1 Sami’el 20 - NQAARIIT NE ROOG

Yoonatan a xoxta a Dawid

¹ Dawid a ƴufta Nayot kam Rama, a ret a soƥik a Yoonatan, a laamtin ee: «Ndi xar fi’um? Tooñ num mbaat njofaƭar num fi’um a faap of, boo a tax ta waaƭaa maa ta xuufitna o ñis es?»

² Yoonatan a doonaan ee: «Kaaga waagee o jeg muk! Xonkiro. Ga’aa, faap es fi’kee tig muk, ta ref maak mbaat teɓ too yegniraam o ten. Xar taxu boog ta ɗasnaam keene? Kaaga jegee muk.»

³ Dawid a saƭka na: «Faap of a anda xil ee daawaam yirmande of, ten taxu ta xalaat ee: ‹Yoonatan wariran o yeg, yaam ndik ta naqadilin.› Kaa koy, ne ta wooritna yee o Yaal oxe xe ñoowaa fo ne ta wooritna yee woxe ñoowaa, a woora yee daaraand leng kut rokatu a ndeer es fo fa nqon!»

⁴ Yoonatan a laamta a Dawid ee: «Xar bugo um fi’anong boog?»

⁵ Dawid a doonaan ee: «O feet refu xew fee na bat ale no nqool onqe, too war’aam o moof, ñaam fo o maad oxe, ndaa ci’aam um ret, ɗasik kam a koƥ alaa boo a lakra kirand.

⁶ Boo faap of a jambataxam, fat o layin ee: ‹Dawid kaa xeɗooxaam, ndax um xaƴin ta ñof o ret Betleheem fee mbaafaap um a gar, yaam a qaw den fop kaa njeg maaga sadax fee da mbi’aa o hiid oluu refna.›

⁷ Bo ta layna yee: ‹A faaxa›, jam soom a refkaa na mi fee o paɗ of. A soƥangaa koy ee kaa fuux, andi yee paaxeer a fofanaxam.

⁸ Lalaam boog nqaariit of fa mi fee o paɗ of, yaam hiɓaa fa mi nqaariit no gon no Yaal oxe. A soƥangaa koy ee paaxeer key na mi, fat o waraam wo fa xoox of, jaree o cungtaxam a faap of.»

⁹ Yoonatan a layaan ee: «Boo muk! A koom aluu yeguuma yee faap es kaa fofanong paaxeer, a woora yee xam yegnong o ten.»

¹⁰ Dawid a laamta a Yoonatan ee: «A soƥangaa koy ee faap of kaa doonong peƭaru, an na daawinkaxam o ten?»

¹¹ Yoonatan a laya a Dawid ee: «Gariidi i ndet boo na koƥ alaa.» Maaga, a yoona den ɗik, a ndet kam a koƥ alaa.

¹² Yoonatan a laya a Dawid ee: «No Yaal oxe Roog fee Isra’el, o feet mbaat a lakra na waxtu fa leng kut feeke xam naaɓloox a faap es teen boo and. A soƥangaa yee saqanirang dara, xam lultiid, ndax o yegnel o ten.

¹³ Kaa koy, a soƥangaa yee faap es kaa yuuɓanong paaxeer, too yegniroong o ten, fañong o xaƴ o ret na jam, yaasam o Yaal oxe a halakaam, mi Yoonatan. Yaaga boog, yaasam o Yaal oxe a ref fa wo, ne ta refit’ina fa faap es.

¹⁴ No ñoow o ñis es fop, fat o lalaam o paaxel ole o Yaal oxe a bugna. Um xonangaa itam,

¹⁵ fat o geek o paaxel of fo ƥasil es. A refangaa sax ee kaa o Yaal oxe a moocand fañ of fop no lanq ke,

¹⁶ baa gon es a moocandel fo we no mbind Sawul. O fi’angiran, xan o Yaal oxe a laamtong o ten, wo Dawid.»

¹⁷ Yoonatan a daaɓooxnoora a Dawid no mbeq onqe da mbexirna, yaam kaa fexit’un nen a xoox um.

¹⁸ Yoonatan a layaan ee: «O feet refu xew fee na bat ale no nqool onqe. Xan o xalatooxel, yaam a seek of o ƥor a yoqkaa.

¹⁹ A lakra koy, o moƴkeel o xalatoox, fat o ret boo maa ɗas’oona a koom soo o moof paam juum laa na ƥil akaa.

²⁰ Xam xaƴiid a kas a tadak farna fo saax olaaga nen oxaa na jagandaa no tig.

²¹ Cinj kaaga, xam luliid o tag oxe, layin ee: ‹Reti xotik a kas akaa.› Um layangaan ee: ‹Ga’i, a kas ake ngoƭee dara, nomtooxiidi o xot a den›, neene waagaa o gar na jam too fañ o saɗar dara. Mexe daaɓooxan mbaambir no Yaal oxe.

