1 Sami’el 2 - NQAARIIT NE ROOG

Xaan oxe simataa o Yaal oxe

¹ Xaan a simata o Yaal oxe too a lay ee: «Xeeñ es kaa felakinooxaa no Yaal oxe. O cok es oxe took yaam o ten, waagataam o jal fañ es. Kaam felakinooxaa no ten fee ƴufgaxama.

² O leng fodee fo o Yaal oxe o tedel. Ten doŋ refu ndaɗand in, too fa lakas jegee a refangee ten.

³ Ba nu ndupataa fa lay fa njegee xoox, magnandooxaa na fa lay nuun, yaam o Yaal oxe kaa ref Roog faa dara kunpa’eerna too ten na hate’aa a pi no kiin oxuu refna.

⁴ A kas ake na salma-koor ake a ƥole, we ñak’ina doole o mat, a ngeenooxat naŋ.

⁵ We neq’ina a mbaaƭataa onqaa da ñaamna, we nqeex’eena, a njegat ñaamel teyu. O tew o timar oxe sax a jegata xa ƥiy ɓetaa ƭaq, soo oxe rim’ina mayu, fa ndim um a geenooxat.

⁶ O Yaal oxe na jangaa o ñis, too ten na ñoownaa itam. Ten na ɓisaa o kiin jaaniif, a sutan teen.

⁷ O Yaal oxe na roolnaa, a ci’taa halal. Ten na neewandaa o kiin mbaat ta yoɗin.

⁸ Ten na inaa o toroxu xe yenna a lanq, o ndool onqe deɓeena na siind, ta yoɗatinin, ndax ta moofin a den paam kelfa ke soo a ci a den da lam uum le no ndam onqe. O Yaal oxe jegu a toodook ake njaƭna lanq ke, too took den a diƈu adna fee.

⁹ Kaa saytooxaa we ndamooxna no ten, soxodu we o mat a saŋkooxaa kam o niɓaan ole, yaam o kiin waaganee a xoox um tus.

¹⁰ We na siiknooraa fo o Yaal oxe, xan a ndiid. Xan o Yaal oxe a ɗuuɗit na asamaan, a saŋik a den. Ten refu oxe na hate’kaa adna fee fop, oxe na maadooxanaa xeet um, ta ci’in doole, soo o maad oxe ta ɗuumna, ta yoɗin took.»

¹¹ Cinj kaaga, Elkanayiin a nqaada Rama, soo o njaaƈ onqe a yoq Silo maa Eeli, o saasadax oxe, ndax ta jalan o Yaal oxe.

Xa ƥiy axe Eeli

¹² Xa ƥiy axe Eeli kaa ndeeƭu waa njareerna tus, a ƭat den yong’ee no Yaal oxe.

¹³ Ke da ndeeƭna saasadax fop oo, mbesooroogee ne waritna a ndeer den fa xeet fee. A mbanuu o kiin a ɓoxotoogna sadax, o tiidimle xe no saasadax oxe kaa garoogu, yaa a tegeƴ ake a mbaƴneel, a saq no ɓay um o cuutir olaa jegna qol tadik.

¹⁴ Kaa ɓekoogun na xa ƥaxañ axe: No nquɗoox onqe mbaat na kaleera le mbaat na tokol ale soo a ɓis o saasadax oxe ke o cuutir ole a ɓisiidkaa fop. Keene reeƭu a pesoorooƭ ale na xa ƥiy axe Eeli a ndeer den fo Ii-isra’el we ngaroogna Silo fop.

¹⁵ Leek-leek boo neeneer ke a ngelko fo ndoxeel, o tiidimle xe no saasadax oxe kaa garoogu, a lay oxe na ɓoxotaa sadax fee yee: «Cooxaam meeke a tegeƴ akaa juɗanuuma o saasadax oxe, yaam a woora yee jaɓankirang a tegeƴ a cawe, a tegeƴ a sis doŋ a waagong o jaɓan.»

¹⁶ O kiin oxe na sadaxtaa a doonangaan ee: «Cungi boog boo neeneer ke a ndoxel, cinj kaaga waagaa o xot ke bugoona», o tiidimle xe no saasadax oxe a layoogaan ee: «Ha’aa, xan o cooxaam ndiiki sax, o fañaan jaɓaan.»

¹⁷ Neene, xa ƥiy axe Eeli a tooñooga o Yaal oxe tooñ maak, yaam niw’ee sadax ke ƥoxotoogeena o Yaal oxe.

¹⁸ Sami’el o mat, ke ta reeƭna o ndeɓandoong fop oo, o jamb olaa fi’teena gaare a rokooxoogu soo a fadnaa o far um mbaambir no Yaal oxe.

Ƥasil ne Sami’el

¹⁹ O hiid oluu refna, ya Sami’el a fi’anooga a Sami’el o mborok, a ɓisiidin o ten, yaa da ngaraa Silo, ten fo o kor um, ndax da ƥoxot o Yaal oxe sadax fee da mbi’aa o hiid oluu refna.

