1 Maad we 4 - NQAARIIT NE ROOG

Kelfa ke no maat ne Salomo

¹ Salomo a maadooxanooga a Isra’el fop.

² Keeke ndefu a kon ake no kelfa ke ten: Asariya fee o ƥiy Saadok fee o saasadax,

³ Elihoref fa Ahiya we xa ƥiy Siisa, a ndef biibind we, Yosafat fee o ƥiy Ahilud, a ref o keegeek cosaan oxe.

⁴ Benaya fee o ƥiy Yehoyada adooxan’u xiixire we, Saadok fa Abiyataar a ndef saasadax we,

⁵ Asariya fee o ƥiy Natan a adooxan gofornoor ke, Sabud fee o ƥiy Natan a ref o saasadax fa jawdiin fee no maad oxe,

⁶ Ahisaar a adooxan mbind no maad ne, Adoniram fee o ƥiy Abda a adooxan calel ke na serteel.

⁷ Salomo a jeg’a gofornoor xarɓaxay fo gofornoor ƭik kam Isra’el fop, too den cooxoogu o maad oxe fo mbind um ñaamel. Oxuu refna no gofornoor ke a cooxooga o maad oxe ñaamel boo o nqool kam o hiid ole.

⁸ Weeke ndefu gofornoor ke: Ben-Xuur jeg’u xa coong axaa Efrayim.

⁹ Ben-Deker a jeg a Makas, Saalbim, Bet-Semes fa Elon-Bet-Hanan,

¹⁰ Ben-Hesed a jeg a Arubot, a jeg itam a Sooko fo saax le Hefeer fop,

¹¹ Ben-Abinadab fee dolnoogna a Tafat fee o ƥiy Salomo, a jeg a Door,

¹² Baana fee o ƥiy Ahilud a jeg a Tanak, Megido fa Bet-Se’aan fop fee reeƭna paam Sartan, a garit a Yisre’el a lanq, a xotit maaga boo Abel-Mehola, a jof kaltaa Yoqme’aam,

¹³ Ben-Gebeer a jeg a Ramot kam Galaad, a jeg itam xa taland axe Ya’iir fee o ƥiy Manaase kam Galaad fo o fiisel ole Argob kam Basan. A jeg’a fop oo fop teeru qarɓeen ɓetuu fa leng cegu saŋe kaa na mbegteel a kinglir xanjar.

¹⁴ Ahinadab fee o ƥiy Ido jeg’u a Mahanayim,

¹⁵ Ahimaas fee dolnoogna a Basmat fee o ƥiy Salomo a jeg a Neftali,

¹⁶ Baana fee o ƥiy Husay a jeg a Aseer fa Be’alot,

¹⁷ Yosafat fee o ƥiy Paruwa a jeg a Isakaar,

¹⁸ Simey fee o ƥiy Eela a jeg a Bensame,

¹⁹ Gebeer fee o ƥiy Uri a jeg na Galaad saax le Siihon fee reeƭna o maad no Aa-amori we fo le Oog fee reeƭna o maad Basan. Kaa jolna xarɓaxay fo ɗik weene, a jeg’a itam a gofornoor fa leng kam saax laa Yudaa.

²⁰ Wiin we Yudaa fo we Isra’el kaa mayit’u nen pep lanq na ƥeeraamb o maag. Kaa ñaamoogu, a yeraa, a mbelakinooxaa.