1 Sami’el 1 - NQAARIIT NE ROOG

Xaan a reta Silo no Mbind naa no Yaal oxe

¹ A jeg’a o koor oxaa gen’ina na teeru faa Rama, na xa coong axaa Efrayim, a fog na qaw ale Suuf. Elkana a ne’’e, a fog no kurcala le Efrayim. Ten fa xoox um koy, o ƥiy Yeroham a reeƭu, Yeroham a ref o ƥiy Elihu, Elihu a ref o ƥiy Tohu, soo Tohu a ref o ƥiy Suuf.

² Elkana a jeg’a rew ɗik, o leng oxe Xaan a ne’’e, o lakas oxe a ne’el Peninaa. Peninaa a jeg’a xa ƥiy, ndaa Xaan o mat, jeg’ee o ƥiy o leng.

³ O hiid oluu refna koy, Elkana kaa inoortoogu Rama, a ret no saax laa Silo, ndax ta faɗoox o Yaal oxe Hupna fop, a ɓoxotin sadax. Xa ƥiy xa ƭaq axe Eeli, ndefna Hofni fa Finees, saasadax no Yaal oxe a ndeeƭu maaga.

⁴ Bes fee Elkana a sadaxtoogna a fadiida, too a lasa o teem Peninaa fo xa ƥeem fop na sadax feene.

⁵ A cooxa a Xaan a las um itam. Ke o Yaal oxe a fi’’uuna o tew o timar fop oo, ten Elkana a moƴ’u o fex.

⁶ O kend oxe o mat, kaa naxooxoogun, a naqadilan, yaam ke o Yaal oxe a ci’’eeruuna o ƥiy.

⁷ O hiid oluu refna, leng kut ke xewoogu, a mbanuu Xaan a gar’ina no Mbind ne no Yaal oxe. No jaf leene itam, Peninaa a naqadilaan boo ta loolaa, a jaranin ta fañ o ñaam.

⁸ Elkana fee o kor um a laamtaan ee: «Xaan, xar taxu o loolaa, fañ o ñaam? Xar taxu kam of felee? Ndax kaa moƴaniroong xa ƥiy xa koor xarɓaxay?»

⁹ A cinj ye lakas we a ñaamna, Xaan a reta no ndokand naa no Mbind ne no Yaal oxe refna Silo. Eeli, o saasadax oxe kaa moof’u no duɗand le paam o don-maax ole no Mbind ne no Yaal oxe.

¹⁰ Xaan kaa gooy’u lool, a yogorloox, a loolaa, too kam xa lool axe a diisa o Yaal oxe coono um.

¹¹ A regta too a lay ee: «O Yaal oxe, wo fee Hupna fop, a soƥangaa yee a kid of a ndoonooxa took es, mi fee naqadilooxna, ƴufgaam. O weecangiraam, mi fee o ceefeer of, ci’aam o ƥiy o ngoor, yaaga xam kesanong o ten no ñoow o ñis um fop, too ruusooxkee boo muk.»

¹² Ne Xaan a miñ’ina na qeƭ lool, a taxa Eeli a ref no horooxan.

¹³ Kaa ga’oogu muuceek um a yo’nooxaa rek, ndaa nanoogee dara, yaam Xaan kaa xeɗoogu taa no yiif um, soo Eeli a xalaataa yee kaa way.

¹⁴ Eeli a layaan ee: «Ndi wo o mat, kaa o refkaa fo way of leeke boo a mban? Sutooxi, salditik tafil!»

¹⁵ Xaan a doonaan ee: «Ha’aa, o yaal es, wayiim de, kaam torox. Ga’iim sax maa sangara a farna, ndaa kaam diisoogu o Yaal oxe ke refna kam xeeñ es.

¹⁶ Ba o ɗeetaam muk, mi fee o ceefeer of, nen o tew o paaxeer. O ga’angaa a qeƭ es a miñit neeke, andi rek ee xeeñ es kaa may muut fo coono fo naqad.»

¹⁷ Eeli a layaan ee: «Reti na jam. Yaasam Roog fee Isra’el a ci’ong ke xeɗanoona!»

¹⁸ O tew oxaa a doonaan ee: «Yaasam o ceefeer of a daaw keñya of fo ten.» A inooxa, a ret, a sog o waag o ñaam, yaam yogorloox’atee, too a tagid um a fel’ata.

¹⁹ No feet olaa ƥiiɓ cuc, Elkana fo ƥasil um fop a ndeta, a ngung mbaambir no Yaal oxe, a mbaɗooxin, cinj kaaga da nomtoox, a nqaad Rama. Elkana a yoona fa Xaan fee o teem, too o Yaal oxe a jaɓa a qeƭ ake Xaan.

O rimel ole fo ndeƥandoong ne Sami’el

²⁰ Xaan a roka o fud, too yaa a pe um a mbadna, a ñoota o ƥiy o ngoor, a ne’in Sami’el ee: «Kaam xeɗ’un o Yaal oxe.»

²¹ Cinj kaaga, Elkana a yoona fo ƥasil um fop, da ndet Silo, ndax ta ɓoxot o Yaal oxe sadax ne ta fi’tooguuna o hiid oluu refna fo sadax fa mbadnir a tegit.

²² No jaf laaga koy, Xaan ret’ee, yaam kaa lay’u a Elkana fee o kor um ee: «Kaam cungkaa boo o nqeq onqe a roɓ, um ɓisin Silo mbaambir no Yaal oxe, soo ta yoq maaga boo kili.»

²³ Elkana a doonaan ee: «Yaaga boog a faaxa, yoqi meen boo yaa roɓnanoona. Yaasam o Yaal oxe a fadin a tegit um.» Naaga, Xaan a yoqa maaga, a numnaa o njaaƈ onqe boo neen a roɓnun.

²⁴ Ye ta roɓnuuna, a soƥ’a ta maad o neewaa lool, ndaa a ƥisa o njaaƈ onqe Silo, ten fo o kor um. A ƥislooxa itam nqoox naa jegna xa kiid xa tadaq fo o saaku mbiɗel fo mboxos naa yipna biiñ.

²⁵ Ye da mbadiidna, a nqirsa nqoox ne, soo a sogkaa o ƥis o njaaƈ onqe maa Eeli.

²⁶ Xaan a laya a Eeli yee: «O yaal es, ndax wetandooxaa o tew oxaa mos’ina ref meeke a paam of too a xeɗoogu? Ne ta wooritna yee woxe ñoowaa, neen a woortu yee mi a reeƭu.

²⁷ Keeke refu o njaaƈ onqe loolooxooguuma o Yaal oxe kam a qeƭ es, too a ci’axam o ten.

²⁸ Ten taxu mi itam, kaam bug o ci’in o Yaal oxe, ndax ta refanin no ñoow o ñis um fop.» Cinj kaaga, a ngunga mbaambir no Yaal oxe, a mbaɗooxin.