²⁰ Mbanuu da ngar’ina, Eeli a barke’ooga a Elkana fo o teem soo a lay a Elkana yee: «Yaasam o Yaal oxe a ci’ong xa ƥiy xa lakas fo o tew oxene, ndax da ndondand oxe ta ci’na o Yaal oxe.» Cinj kaaga, a nqaadooga.

²¹ O Yaal oxe a ƴufgiidooga a Xaan, soo ta rokahinaa o fud. Naaga a jeg’a xa ƥiy xa koor xa tadaq fo xa ƥiy xa tew xa ƭaq. Sami’el, o ndeɓandoong onqe o mat, a maakooga mbaambir no Yaal oxe.

Eeli a xasana xa ƥeem

²² Eeli, o saasadax oxe kaa nogoy’u lool. Ye ta yegna ke xa ƥeem axe a mbi’oogna fa xeet fee Isra’el, a nan itam ee kaa mbondooxoogu fo rew we mbadnoogna o far den no ndokand ne no Ƭiif ne o Yaal oxe a xetteel,

²³ a laya a den ee: «Xar um nanaa? Xeet fee fop kaa laytaa a pi a paaxeer ake nuun! Ndi xar taxu boog nu mbi’aa keene?

²⁴ Xa ƥees, fat kaaga a naag faq a xon, yaam ke um nanaa xeet fee no Yaal oxe a layaa na nuun, faaxee dara.

²⁵ Boo o kiin a tooñna o kend um, xan Roog a waag o ref o ndok-a-ndeer onqe, ndaa o mat, boo o kiin oxe a tooñna o Yaal oxe, an na xeɗooxankan?» Kaa koy, weene a mbaña o nan-giloox a faap den, yaam o Yaal oxe kaa bug’u o saŋik a den.

²⁶ Sami’el, o ndeɓandoong onqe o mat, a moƴ’a o maakaa. A fel’a o Yaal oxe, a fel wiin we.

Eeli a yegne a qaw ale na dalkan, ten fo ƥasil um

²⁷ O tuleer Roog a gara, a soƥiid a Eeli, a layin ee: «Kene refu ke o Yaal oxe a layna: ‹Ndax refee yee mi feeñoox’u daan of, ye da ndeeƭna no mbaƭ kam saax laa Misira no ɓay Firawon fee?

²⁸ Ne a carind ake Isra’el a mbodeena fop, ale wo jilum, ndax nu ƥoxotiidaxam sadax took o sadaxand es, ndoxaa cuuraay, ndokooxaa xa camb mbaambir es. Cooxoogaam a nuun no fop ke Ii-isra’el we a sadaxtaa.

²⁹ Yaaga boog, xar taxu nu ŋastaa sadax ke fo ci’it ke mi ndiiki, mbañ o mbi’it a den ne heblitanuuma a nuun no Ngenand es? Yaam fa xar o niwaa xa ƥeef kupu ke o niwaxam? Xar taxu nu mbaaƭaa xa pud xa maak na seek ake moƴna o mbaax no fop ke xeet es a ci’iidaxam?

³⁰ Feek neene yoo koy, kene refu ke um yegnang, mi o Yaal oxe Roog fee Isra’el: Kaam reg’u ƥasil of, na carind ale fogoona yee: Saasadax es nu mbugko ndefaa boo kili, ndaa ndiiki koy, kaam yegnang a qoolu yee refkatee neen boo muk, yaam o mat, kaam niwaa we na niwaxam, ndaa we ndeɓaxama, kaam deɓatinaa a den itam.

³¹ Ñaal key a ngaraa kaa um xuufkaa o ñis of, wo fo maak we no ƥasil of, ndax o leng nogoykatee teen.

³² Xan o genit naqad. Fop a ñaaƴangaa a paax kam xeet fee Isra’el fop oo, no mbind of o mat, a woora yee o kiin fuumkatee maaga muk.

³³ Kaa koy, saŋikkiim wiin of fop we na mbadnaa o far den no sadaxand ole mi, ndax fuulinkiroong soo wañ doole of, ndaa a woora yee o moƴ-o-jaak ole na den xan a mbartel laƥ.

³⁴ Ke na dalkaa xa ƥiy xa ƭaq axe wo ndefna Hofni fa Finees, xan a refanong o anddiloor no keene: Den ɗik fop no ñaal leng kut a nqonkaa.

³⁵ Cinj kaaga, xam dalnan a xoox es o saasadax oxaa na damooxkaa na mi, a ñaaƴaa no bug es. Xam ci’in xa taan axaa na ndefkaa saasadax boo kili mbaambir oxe um ɗuumkaa.

³⁶ Oxuu yoqna teen no mbind of koy, xan a gar maa no saasadax oxeene, a gung na caf um, ndax ta waag o jeg o monjong xaaliis mbaat o ɗeg mbuuru. Xan a xeɗooxin ee: ‹Kaam xeɗang o cooxaam o njalel onquu ta waagna waag o ref paam no saasadax we, ndax um waag o jeg kaa um ñaamaa.› »