1 Sami’el 18 - NQAARIIT NE ROOG

¹ Ndak fo ndak, ye Dawid a layna fa Sawul boo a ƴut, Yoonatan fee o ƥiy Sawul a damooxa na Dawid, a fextin nen a xoox um.

² No ñaal naaga, Sawul a xota a Dawid, a fañatin o xaƴ ta nomtoox no mbind faap um.

³ Yoonatan o mat, a hiɓa fa Dawid nqaariit, yaam kaa fexit’un nen a xoox um.

⁴ Yoonatan a wola o forok ole ta rokoox’ina fo sabadoor um boo no laƥ ne fo a qali le fo o kumnoor ole, a ci a den a Dawid.

⁵ Muu Sawul a hebil’ina a Dawid, kaa retoogu too fop um a ñaaƴooga. Sawul a fi’a a Dawid ta adooxan xiixire we ten, too oxeene a fel’a xeet fee fop boo no dag we Sawul sax.

Sawul a jeema o war a Dawid

⁶ Ye xiixire we a ngataa a cinj ye Dawid a warna o Fiifilista xe, rew we a sutoortiida no teeru ke Isra’el fop, a ngimaa a mbecaa, a nqetooxiidaa o maad Sawul fo a ñal, xa soroxole fo a tog.

⁷ Rew we a ƈeelooga, a njaaɓanraa yee: «Sawul a xawa wiin juni, Dawid o mat, a xaw wiin cuni xarɓaxay.»

⁸ Maaga, fuux maak a roka a Sawul, yaam a kim aleene fel’iran dara, too a laya yee: «A cooxayo a Dawid cuni xarɓaxay, soo mi o mat, da coxaam juni rek! Maat doŋ a yoqɗoorate kañ.»

⁹ No kaa xotitna no ñaal naaga, Sawul kaa ɗeetoogatu a Dawid a ngid a pariƴ.

¹⁰ No feet olaa, yiif faaxeer laa Roog a luliidna a roka a Sawul, ta dalfoox o jiit kam mbind um. Dawid koy, a xilimbanoogaan ne ta mer’uuna o fi’taa, soo Sawul a pokoox a salma um.

¹¹ Maaga, Sawul a ɗaayana a Dawid a salma le, a lay taa no yiif um ee: «Kaam rengkan no tabax ne.» Sawul a jooraan a salma le, ndaa Dawid a kuucaan. Keene a xewa boo a caf a ƭak.

¹² Sawul a saɗar’ata a Dawid, yaam ne o Yaal oxe a xaƴ’uuna soo a ref fa Dawid.

¹³ Ten taxu Sawul a fexeya boo Dawid a goƭin. A dodaan o aa-adax no xiixire juni, ta adooxanaa xiixire we, yaa da ndetaa fo yaa da ngataa.

¹⁴ A xawooga kam a ñoq ake ten fop, yaam o Yaal oxe kaa reeƭu fo ten.

¹⁵ Sawul a moƴ’a o saɗar a Dawid, ye ta ga’na yee fop um kaa ñaaƴoogu.

¹⁶ Kaa koy, fop we ngenna Isra’el fa Yudaa a mbex’a a Dawid fee adooxanoogna a den, yaa da nqire’aa.

Dawid a gilga a Mikal fee o ƥiy Sawul

¹⁷ Sawul a laya a Dawid ee: «Meerab fee o ƥees o ndew o maak oxey. Xam ci’ong o ten o tew, yaa jalanaxamoona fo njambaar too ɗox a ñoq ake no Yaal oxe.» Sawul koy, kaa xalaatoogu yee: «Baa ta ref a ref rek ee o ɓay es na warkan, ndaa fat xa ƥay axe no Fiifilista we a mbarin.»

¹⁸ Dawid a doona a Sawul ee: «Daali maad, an refum fo xar o ñoow es a refu? Kaam ee ndi xar o kurcala in a refu kam Isra’el, boo tee kaam refaa o seemir no maad oxe?»

¹⁹ Ye waxtu fee Meerab, o ƥiy o ndew onqe Sawul, a war’eena o ci a Dawid a fadiidna, a guuta, a ci’el a Adiri’el, o Meemexola xe, a dolooxankin.

²⁰ Kaa koy, Mikal fee o ƥiy o ndew o lakas onqe Sawul a bug’a a Dawid lool. Ye Sawul a yegneena keene, a fel’aan lool.

²¹ Sawul a laya taa no yiif um ee: «Xam ci’in a Dawid, ndax ta ref no ten mbog, Fiifilista we a mbaagin o mbar.» Neene, Sawul a laya a Dawid no jaf ɗikandeer ee: «Ndiiki, waagataa o ref o seemir es.»

²² Sawul a hebla dag we ten ee: «Fat nu lay a Dawid too baa and ee mi heblun a nuun ee: ‹I nga’a yee o maad oxe fo dag we ten fop kaa mbexong. Ndiiki kañ, waagataa o ref o seemir um.› »

²³ Maaga, dag we a ngara me Dawid, a ndaawnin a ƭelem akaaga na Sawul, soo Dawid a doon a den ee: «Kaa nu mboog ee ɓek o kiin no ƥasil ne no maad oxe caaxaan oo! Nu anda yee o ndool refum too refiim o kiin o maak.»

²⁴ Dag we a ngara, a njangtoox a Sawul ke Dawid a doon’ina a den.

²⁵ Sawul a laya a den ee: «Layanaamoo a Dawid ee: ‹O maad oxe bugee cegel a refangee xa sool no goor Fiifilista teemeed, ndax ta rabdinoox took fañ we ten.› » Ke Sawul a bug’ina koy, refu yee Fiifilista we a mbar a Dawid.

²⁶ Dag we Sawul a yegniida a Dawid fa lay faaga, too a felaan lool, ndax ta refit neene o seemir no maad oxe. Ye waxtu fee da ndegoor’ina a helkaa fo fad,

²⁷ Dawid fo yoon we ten a inooxa, a nqire’ik too a mbara goor teemeed ƭik no Fiifilista we. Dawid a ɓisiida o maad oxe xa sool axe, da limel mbaambir um, ndax ta refat o seemir um. Maaga, Sawul a ci’aan a Mikal fee o ƥeem, ta refat o teem.

²⁸ Sawul a and’a a paax ee o Yaal oxe xey fa Dawid, too Ii-isra’el we fop a mbug’aan.

²⁹ Maaga, Sawul a moƴ’a o saɗar a Dawid soo a fañraa fo ten no ñoow um fop.

³⁰ Gelwaar we no Fiifilista we a maad’a o nqire’aa fo Ii-isra’el we, too a mbanuu da ngar’ina rek, Dawid hupoogu dag lakas we Sawul fop o ndam, too a siw’a lool.