Abigayil koy, lay’iran o ɗelem o leng boo no feet nqes olaa.

³⁷ Abigayil a cunga boo no nqes naa, a soƥ Nabal a salid no way le ten, soo ta sogin o lay fop ke xewna. Ye Nabal a nanna kaaga, a diida boo a sux, a reef maaga a lafañ.

³⁸ Ngap ñaal xarɓaxay a cinj kaaga o Yaal oxe a xawahina a Nabal, soo ta xon.

³⁹ Yaa Dawid a yegna yee Nabal a ñaka, a laya yee: «O Yaal oxe a hela o simatel, ten fee rabdinooxanaxama took Nabal no wen le ta wenaxama. A xañtaxam, mi fee o paɗ um, um fi paaxeer, soo a nomit a Nabal coxod um.» Cinj kaaga, Dawid a lula wiin da laamtik a Abigayil, ndax ta gilgin.

⁴⁰ Dag we Dawid a ngara Karmel maa Abigayil, a layin ee: «Dawid luliidu a in me wo, ndax i ngilganong o ten.»

⁴¹ Abigayil a dalfooxa o gooknoox, a gung a lanq soo a lay a den ee: «Jaɓaam o ref o ceefeer no yaal es Dawid, jaɓ sax o ɓoganaa dag we ten a caf!»

⁴² Abigayil a ñofa o inoox, a ŋaay o faam um, a yoon fo jeefeer um ɓetuk, da ndeefan we Dawid a lul’ina. Naaga, Abigayil a refata o tew Dawid.

⁴³ Kaaga koy a soƥ’a Dawid a gilig a Ahinowam fee gen’ina Yisre’el. Naaga, Dawid a jeg’ata rew ɗik.

⁴⁴ Mikal fee eet’ina o ref o tew Dawid o mat, Sawul fee faap um a ci’’ataan a Palti fee gen’ina Galim too a reeƭu o ƥiy Layiis.