1 Maad we 3 - NQAARIIT NE ROOG

Salomo a gilga o ƥiy Firawon fee

¹ O maad Salomo a gilga o ƥiy Firawon fee o maad Misira, too ngulook ne a taxa ta moƴ o hiɓoor fa Firawon. A ɓisa o tew oxe ten na ƥak ale Dawid, a cungaa calel ke no mbind no maad ne ta fi’anaa a xoox um fo ke no Mbind ne no Yaal oxe fo ke no saŋe ne widna a Yeerusaleem a ƈut.

² Na jamaane faaga, na ñaang a sadaxand wiin we a ƥoxottoogu sadax ke, yaam Mbind ne kesaneena o Yaal oxe max’afulaand.

³ Salomo a fex’a o Yaal oxe, a reefaa xa as axe faap um Dawid. Kaa koy, ten itam na ñaang a sadaxand a ɓoxottoogu sadax fo cuuraay.

Salomo a xeɗa a Roog o jeg-yiif olaa ta maadoorna

⁴ Bes, o maad Salomo a reta Gibe’on, ndax ta ɓoxotit maaga sadax, yaam ten reeƭu xoox le na ñaang a sadaxand ake. A ɓoxota took o sadaxand olaaga sadax toxel kaa mbadna juni.

⁵ Maaga Gibe’on o Yaal oxe a feeñooxa a Salomo no yeng olaa kam o ƭaad. Roog a layaan ee: ‹Xeɗaam kuu bugoona, too xam ci’ong o ten.»

⁶ Salomo a doonaan ee: «Lalaa o tag of Dawid fee faap es o paaxel of, yaam ne ta ñaaƴoogna mbaambir of fo o woor fo o cofel fo a ƭat. Xañino o paaxel o maak oleene too fi’aa boo o leng na xa ƥeem a moof no uum-maamaad le ten, ne i nga’tuuna xaye.

⁷ Ndiiki koy, o Yaal oxe Roog es, wo dalnaxam, mi fee o tag of, o maad na seek ale Dawid fee faap es, too mexey refa o ndeɓandoong, andiim sax a ƥoot fa carind.

⁸ O tag of oxey a ndeer xeet fee wo jiloona, ta mayit neeke boo waagaand o hap, ne’atiim ta limel.

⁹ Ci’i o tag of boog yiif deyu laa ta ɗoxitna xeet fee wo, a waag itam o jektirand paax fo paaxeer. A reftangee neene, an waagkoogu o ɗox xeet of fa meɗu fene.»

¹⁰ A qeƭ alaaga Salomo a xeɗ’ina a fel’a o Yaal oxe.

¹¹ Maaga, Roog a layaan ee: «Feek keene xeɗo soo fañ o xeɗan a xoox of o xuuɗ-o-ñis mbaat o jeg halal mbaat fa nqon no fañ of, ndax xeɗaa doŋ o jeg-yiif olaa ñaaƴnitoona a ƭat,

¹² xam fi ke layoona. Xam ci’ong o jeg-yiif fo o and olaa o leng a moseerna o jeg too o leng moskiran o jeg.

¹³ Xam ci’ong itam kaa xeɗeeraxamoona, ta ref halal fo o ndam, too no ñoow of fop jegkee o leng oxaa nandna fa wo a ndeer no maad we.

¹⁴ Boo ñaaƴoona na ƭat es, gay bargal es fo kebil es, ne Dawid fee faap of a fi’tuuna, xam ɓaat xa yeng of.»

¹⁵ Salomo a yokooxa, a ga ee o ƭaad oo. A nomtooxiida Yeerusaleem, a gar mbaambir arka ne no ngiɓoor ne no Yaal oxe, a ɓoxot sadax toxel fo sadax camsa’oor. Cinj kaaga, a fi’ana dag we ten fop mbumbaay.

Salomo kaa hate’taa o jeg-yiif

¹⁶ Bes, a caga ƭak a ngara mbaambir Salomo fee o maad.

¹⁷ O leng oxe a laya yee: «Daali maad, kaam xeɗang o nan-gilooxaam a paax. Mi fo o tew oxene no mbind leng kut ne i ngenu, too a paam um ñoottum no mbind naa.

¹⁸ No ñaal ndadkandeer naa a cinj ye ñootuuma, ten itam a ñoota. In ɗik soom koy ndeeƭu no mbind naa. O lakas o leng reeƭee maaga, a refangee in ɗik weeke.

¹⁹ O ƥiy o ngoor onqe no tew oxene a xona o yeng ole, yaam kaa wondoor’un.

²⁰ Neene, a inooxa ndeer o yeng ole, a soƥ o ceefeer of a ɗaanaa, ta jang o ƥees o ngoor onqe reeƭna paam es, a wondnin paam um, soo o ƥeem onqe xonna, ta wondnin paam es.

²¹ Inooxaam no nqes ne, ndax um numin o ƥees soo ga ee a xona. Horooxaanum a paax na qoolaand ale, ga ee reeƭee o ƥees onqe ñootuuma.»

²² Maaga, o tew o lakas oxe a foola, a lay ee: «Refee ndigil! O ƥees na ñoowaa, oxe na wo a xon!» O eetaand oxe a doonaan ee: «Ha’aa, o ƥeef kañ xonu, oxe na mi a ñoowaa!» Neene, a ndefa no ñimatiraa mbaambir o maad oxe.

²³ O maad oxe a laya yee: «Oxene kaa lay ee: ‹O ƥees onqene o mat na ñoowaa, soo oxe na wo a xon›, oxaana a lay ee: ‹Ha’aa, o ƥeef kañ xonu, oxe na mi a ñoowaa!› »

²⁴ Maaga, o maad oxe a heblita yee: «Ƥisiidaamoo laƥ.» Ye ta ɓisiideena laƥ ne,

²⁵ a laya yee: «Mbandyo o ƥiy onqe na ñoowaa, coox o tew o leng oxe kene, coox o lakas oxe kaana.»

²⁶ Cer ke no tew oxe jeg’ina o ƥiy onqe na ñoowaa a naanga dayum yaam o mbeq o maak onqe ta jeg’ina no ƥeem. A laya o maad oxe yee: «Daali maad o yaal es, cooxeenoo o ƥiy onqe na ñoowaa, ngela ba nu mbarin!» O tew o lakas oxe mat a laya yee: «Mbandeenoo, neene jegkinum, jegkino.»

²⁷ Maaga, o maad oxe a laya yee: «Ba nu mbar o ƥiy onqe. Cooxeenoo o tew o eetaand oxe, yaam ten refu ya um.»

²⁸ Ii-isra’el we fop a yega ne Salomo a hate’it’ina keene. Maaga, a niwa o maad oxe lool, yaam a and ee Roog fa xoox um ci’un o and olaa ta hate’taa fo o cofel.