1 Sami’el 16 - NQAARIIT NE ROOG

Roog a jila a Dawid nen o maad o qas

¹ O Yaal oxe a laya a Sami’el ee: «Kaa o naqadilooxkaa na Sawul boo a mban? Mi o mat deɓaanum, ndax maadooxankatee a Isra’el. Mayƭandti o jan ole wo diwliin too retanaam Betleheem no mbind Isay, yaam jilaam na xa ƥeem o maad oxe deyaxama.»

² Kaa koy, Sami’el a doonaan ee: «Nam um retitkaa? Xan Sawul a yegin soo a waraam.» O Yaal oxe a layahinaan ee: «Ɓislooxi o nqeel soo lay ee: ‹Kaam gar ndax um ɓoxot o Yaal oxe sadax.›

³ O fadangaa, fat o xur a Isay fo ƥasil um na sadax fee, cinj kaaga, mi fa xoox es xam andnoorong ke waroona o fi, too fat o ɗuumanaam oxe um lalkang.»

⁴ Sami’el a fi’a ke o Yaal oxe a lay’uuna. Ye ta rokaa Betleheem, maak waa na teeru faa a nqetooxiidaan, a sendaa soo a laamtin ee: «Mbaar a kar ale wo mene jam soom oo?»

⁵ Sami’el a doona a den ee: «Ii, jam soom oo. Kaam gar ɓoxotiid o Yaal oxe sadax. Tedlandooxyo boog too ngar ndeer fa mi na sadax fee.» Sami’el a tedlanda a Isay fo xa ƥeem soo a xur a den na sadax fee.

⁶ Ye da ngaraa, ndax ta tedland a den, Sami’el a ga’a a Eliyab soo a lay taa no yiif um ee: «Xeƈa oxeeke refu oxe o Yaal oxe a jilna ndax ta ɗuumel.»

⁷ Kaa koy, o Yaal oxe a laya a Sami’el ee: «Baa ne ta jagna soo a jeg a keen a yul a ngid of, yaam jilinum. Naagiim o ɗeetaa no ke wiin we a ƭeetaa. O kiin oxe, ke yulna a kid um rek a ɗeetaa, ndaa mi fee o Yaal oxe o mat, kam ee kam xeeñ um ɗeetaa.»

⁸ Cinj kaaga, Isay a xoya a Abinadab, a ɓisiidin mbaambir Sami’el, ndaa Sami’el a layaan ee: «Ha’aa, oxene refahinee oxe o Yaal oxe a jilna.»

⁹ Isay a ɓisiida a Sama, soo Sami’el a layahinin ee: «Ha’aa, oxene refahinee oxe o Yaal oxe a jilna.»

¹⁰ Neene, Isay a ɓisiida xa ƥiy ɓetaa ƭaq na xa ƥeem axe mbaambir Sami’el, ndaa Sami’el a layaan ee: «O Yaal oxe jilee o leng no wene.»

¹¹ Cinj kaaga, Sami’el a laamta a Isay ee: «Ndax yoqee xa pes xa lakas?» Isay a doonaan ee: «Aha kañ, a yoqa oxe moƴna ref o ndeɓ, ndaa kaa gayik paal.» Maaga, Sami’el a laya a Isay ee: «Lulteen ta gar, yaam sadax fene ñaamkaand, a refangee kaa gar.»

¹² Isay a xoyniida a Dawid. Ten koy kaa yaxig’u, a mos a kid soo a xen caq. O Yaal oxe a laya a Sami’el ee: «Inooxi o ɗuumin, yaam oxeene o mat oo!»

¹³ Sami’el a janga o jan diwliin ole, a ɗuumit a Dawid a ndeer maag we ten. Yiif le Roog a fudooxa na Dawid, a ref fo ten no kaa xotitna no ñaal naaga. Cinj kaaga, Sami’el a xaada Rama.

¹⁴ Yiif le no Yaal oxe a sutooxa na Sawul, soo yiif faaxeer laa o Yaal oxe a luliidna a gariida, a rokin caƭar.

¹⁵ Dag we Sawul a ngara a layin ee: «Andaa yee yiif faaxeer laa Roog a luliidna na toroxandang.

¹⁶ Fat wo fee refna o maad in o hebil a in boog, in we ndefna dag of i mbaaƭ o koor oxaa waagna o nqilimb, ta xilimbanang mbanuu yiif faaxeer le Roog a luliidna a garna na wo. Neene, xan o waag o moƴan.»

¹⁷ Sawul a doona a den ee: «Mbaaƭanaamoo boog oxaa waagna o nqilimb a paax, nu ƥisiidaam o ten.»

¹⁸ O leng no dag we a layaan ee: «Isay fee Betleheem a jega o ƥiy onqaa waagna o nqilimb a paax, a ref o koor o caru, too itam o qiixire say oo. Yiif a laytaa, a mos bo, too kaa jolna keene sax, o Yaal oxe xey fo ten.»

¹⁹ Sawul a lula duleer um maa Isay, ndax da layin ee: «Lultiidaam a Dawid fee o ƥeef onqe na gayaa paal.»

²⁰ Isay a janga o faam, a sufin puuru fo mboxos biiñ fo o mbambe, a cooxin a Dawid fee o ƥeem ta ɓislooxin a Sawul.

²¹ Ye Dawid a fadiidna me Sawul, a refa no jalanan. Oxeene a fex’aan a paax soo a fi’in o saasaq ƥonax um.

²² Sawul a lulta, ndax ta layanel a Isay ee: «Kaam xeɗang o xaƴaam fa Dawid ta jalanaxam, yaam a felaxam lool.»

²³ Boo yiif faaxeer le Roog a luliidna a gar’ina na Sawul, Dawid a jangooga o nqilimb onqe soo a xilimbaa. Maaga, Sawul a ref no haaƭaa a paax boo yaa ta moƴankaa. Neene, yiif faaxeer le a riƈatooxoogaan.