1 Piyeer 3 - NQAARIIT NE ROOG

Rew we fo gor den

¹ Nuun rew we itam, fat oxuu refna na nuun a jaɓan o kor um. A refangaa sax ee leng-leng na den ngimee na fa lay fee Roog, xan a ngar no ngim onqe na pexey a pesoorooƭ nuun, nuun we ndefna rew den. Maaga, soxla’kaand o lay mayu,

² yaam ne da nga’kaa o ñoowooƭ nuun o ñaku ƥanjel ole, too a war o niwel.

³ Baa a qendandax nuun a day tafil soom nen maar qenu mbaat a tokax wurus mbaat toki mosu,

⁴ ndaa fat a ref a qendandax alaa inoorna na qeeñ nuun, a ref yiif damooxu laa ɓuuɓna. O mosel o nandu neene waagee o yaqoox, too a jega o njiriiñ o maak mbaambir Roog.

⁵ Neene, rew tedu we yaaga yaakaar’ina na Roog, a nanan gor den, a mosandtoogu a qoox den,

⁶ nen a Saara fee nanan’ina a Abraham, too a xoyoogun o yaal um. Na Saara, nu ndefata xa taan um, yaa nu mbi’aa paax fo yaa nu nqaƴeerna diid leng a jom’and a nuun.

⁷ Nuun gor we itam, yaa oxuu refna na nuun a ñoowaa fo o teem, fat a and ee mbindeef naa moƴuuna o neew doole a refu. Niwyo a den nen waa mbarna o lam fa nuun yirmande fee no ñoow ole, ndax dara waagkee o yaq a qeƭ nuun.

Xij yaa o fi’aa ke jofna

⁸ Ndiiki koy, njegyo nuun fop xalaat fa leng kut, too mbog o liir. Njegyo a ndeer nuun o mbeq fa yirmande fo a neewandax.

⁹ Ba nu ndakin paaxeer ke fo paaxeer mbaat wen le fo wen. Kaa nu mbar o mbarke’aa kañ, yaam no keene Roog a xoyit’u a nuun, ndax nu lam barke um.

¹⁰ «A soƥangaa boog ee o kiin kaa bug o fex o ñoow ole, soo a jeg ñaal baneex, fat a gay ɗelem um boo laykee paaxeer, a gay muuceek um itam na ƭelem a naanax.

¹¹ Fat a goƭatir fo paaxeer, soo a fi’aa paax. Fat a waaƭ jam, a reefanin.

¹² Yaam o Yaal oxe kaa doon a kid um took jofu we, soo nof um a mbetoox na qeƭ den, ndaa koy, mukit fee no Yaal oxe kaa hiɓoox no we na mbi’aa paaxeer.»

¹³ An na ñagadilkaa a nuun boog, yaa nu mbaajaa o mbi paax?

¹⁴ A soƥangaa sax ee, kaa nu coono’aa yaa nu mbi’aa ke jofna, nu ƭaaya. Ba nu saɗar ke wiin we a saɗaraa, too ba nu njaaxiɗ.

¹⁵ Kaa koy, niwyo a Kiristaa kam a qeeñ nuun nen o Yaal nuun. Njagandooxyo kili, ndax nu mbaag o ndoonaa a paax oxuu laamitna a nuun ke taxna yaakaar neene a ref na nuun.

¹⁶ Kaa koy, mbi’eenoo fo xeeñ letu, too niw oxuu refna. Njegyo yiif jeejooxeer dara, ndax boo andoona sax ee kaa nu mberanel paaxeer, maaga we na layaa paaxeer na pesoorooƭ a paax nuun na Kiristaa, a ngac’andel.

¹⁷ Roxondoox coono ne Roog a bugtuuna yaa o fi’aa paax, moƴu yee yaa o fi’aa paaxeer.

¹⁸ Jaf leng kut, Kiristaa fee jofna a xona yaam pakaad ke no jofaƭaru we, ndax ta ɓisiid a nuun maa Roog. Cer um kiihiin a nqona, ndaa Yiif Tedu le a nomtiidaan no ñoow ole.

¹⁹ Na pexey Yiif leene a reta itam, a waare’ik a yiif ake mbegeena,

²⁰ ndefna we nanaƭar’ina yaaga ye Roog a maad’ina o muñaa, a soƥ Nowe a jalaa a kaal ale. Wiin mayeer waa ndeeƭna ɓetuu daduk soom ndok’ina na kaal ale mucil’e na pexey foofi le.

²¹ Kaa reeƭu nitaale’ir na batiise fee na muclaa a nuun ndiiki. Na batiise fee, refee yee ndoƭ cer in i ƥogaa, ndaa kaa ref i nqeɗaa a Roog o njeg yiif jeejooxeer dara. Ten o mat na muclaa a in na pexey a qontax ale Yeesu Kiristaa

²² fee ŋaayna na asamaan, a ref na ñamaak Roog, a maadooxaa took malaaka ke fo sañ-sañ ke fo katil aa-asamaan ke.