²² Um layangaan koy ee: ‹A kas ake moƴong o ngoƭ, yaam a njolaang›, maaga fat o ret, yaam o Yaal oxe bugtun neene.

²³ Keene refu fa lay fee i ngiɓna, mi fa wo, too o Yaal oxe o mat refu o seede in boo kili.»

²⁴ Maaga, Dawid a ɗaska kam a koƥ alaa. No yaar olaa na bat ale no nqool onqe, o maad Sawul a moofa ndax ta ñaam.

²⁵ Ne ta mer’uuna o fi’taa, a moofa no duɗand le ten, a geƈnoox no tabax ne. Yoonatan a jasnoora fo ten, soo Abineer a moof paam Sawul, ndaa Dawid o mat, a seek um moof’aand.

²⁶ No ñaal naaga, Sawul lay’ee dara, yaam kaa xalaatoogu yee: «Xeƈa Dawid kaa xoolaƭarand a xoox um, ga’na o mbiñ rek a roku boo a xoolaƭar.»

²⁷ Kaa koy, no feet olaa ref’ina ñaal ƭikandeer ne na bat ale no nqool onqe, ye Sawul a ga’na yee Dawid reeƭahinee maaga, a laamta o ƥeem Yoonatan ee: «Xar taxu o ƥiy onqe Isay garee na cu’ax ale faak, garee na le xaye?»

²⁸ Yoonatan a doona a Sawul ee: «Dawid kaa xeɗooxaam, a fañ o waas, ndax um xaƴin ta ret Betleheem.

²⁹ Kaa lay’aam ee: ‹Ci’aam um ret, yaam kaa i njeg no saax in sadax njegel na qaw ale in fop, too o maag es a lultiidaxam. A soƥangaa boog ee daawaam yirmande of, ci’aam um ret, ndax um waag o ga fog es.› Ten taxu garee na cu’ax ale wo, wo o maad oxe.»

³⁰ Maaga, Sawul a fuuxana a Yoonatan ƭomu, a layin ee: «Wo soo ref o ɓox, mee ndax andaam ee kaa o xaariitoor fo o ƥiy onqe Isay, ta ref gaci of fa gaci ya of.

³¹ Nan-gilooxaam a paax. Nuu o ñoow no ƥeenqe Isay a miñtaa, neene o ñoow of a reftaa no xoƥ nquƭ, ne’katiim maat of. Ndiiki koy, lultanaam o ten ta gar, ndax ta warel.»

³² Yoonatan a doona a Sawul fee faap um ee: «Xar taxu ta bugel o war? Paaxeer kum a fi’u?»

³³ Sawul a joora a Yoonatan a salma le, ndax ta dibin. Maaga, Yoonatan a andtu yee faap um a hebooxa ndigil o war a Dawid.

³⁴ A inoorta na cu’ax alaa, a fuux boo a buɓaa, a fañ o ñaam na cu’ax ale no ñaal ƭikandeer naaga na bat ale no nqool onqe. Kaa naqadiloox’u na Dawid, yaam ne faap um a wen’uuna.

³⁵ No feet nqes olaa, Yoonatan a reta kam a koƥ alaa ne ta layrit’uuna fa Dawid, too a yoon’a fo o goor o deɓ.

³⁶ A laya o goor ole yee: «Ƴufi o xotik a kas ake um xaƴkaa.» O goor ole a dalfooxa o ƴuf, soo Yoonatan a xaƴ a kas alaa joluuna.

³⁷ Ye o goor ole a faambnooxiidaa a kas ale Yoonatan a xaƴ’ina, Yoonatan a falalooxaan ee: «A kas ale moƴong o goƭ, yaam a jolaang.»

³⁸ A ɓaataan o falaloox ee: «Ñofandooxi, ba o geenoox!» O goor ole a gisa a kas ale, a nomtooxiid farna fo o yaal mbind um.

³⁹ O goor ole koy, and’ee ke keene a tekit’ina. Dawid fa Yoonatan soom and’un.

⁴⁰ Yoonatan a cooxa o goor ole ta yoonit’ina ƥonax ke ten, a layin ee: «Ɓisi kene na teeru faa.»

⁴¹ A cinj ye o goor ole a retna, Dawid a sutoora me ta ɗas’ina laqa juum le na ƥil ake, a dalfoox o gooknoox, a gung boo a caf a tadak mbaambir Yoonatan. Den ɗik fop a ndalfooxa o mbarakoor, a ndef na xa lool xa ƭomu, moƴtaa sax Dawid.

⁴² Yoonatan a laya a Dawid ee: «Reti fa jam. Ndiiki koy, ke i ndaaɓooxna mbaambir no Yaal oxe, a saƭka, too o Yaal oxe refu o seede a ndeer es fa wo, a ndeer xa taan es fo xa taan of boo kili.»