1 Sami’el 24 - NQAARIIT NE ROOG

Dawid a faña o war a Sawul

¹ Dawid a inooxa no jegel olaaga, a laqook na xa coong axaa En-Gedi.

² Ye Sawul a nomtoortiidna na xire fee ten fo Fiifilista we, a yega yee Dawid oxaay na koƥ-a-ƥor alaa En-Gedi.

³ Sawul a jila goor cuni tadik no xiixire we moƴna o mbaax kam Isra’el, a fokat a den, da mbaaƭik a Dawid fo yoon we ten no batand naa no joong olaa no Pambe-koƥ kaa.

⁴ Ye Sawul fo yoon um a njoonaa fo a ked ake no paal ke ndeeƭna paam a ƭat ale, Sawul a ga’a luf. A roka taaga, ndax ta ñaaƴloox. Yaaga fop koy, Dawid fo yoon um kam ee kam luf naaga a ƭas’u.

⁵ Yoon we Dawid a asooga a Dawid ee: «Kene refu waxtu fee o Yaal oxe a ne’oogna, ye ta layna yee: ‹Xam ɓoxot o pañ of na xa ƥay of, ndax o fi’in nuu feloonga.› » Naaga Dawid a ɓeediida o ndang, a gar, a ɗeg no noflax ole no sabadoor ne Sawul.

⁶ Ye ta fi’na keene rek, o laaw ole ten a dalfooxa o ref no fiiƭaa a maak.

⁷ Maaga, Dawid a laya yoon we ten ee: «Yaasam o Yaal oxe a muclaam no xuuf o ñoow no yaal mbind es ne nu nqalaattuuna! Yaam o mat, o Yaal oxe fa xoox um sax ɗuumun o maad.»

⁸ Fo a ƭelem akaaga Dawid a fañta yoon we ten da yen took Sawul. Sawul a sutooxa luf naa, a xot a ƭat um.

⁹ Ɓaatnee dara, Dawid a sutooxiida, a falalooxin ee: «Daali maad! Daali maad!» Ye Sawul a wiƈaqilooxna, Dawid a gooknooxa, a gung a lanq.

¹⁰ Cinj kaaga, Dawid a laamtaan ee: «Wo daali maad, xar taxu o nan-gilooxaa we na layang ee: ‹Dawid paaxeer rek a heñya’ong›?

¹¹ Xaye ga’oodaa sax ee o Yaal oxe fa xoox um a ɓoxot’aang na xa ƥay es kam luf nene. Kaam asoogel ee: ‹Wareen!›, too yaqanee um wuusong, lay a den ee: ‹Waagiim o doon o ɓay es took no yaal mbind es, yaam o Yaal oxe sax ɗuumun o maad.›

¹² Faap es, ga’i ke ɗeguuma no noflax ole no sabadoor ne wo! Kaam ɗegin doŋ, fañong o war. Andaa a paax boog ee heñya’iroong paaxeer too bugiim o siiknoor fa wo. Ga’aa yee tooñiroong. Wo kañ na waaƭaa maa xuuftoona o ñoow es.

¹³ Yaasam o Yaal oxe a ref o kaahate in, a rabdong paaxeer ke fi’axamoona, ndaa mi o mat fi’kiroong paaxeer leng.

¹⁴ Andaa o feƭit ole na layeel ee: ‹Kañaan no soxodu we a hataa›, ndaa mi o mat fi’kiroong paaxeer leng.

¹⁵ Daali maad Isra’el, ndi an o xire’tikaa? Kaam ee ndi an o daabaa? Mee ndax mi yoo, mi fee refna o ɓox o xonu, ref mbiindiin soom.

¹⁶ Koo yaasam o Yaal oxe a ref o kaahate in, a horoox, a fartaam, a ɓoxotaam ɓur soo a muclaam na xa ƥay of.»

¹⁷ Ye Dawid a layna boo a tiimaa, Sawul a laamtaan ee: «O ƥees Dawid, no ndigil, ndax wo na layaa fa mi?» Cinj kaaga, a naaga ciic, a lool.

¹⁸ Maaga, a layaan ee: «Wo moƴaxam o jof, yaam paax ƥor fi’anaxamo, soo mi o mat, um heñya’ong paaxeer.

¹⁹ Xaye lalaxamo o paaxel of fa mi. O Yaal oxe a ɓoxot’axam na xa ƥay of, ndaa taxee o waraam.

²⁰ Boo o kiin a xetna fo o pañ um, ndax kaa xaƴkan ta xot a xot a ƭat um na jam? Ha’aa, muk kañ! Yaaga boog, yaasam o Yaal oxe a rabdong paax ke fi’anaxamoona xaye.

²¹ Ndiiki koy, andaam ee xan o mos o ref o maad Isra’el, too xan maat of a saƭik.

²² Me ta refna koy, kaam xeɗang o daaɓoox no Yaal oxe yee a cinj fa nqon es moocandkiro xa taan es too ñufkiro gon es ndeer ƥasil es.»

²³ Dawid a daaɓooxaan mbaambir Sawul. Cinj kaaga, Sawul a xaada, soo Dawid fo yoon um a nomtoox na xa coong axaa.