1 Piyeer 2 - NQAARIIT NE ROOG

Ɓil ñoow le fa xeet fa tedu fee

¹ Ngoƭatiryo boog fo paaxeer kene: Coxod kuu ndefna fo nqooƭ-nof fo yememaar fo ciis fo ñu.

² Nandyo nen xa qeq axaa sogeena o ndim, ñoowtaa fa lay fa nqoolu fee Roog ne da ñoowtitaa fo ɗeen, ndax nu maakaa too muc.

³ Mee ndax «nu anda yee o Yaal oxe a faaxa», ne a Pind a Tedu ke a laytuuna.

⁴ Matiidyo me ten, ten fee refna ɓil ñoow le wiin we a ndeɓna, ndaa Roog kaa jil’un, yaam kaa jeg’u o njiriiñ mbaambir um.

⁵ Nu mbi’angaan, xan nu njokel, nuun fa qoox nuun, nen a ƥil a ñoow a maxir, ndefik ngenand Yiif le Roog. Kaa nu ndef saasadax Roog, ndax nu mbaag o ƥoxotan sadax katu na yiif nuun, da mbelin na pexey Yeesu Kiristaa.

⁶ Yaam a laye kam a Pind a Tedu ke yee: «Mexe doonaa kam Siyoŋ ɓil maxir le jiluuma, ta ref oxe moƴna o jeg o njiriiñ. Oxuu gimna no ten, sedkee muk.»

⁷ Nuun we ngimna boog, nuun njegu o njiriiñ onqe no ɓil le, ndaa no we ngimeeruuna, «ɓil le maamax we a ndeɓ’ina, a refata ɓil faraaj le.»

⁸ A refata itam «ɓil le na tolofnooraa wiin we fo ɓil maak le na fanqaa a den.» Kaa mbaɓan fo a caf den, yaa da nananeerna fa lay fee Roog, too no keene sax a njagandan’e.

⁹ Nuun o mat, kaa nu ndef xeet fa njile fee, saasadax no Maad oxe, ƥasil tedu ne, xeet fee Roog a watna. Roog kaa jil a nuun, ndax nu yegnitik calel mosu ke ten, ten fee xoyitna a nuun no niɓaan ole, a ɓek a nuun na qoolaand a maak ale ten.

¹⁰ Nuun we andoona yee yaaga «nu ndeeƭee xeet um», ndiiki nu ndefata «xeet fee Roog». Nuun we «ndaaw’eerna yirmande», ndiiki «nu ndaawata yirmande».

Ñoowaa nen dag Roog

¹¹ Nuun we fexuuma, ke nu ndefna ndef genar fo xa kataakoon fop oo, mexe maƭooxaa a nuun, nu mbootoox a yaaw cer a paaxeer ake na ñoxoraa fo o laaw ole.

¹² Ndeer gimaƭaru we, saqyo a pesoorooƭ a paax, ndax muu da njambitna a nuun nen waa na mbi’aa paaxeer, da nga a pi a paax ake nuun, too a simat a Roog na bes fee ta xalatooxiidkaa a den.

¹³ Yaam o Yaal oxe, njaɓanyo we kelfa’na wiin we, ta ref o maad oxe jegna sañ-sañ fee hupna

¹⁴ mbaat gofornoor ke. O Yaal oxe lulu a den, da nqawaa we na mbi’aa paaxeer, a tagasaa we na mbi’aa paax.

¹⁵ Yaaga koy, ke Roog a bugna refu yee nu mbi’aa paax, ndax we njegeerna o and fo ñaku xoox we a naang miik.

¹⁶ Mbesooryo boog nen wiin jegu a qoox den, ndaa o jeg xoox nuun oleene koy, ba nu mbi’in muurax naa na singaa paaxeer, yaam faɗ Roog nu ndefu.

¹⁷ Niwyo wiin we fop, mbex o fog ole no gimu we, saɗar a Roog, too niw o maad oxe.

A lalgand ale no coono ke Kiristaa

¹⁸ Nuun faɗ we, nananyo yaal pind nuun, njeg teen caƭar tigi. Baa ref soom no we mbaaxna, too a ƥuuɓ, ndaa itam no we ƭomna tig.

¹⁹ Boo nu ndoxondooxna coono, yaam ne nu nananna a Roog, too coono keene mbaree o ndal a nuun, andyo yee yirmande Roog oo.

²⁰ O njiriiñ onqum jegu boog no roxondoox a qaw a ƭomu le, yaa fi’oona bakaad? Kaa koy, a refangaa yee kaa nu ndoxondooxan yaa nu mbi’aa paax, yirmande a refu mbaambir Roog.

²¹ No keene sax nu nqoyte, yaam Kiristaa itam a coono’a yaam nuun, too a xaƴana a nuun a lalgand, ndax nu ndeef o jaf um.

²² «Ten koy, mosee o fi bakaad, too o leng mosee o nan xa maaƥ a sutooraa no don um.»

²³ Mbanuu ta wen’eena, rabdinooxoogee fo wen. Ŋalee o leng itam, ye ta coono’na, ndaa kaa ɓoxotoox na Roog fee na hate’taa o cofel.

²⁴ Ten roxondooxu pakaad in no cer um took a teex ale, ndax bakaad a xon na in, soo i ñoowaa no cofel. Na pexey a uut akaa ten nu mbodtu.

²⁵ Yaam kaa nu nand’u nen fo mbaal fo mo’u, ndaa ndiiki nu nomtooxa me no xe na gayaa, too a yetooxaa xa laaw nuun.