1 Sami’el 14 - NQAARIIT NE ROOG

Yoonatan a songa a qaaj no Fiifilista we

¹ Na bes fa leng, Yoonatan fee o ƥiy Sawul a laya o tag oxe saqoogna ƥonax ke ten ee: «Gariidi i ƈaktoox a qufid ale boo no daland olaa no Fiifilista we refna maana no saax o lakas ole!» Kaa koy, yegin’iran a faap um.

² Sawul oxaa reeƭa no cat kaa Gibe’a yoora ndaxar goronaad naa refna na teeru faa Migron. Xiixire we ndeeƭna fo ten a ndeeƭa ngap teemeed ɓetuu fa leng.

³ Ahiya fee o ƥiy Ahituub fee reeƭna o ƥiy no ndeɓ Ikabood saqoogu o jamb ole. (Ikabood koy, o ƥiy Finees a reeƭu, a ref o ndaan Eeli fee reeƭna o saasadax oxe no Yaal oxe kam Silo). O leng no xiixire we and’ee yee Yoonatan a reta.

⁴ Na qufid ale, Yoonatan a waaƭooga me ƭiif ke no Fiifilista we a ndeeƭna, too a jeg’a loot njol no saax oluu refna. Leng ne Boses a ne’’e, lakas ne a ne’el Sene.

⁵ Loot leng ne farna fa Mikmas a reeƭu, no ɓemb-roog o janoon, lakas ne a ref farna fa Geba, no ɓemb-roog o ñamaak.

⁶ Yoonatan a laya o tag oxe saqoogna ƥonax ke ten ee: «Gariidi i ndet boo no daland olaa na qucooxar akeene. Xeƈa xan o Yaal oxe a farit a in, yaam dara waagiran o yaqan ta ci’it o ndam wiin we maya mayeer.»

⁷ Oxe saqanooguuna ƥonax ke a doonaan ee: «Fi’i fop ke refna no yiif of. Reti rek, mexey fa wo muu o jofaa.»

⁸ Yoonatan a layaan ee: «Aca boog i ndet maa no goor waana, laltinook maa den.

⁹ A layangaa a in ee: ‹Ndayyo meene boo yaa i soƥiidna a nuun!›, fat i ngeenoox o mbiñ o leng, mbañ o ŋaayik maa den.

¹⁰ A layangaa a in koy ee: ‹Ŋaayiidyo me in!›, fat i ŋaay, yaam keene xan a ref na in o anddiloor ee o Yaal oxe xan a ɓoxot a den na xa ƥay in.»

¹¹ Den ɗik fop a ndeta, a laltinook no daland olaa no Fiifilista waa, too weene a layrooga yee: «Nga’yo Hebre we, owey sutooxiidaa na semb ake da ƭas’ina.»

¹² Goor we no daland olaa a mbalalooxa a Yoonatan fo xe saq’ina ƥonax ke ten ee: «Ŋaayiidyo me in boo i yegin a nuun tig.» Yoonatan a laya oxe saq’ina ƥonax ke ten ee: «Reefaam, yaam o Yaal oxe a ɓoxota a den na xa ƥay axe no Ii-isra’el we.»

¹³ Yoonatan a ɓorooga, oxe saq’ina ƥonax ke ten a reefan. Yoonatan kaa xawoogu Fiifilista we da yenaa, soo oxe saq’ina ƥonax ke ten a reefan, a pataa a den.

¹⁴ Song eetaand leene na Yoonatan fo o tag um a warnoora ngap Fiifilista qarɓeen ƭik no saawit o ŋooɓu.

¹⁵ Xiixire waa no Fiifilista we fop a ndiida, we yoq’ina no saŋe ne yoo, we ndeeƭna me widuuna fop oo. Yeeyetax waa boo na yaj ake a ndiida itam. Kaa jolna keene sax, lanq ke a yo’nooxa, too diid maak a jeg’a.

¹⁶ Yeeyetax we Sawul ndeeƭna Gibe’a fee Bensame, a nga’a yee faan le no Fiifilista we kaa pictoor, a nqotaa muu refna.

¹⁷ Sawul a laya xiixire waa ndeeƭna fo ten ee: «Limyo wiin we, ndax i and aniin ndetu a ndeer in.» A lima too a nga’a yee a yoqa a Yoonatan fo xe na saqaa ƥonax ke ten.

