1 Sami’el 12 - NQAARIIT NE ROOG

Jeetaay le Sami’el a asooritna Ii-isra’el we

¹ Sami’el a laya xeet fee Isra’el fop ee: «Nu anda yee reefaam o bug ole nuun no fop ke nu layaxama boo dalnan a nuun o maad.

² Ndiiki koy, xan o maad oxe a adooxan a nuun, yaam mi kaam nogoyat lool, fuum, too xa ƥees maak jiŋ a ndefu nen a nuun. Ɗoxaam a nuun no kaa xotitna no ndeƥandoong es boo no ñaal roog ne xaye.

³ Mexey mbaambir nuun! Um jegangaa ƥanjel, ƥanjaamoo mbaambir no Yaal oxe fo mbaambir o maad oxe ta jilna. Ndax jangaam nqoox no kiin mbaat o faam um? Ndax naxaam o kiin mbaat um toroxandin? Ndax mosaam o jaɓ neexil no kiin ndax ga’kiim a pi um? A refangaa, too a jega, xam nomit a nuun baasnoor.»

⁴ A layaan ee: «Mosiro o nax a in mbaat o toroxand a in, too mosiro o jaɓ o gerel.»

⁵ Sami’el a ɓaata o lay a den ee: «O Yaal oxe fo xe ta ɗuumna ndefu seede in no ñaal ne xaye yee nu njegee dara kaa nu ƥanjtaxama.» A ndoonaan ee: «Den o mat ndefu seede we.»

⁶ Maaga, Sami’el a layahina xeet faa yee: «O Yaal oxe mat seede’un, ten oxe jilna a Moyiis fa Aaroon soo a sut daan we in no saax laa Misira.

⁷ Ndiiki koy, ngeenooxyo mbaambir no Yaal oxe, too xam wetand a nuun mbaambir um a pi a paax ake ta fi’anna a in, in fo daan we in.

⁸ Cinj ye Yakoob a garna Misira, daan we in kaa ƈufginooxoogu o Yaal oxe. O Yaal oxe a lula a Moyiis fa Aaroon da ngar a sut a den Misira soo a ngenniid a den no mbiñ onqene.

⁹ Kaa koy, cinj kaaga, a mbeeca o Yaal oxe Roog den. Ten taxu o Yaal oxe a xaƴ a den a ndeer xa ƥay axe Siisera, o aa-adax oxe no xiixire we Hasoor fo a ndeer xa ƥay axe no Fiifilista we fo a ndeer xa ƥay axe no maad oxe Mowaab, ye weene a nqire’na fa den.

¹⁰ A ƥaata o ƈufginoox o Yaal oxe too a layin ee: ‹I mbakaada, yaam kaa i nqaƴong soo mbaɗooxaa a Baaliin, Astarteyiin. Ndiiki koy, mucli a in na xa ƥay no fañ in, too yaaga xan i mbaɗooxong.›

¹¹ O Yaal oxe a lula a Yerubaal, a lul a Bedan, a lul a Yefta, cinj kaaga ta lulaam, mi Sami’el, ndax ta wat a in na xa ƥay no fañ we mbidna a in boo i mbaag o ngenat na jam.

¹² Ye nu nga’na yee Naahas, o maad oxe no Aa-amon we kaa songiidaa a nuun, kaa nu layaam ee: ‹Neeke waagee suur, o maad i soxla’u.› Yaaga fop toox de, o Yaal oxe Roog nuun refu o maad nuun.

¹³ O maad oxe nu soxla’’ina too nu nqeɗ’un, oxey boog. O Yaal oxe a dalnanaan a nuun.

¹⁴ Boo nu saɗarna o Yaal oxe, mbaɗooxin, nan-giloox o ñuxur um, mbañ o nanaƭar kebil ke ten, nu ndeefangaan, nuun fo o maad oxe nuun, xan fop a faax.

¹⁵ Kaa koy, boo nu nan-gilooxeerna o ñuxur no Yaal oxe, mbañ o nanan kebil ke ten, xan a toroxandit a nuun katil um, ne ta fi’it’uuna no daan waa nuun.

¹⁶ Ndiiki koy, njagandooxyo ndax nu nga itam com’andtu ke o Yaal oxe a fi’kaa na kid nuun.

¹⁷ Mee ndax na waxtu fee na saxad ale na bele fee i ndefu! Xam ƴufginoox o Yaal oxe, too xan a fangin ƭuuɗ soo a deɓiid. Neene, xan nu and too nga ee ke nu mbi’na, faaxee na kid no Yaal oxe, ye nu nqeɗna o maad.»

¹⁸ Sami’el a ƴufginooxa o Yaal oxe, too no ñaal leng kut ne o Yaal oxe a fangna ƭuuɗ soo a deɓiid. Naaga, xeet faa fop a saɗar’ata o Yaal oxe fa Sami’el.

¹⁹ Xeet faa fop a laya a Sami’el ee: «Xeɗooxani a in o Yaal oxe Roog of, in we dag of, ndax i saŋkooxkee, yaam i ƥaata no pakaad in a qeƭ ale no maad oxe.»

²⁰ Sami’el a doona xeet faa yee: «Ba nu saɗar! Ndigil oo, nu mbi’a paaxeer keene fop, kaa koy, ba nu ndiƈatoox o Yaal oxe, ndaa mbaɗooxeenoo na qeeñ nuun fop.

²¹ Ba nu mbesin a cinj muk, ndeefik roog andand. Den weene mbaagee o ƈufig a nuun mbaat da mucil a nuun, yaam xa koɓong rek a ndefu.

²² O Yaal oxe xaƴkee a nuun yaam gon maak le ten fo ne ta heboox’ina yaaga o fi a nuun xeet um, ten fa xoox um.

²³ Mi fa xoox es koy, xam wootooxaa o tooñ o Yaal oxe yaam o ñak o xeɗan a nuun soo fañ o jangin a nuun kili a ƭat a paax a cofu le.

²⁴ Kaa rek, saɗaryo o Yaal oxe, mbaɗooxin no ndigil kam a qeeñ nuun fop too mbetandoox com’andtu ke ta fi’anna a nuun.

²⁵ Kaa koy, boo nu mbi’na paaxeer, xan nu saŋkoox, nuun fo o maad nuun fop.»