¹⁸ Sawul a laya a Ahiya, o saasadax oxe yee: «Ɓisiidi arka ne Roog!» Ne arka ne reeƭna a ndeer Ii-isra’el we a koom taxu Sawul a layin keene.

¹⁹ Ye Sawul a maadna o layaa fo o saasadax oxe, coow le kam saŋe ne no Fiifilista we a moƴa o magnaa, soo Sawul a lay o saasadax oxe yee: «Xaƴeen!»

²⁰ Sawul a fokata xiixire waa ndeeƭna fo ten fop, da ndet na ñoq alaa. Ye da mbadiidna, a soƥa fañ we den a ñoxoraa na qoox den, ta fi njaxasoor naa o leng waageerna o lay ne ta fodna.

²¹ A jeg’a Hebre waa Fiifilista we a ndam’ina yaaga, too da yoon fa den sax na ñoq ale. Weene a njangooxiida no Ii-isra’el we ndeeƭna fa Sawul fa Yoonatan.

²² Ye goor Ii-isra’el we ƭasik’ina na xa coong axaa Efrayim fop a yegna yee Fiifilista we kaa ƈufoogu, a sutooxiida, a ndaabaa a den boo a mbogat na ñoq ale.

²³ Neene mat o Yaal oxe a ci’tu Ii-isra’el we o ndam no ñaal naaga. A ñoq ale a reta boo a jol a Bet-Awen.

Xiixire we Isra’el a mucla a Yoonatan

²⁴ Xiixire we Isra’el fop kaa ƈax’u xa ƥox no ñaal naaga, yaam Sawul kaa saloox’u yee: «Sabab took no kiin oxuu ñaamna tig ndeer mene boo yaa njeeƈ ne a yaarkaa, too rabdinooxafuliim took no fañ we mi.» Naaga, o leng no xiixire waa ñim’ee ñaamel leng.

²⁵ Wiin we fop a mbadiida kam a koƥ alaa jeg’ina suum mayu boo took lanq ke sax.

²⁶ Ye xiixire we a mbadna maa a pomb akaa a ndeeƭna, a nga’a yee suum ke kaa yuuroogu, ndaa o leng na den luuxee o ɓay um, yaam a saɗar’a a salax ale Sawul.

²⁷ Yoonatan koy, yeg’ee dara na salax ale faap um a lay’ina na xeet fee too a suupa cat ne no loq ole ta pokoox’ina kam fomb le, a luuxin. Maaga, a kid um nqooɗ’atee.

²⁸ Naaga, o leng na xeet faa a layaan ee: «Faap of kaa saloox’u yee: ‹Sabab took no kiin oxuu ñaamna tig no ñaal ne xaye!› Ten taxu fop kaa nqij.»

²⁹ Yoonatan a laya yee: «Faap es kaa ñaatlandaa saax le rek. Nga’yo koy ne jegatintuuma doole yaam onqe ñimuuma no suum kene rek.

³⁰ Giimee boo xiixire we fop a ñaam’ina xaye rek no njangal ne da soƥna me no Fiifilista we fañ den, a qaw ale i nqawna weene a moƴkooga o ɗom neeke.»

³¹ No ñaal naaga Ii-isra’el we a nqawa Fiifilista we, a ndaabtaa a den Mikmas boo Ayalon, ndaa a nqij’a lool.

³² Ten taxu a ndeɓooxa no njangal ne no Fiifilista we, a njang no paal ke, no qoox ke fo na xa qeel axe, a nqirsit a den a lanq soo a ñaamaa a tegeƴ ake fo fo’oy um.

³³ Sawul a yegniide yee: «Xeet fee owe tooñaa o Yaal oxe, yaam ne da ñaamaa a tegeƴ fo fo’oy um.» Sawul a laya a den ee: «Nuun soo ngore’aƭar! Ñofyo o mberengiid me mi ɓil maak.»

³⁴ Cinj kaaga, a ɓaata teen ee: «Pictooryo kam xiixire we too lay oxuu refna ta ɓisiid mene nqoox mbaat mbaal um, a xirsin soo a siidnitin took ɓil leene. Neene, nu ñaamkee a tegeƴ fo fo’oy um, too nu tooñkee o Yaal oxe.» No yeng olaaga, oxuu refna no xiixire we a dama nqoox um, a ɓisiidin, a xirsitin no mbiñ onqaaga.

³⁵ Neene Sawul a maxantu o Yaal oxe o sadaxand. Kaaga reeƭu o sadaxand o feraand ole ta maxanna o Yaal oxe.

³⁶ Sawul a laya yee: «Fat i ndaab Fiifilista we kam o yeng olene, nduguñaa a den boo yaa mbeet ne a xoolna, too ba i nqaƴ o leng ta yoq.» A ndoonaan ee: «Fi’i fop ke xalaatoona yee a faaxa.» Kaa koy, o saasadax oxe a laya yee: «Ngariidyo mene kañ boo i laamit a Roog.»

³⁷ Maaga, Sawul a laamta a Roog ee: «Ndax waagaam o daab Fiifilista we? Ndax xan o ɓoxot a den na xa ƥay axe no Ii-isra’el we?» No jaf laaga koy, o Yaal oxe dooniran dara.

³⁸ Sawul a laya yee: «Matiidyo mene, nuun aa-adax we fop, ndax i mbaag o and na bakaad fum kene a hatu.

³⁹ Ne ta wooritna yee o Yaal oxe refna o Muumucil Isra’el oxe ñoowaa, neene a woortu yee oxe tooñna, xan a warel, a refangaa Yoonatan fee o ƥees sax!» Naa xiixire waa mbodeena fop, o leng dooniran.

⁴⁰ Sawul a laya a den ee: «Payyo no saax o leng nuun fop, soo mi fa Yoonatan fee o ƥees i pay no saax o lakas.» Xiixire waa a layaan ee: «Fi’i ke xalaatoona yee a faaxa.»

⁴¹ Sawul a laya o Yaal oxe yee: «Roog fee Isra’el, andnoori ndigil ne.» A mbanjanga, too mbanjang ne a yen took Yoonatan fa Sawul, soo lakas we a nqool qac no kaaga.

⁴² Sawul a laya yee: «Mbanjanganyo a in, mi fa Yoonatan fee o ƥees.» A yena took Yoonatan.

⁴³ Sawul a laya a Yoonatan ee: «Layangaam ke fi’oona.» Yoonatan a doonaan ee: «Kaam ñimit suum ke cat ne no loq ole pokoox’uuma. Mexey koy, jaɓaam o xon.»

⁴⁴ Sawul a laya yee: «Yaasam Roog a halakaam, yaa xoneeroona, wo Yoonatan!»

⁴⁵ Xiixire waa fop a ndalfooxa o lay a Sawul ee: «Xar? Yoonatan o mat xonkee, ten fee fexeyna boo Isra’el a jeg o ndam o maak onqene. Kaaga jegkee muk! Ne ta wooritna yee o Yaal oxe xe ñoowaa, o biil o leng samitkee no xoox um, yaam fo o ndimle Roog a fi’tu ke ta fi’na xaye fop.» Maaga, xiixire waa a mbata a Yoonatan boo xonee.

⁴⁶ Sawul a xaƴa a taab ale ta daaboogna Fiifilista we, soo weene a nqaad.

Fo ndam ne Sawul, ƥasil ne ten

⁴⁷ Ye Sawul a refatna o maad Isra’el, a xire’a fo fañ we mbidna a den fop: Moomowaab we, Aa-amon we, Ee-edoom we, maad we Cooba fo Fiifilista we, too wuu ta faambrit’ina rek, a xaw a den.

⁴⁸ A feeñla o jeg doole um, ye ta xawna Aa-amalek we soo a wat Ii-isra’el we na xa ƥay no weene njangaloogna a den.

⁴⁹ Xa ƥiy xa koor axe Sawul ndeeƭu Yoonatan, Yiswi fa Malkisuwa. Xa ƥeem xa ƭaq xa tew axe koy, o maak oxe Meerab a ne’’e, soo o ndeɓ onqe a ne’el Mikal.

⁵⁰ O tew oxe Sawul Ahinowam a ne’’e a ref o ƥiy Ahimaas. Farɓa fa maak fee Sawul Abineer a ne’’e, a ref o ƥiy Neer fee refna faap o ndeɓ Sawul.

⁵¹ Kiis fee baa Sawul fa Neer fee baa Abineer, xa ƥiy Abi’el a ndeeƭu.

⁵² No ñoow ole Sawul fop Ii-isra’el we a ñoxorooga a ñoq a ƭomu fo Fiifilista we. Ten taxu jambaar mbaat o kiin o cegu doole xuu Sawul a ga’’ina, kaa ɓekoogun no xiixire we ten.